Hesekiel 3 - Labrador Inuttitut Heritage Bible

¹ Okautivangalo: Inûb erninga, sângnêtoᴋ nerrileruk; immûmajoᴋ aglalik nerrileruk, ailerillo, Israêliblo ᴋitorngangit oᴋâlavigilugit.

² Taimaimat aitarpunga, tâpsomalo aglangnik immûmajunik nerritipânga.

³ Oᴋautivângalo: Inûb erninga, nâkkik tatakik, aᴋeartolutillo immûmajomut mattomunga tunijamnut ilingnut. Tagva nerrivara, ᴋanimnelo tippeᴋarpoᴋ igupsaujârtut orᴋsungatut mamaktigilune.

⁴ Okautivângalo: Inûb erninga, aularit, Israêlib ᴋitornganginut ailutit, oᴋâlavigikillo oᴋausimnik.

⁵ Tilijaulunginavit inungnut oᴋavigôrtunut tusarngartaniglo oᴋauselingnut, Israêlible ᴋitornganginut;

⁶ Inôᴋatigêksoanu-ungitoᴋ oᴋavigôrtunut nelonartuniglo oᴋauselingnut, ilingnut tukkisijaujungnangitunik, Taimaitunut tilinajarupkit, taipkoa tusarajarpâtit.

⁷ Israêlible ᴋitorngangita tusarniangilâtit; tusaromangimatta uvamnik; Israêlib ᴋitorngangit ilûnatik ᴋauᴋarmatta sittijunik ômateᴋarlutiglo mangaidlartunik.

⁸ Ahâk, kênait sittitipara tâpkoa kênanginut, ᴋaullo sittitipara tâpkoa ᴋaunginut.

⁹ Alligoᴋtut sittinersaujotut ᴋairtomit ᴋaut sittitigitipara; erᴋsiginiarnagit, kênangillo kapiasûtiginiarnagit pît, ᴋitorngarêngongmatta tapatojut.

¹⁰ Oᴋautivângalo sulle: Inûb erninga, oᴋausikka ilingnut oᴋauserijakka tamaita ilaliorkit ômatingnut, tusarkillo siutingnut.

¹¹ Aularillo, aularutijaumajunut inôᴋativit ᴋitornganginut ailutit, oᴋarvigikillo, oᴋautilugillo: Imâk Nâlegaᴋ Nâlegaujoᴋ oᴋarpoᴋ; nâlamangâtalônêt nâlangimangâtalônêt.

¹² Anernerub tagva ᴋangatartipânga, tunumnelo tusarpunga suluksuksoarmik, oᴋartomik: Nertortaule Nâlekab ânanauninga iniminit pijoᴋ.

¹³ Tusarpungalo ômajut isarungita aktuagutijut suluksungninginik, aksaloallo pervalungninginik tâpkonunga ilaujut, ila, suluksuksûb ᴋôrᴋsungninganik.

¹⁴ Anerneruble ᴋangatartipânga aularutilungalo: ingerarpungalo kassêvlunga, anernimalo ilungertorningane, Nâlekablo aggangita pitsartudlarlutik ᴋolangiarpânga.

¹⁵ Tikipungalo tâpkonunga aularutijaujunut Tel-Abibemêtunut, nunaᴋartunut kôngme Kêbareme, ingipungalo tâpkoa ingivigijangine; iksivavungalo tagvane tâpkoa akorngane uvlut 7 nâvlugit, issumakut ilaᴋemavlunga.

¹⁶ Uvlullo 7 nângmatta, Nâlekab oᴋausingata tikipânga, oᴋarlune:

¹⁷ Inûb erninga, udjertortingortisimavagit Israêlib ᴋitornganginut: taimaimat ᴋanerma oᴋauserijanga tusarsâruk, tunitjivigikillo inerterutiksanik uvamnit.

¹⁸ Idluitulijoᴋ oᴋautigupko, Toᴋojuksauvotit; inertilungikungnelo, oᴋalungikuvillo idluitulijoᴋ uloriasuᴋovlugo apᴋotiminit idluitomit, inôsinelo piulilugo; tagva idluitulijoᴋ tâmna toᴋolârpoᴋ idluinermine; igville akkiortuksaulârpotit aunga pivlugo.

¹⁹ Idluitulijorle inerterungne, tâmnalo sangulungipat idluitulinerminit apᴋotiminillo idluitomit, toᴋojuksaulârpoᴋ idluinermine, igville tarnît piulivat.

²⁰ Amalo, idluartoᴋ sangupat idluarnerminit idluitulilunelo, uvangalo ilijiguma nâviksamik sânganut, toᴋojuksaulârpoᴋ; inertilaunginangne toᴋolârpoᴋ idluinermine, idluartulinerilauᴋtangillo piniarnerilauᴋtangit erᴋaumajaunialungilat; igville akkiortuksaulârpotit aunga pivlugo.

²¹ Idluartorle inerterungne idluituliᴋonago, idluitulingikunelo inôjuksaulârpoᴋ kamalaurame inertertaunermik igvillo tarnît piulivat.

²² Nâlekablo aggangita tagvane ᴋolangiarpânga; oᴋautivângalo: Makigit, naᴋsarmullo ailutit, tagvane oᴋaᴋatigijomavagit.

²³ Makipungalo ailungalo naᴋsarmut: ahâglo, Nâlekab ânanauninga tagvanêpoᴋ, sorlo kôngme Kêbareme takolaurapko: pâmakpungalo kênara pulugo.

²⁴ Anernerub tagva pulavânga, nikovitipângalo; oᴋarvigivlungalo imâk: Ailerit parngnairsorlutillo ilingnik iglungne.

²⁵ Igville, inûb erninga, ahâk, ᴋelarutinik pititsivigilârpâtit, ᴋelaksulârpâtillo tâpkonunga, anijungnarᴋonak tâpkoa akornganut;

²⁶ Uvangalo oᴋait ᴋilangnut nipingatitsomavara oᴋarungnarungnairᴋovlutit, inerterijungnarᴋonak tâpkoninga: ᴋitorngarêngongmatta tapatojut.

²⁷ Oᴋarvigigupkille ᴋanît angmaromavara, oᴋautijaksarivatillo: Imâk oᴋarpoᴋ Nâlegaᴋ Nâlegaujoᴋ: Nâlagomajoᴋ nâlakle, nâlagomangitorlo nâlangile: ᴋitorngarêngongmatta tapatojut.