Hesekiel 29 - Labrador Inuttitut Heritage Bible

¹ Jarit 10ingita uvlungita 12ingane, Nâlekab oᴋausingata tikipânga, oᴋarlune:

² Inûb erninga, kênait sâtiuk Faraomut, Egiptenib ataninganut, nelautaivigiuglo tâmnalo Egiptenelo ilûnât:

³ Oᴋalerit, oᴋarlutillo: Imâk oᴋarpoᴋ Nâlegaᴋ Nâlegaujok: Ahâk, sâvigivagit, Farao, Egiptenib ataninga, kôkôriartoᴋsoangojotit angijoᴋ, ineᴋartotit nuname kôksoâk akorngangne, oᴋartotit: Kôksoara nangminerivara, senalauᴋpara uvamnut ilingatilugo.

⁴ Erᴋiaromârpagit aglerukut, mingeriallo kôksoarnêtut nipingatitsomârpakka kavisernut: ᴋaᴋititsomârpagillo kôksoaᴋotingnit, mingeriat ilûnatik nipingajut kavisernut ilagivlugit.

⁵ Kemagomârpagillo egitauguvit sunaᴋajuitomut, igvillo kôksoavillo mingeriangit ilûnatik; katagomârpose nunab ᴋânganut; katitaujomângilase kiviktaugaselônêt; nerᴋiksautipapse nunab nergjutinginut, kilaublo ikkiangata tingmianginut.

⁶ Egiptenemiullo ilûnatik ᴋaujijuksauvut uvangaugama Nâlegaᴋ, tâpkoa ajaupiangolaungmatta suvlolik Israêlib ᴋitornganginut.

⁷ Aggakut tigumialaungmatit nappivotit, tâpkoalo ilûnatik tuingit killerlugit; egarvigingmatillo navikpotit, tâpkoa makkitingit ilûnatik sujuktidlarlugit.

⁸ Taimaimat imâk oᴋarpoᴋ Nâlegaᴋ Nâlegaujoᴋ; Ahâk, saviksoarmik tikiutjijomavunga ilingnut, inungniglo nergjutiniglo pêjaijomavunga ilingnit.

⁹ Nunalo Egipten inuêrlunelo sunairutijomârpoᴋ; ᴋaujijuksauvullo uvangaugama Nâlegaᴋ; tâmna oᴋarmat; Kôksoaᴋ perᴋutigivara, uvanga senalauᴋpara.

¹⁰ Tamanna pivlugo, ahâk, sâvigivagit, kôksoatillo sâvigivlugit, nunalo Egipten asserornilukungortitsomârpara sunaᴋajuitungordlugolo, Sevennib nuvugusinganit Etiopiab kiglinga tikidlugo.

¹¹ Inuillônêt nergjutillônêt itigangit tagvûna ingerartuksaungilat, jârillo 40 nâvlugit inuᴋartuksaungilaᴋ.

¹² Nunalo Egipten asserornilukungortitsomârpara nunat asserorsimajut ilagilugit, iglugasaksoangillo inuêrutijomârput iglugasaksuit inuêrutijut ilagilugit jârit 40 nâvlugit; Egiptenemiullo siamartitsomârpakka inôᴋatigêksuit akornganut, ᴋemâtitsomârlugillo nunanut.

¹³ Imâk oᴋarmat Nâlegaᴋ Nâlegaujoᴋ: Jârit 40 nâkpatta Egiptenemiut katersoromârpakka inôᴋatigêksoarnit siamarvigijanginit:

¹⁴ Tikiutijomârpaᴋᴋalo Egiptenemit aularutijaujut, utertitsomârlugillo nunamut Patrosemut, inûlervigijanganut; tagvanelo ataniovikullôlârput.

¹⁵ Naggonarnerpaujomârpoᴋ ataniovingnit, kingornganelo anginersaujungnairomârpoᴋ inôᴋatigêksoarnit: ikitlititsomârpakkalo inôᴋatigêksoarnut ataniojungnaiᴋovlugit.

¹⁶ Israêliblo ᴋitorngangita tatigijungnailârpait, idluitulinermik erᴋaijutauvlutik keviarunik takosâromavlugit; ᴋaujijuksauvullo uvangaugama Nâlegaᴋ.

¹⁷ Pijokarporlo jârit 27ingita, taᴋᴋingita sivorlerpângata uvlungita sivorlerpângane, Nâlekab oᴋausingita tikingmanga, oᴋarlune:

¹⁸ Inûb erninga, Nebukadnezarib, Babilonib ataningata, sorᴋsuktuksane kivgartortipait kivgartornermik angijomik Tiruseme, ilûnatik niaᴋungit nujairtaulauᴋput, ilûnatiglo tuingit amêrtauvut: tâmnalônêlle sorᴋsuktoᴋotingillônêt Tirusemit akkiksarsingilat tagvane kivgartoramik:

¹⁹ Tamanna pivlugo imâk oᴋarpoᴋ Nâlegaᴋ Nâlegaujoᴋ: Ahâk: nuna Egipten tunijomârpara Nebukadnezaremut, Babilonib ataninganut; tâpsomalo aularutijomârpait inugiartoᴋsoangit, tigulugillo akluiningit, aᴋsârnigarilugillo perᴋutingit, sorᴋsuktuksangitalo akkiksarijomârpait tâpkoa.

²⁰ Nuna Egipten tunivara tâpsomunga akkiliutiksauᴋovlugo kivgartornerijanginut, kivgartormanga, oᴋarpoᴋ Nâlegaᴋ Nâlegaujoᴋ.

²¹ Uvlorme tâpsomane Israêlib ᴋitorngangita nakjusangit nuilertitsomârpara, tunitjivigijomârpagillo ᴋanermik angmartomik tâpkoa akorngane; ᴋaujijuksauvullo uvangaugama Nâlegaᴋ.