Hesekiel 27 - Labrador Inuttitut Heritage Bible

¹ Nalekablo oᴋausingata tikilerivânga, oᴋarlune:

² Igvillo, inûb erninga, ogguarit Tiruse pivlugo;

³ Tiruselo oᴋautiuk: Igvit nunaᴋartotit imarbiub itervingane, niuverteojotit ᴋikkertat unuktut inunginut, imâk oᴋarpoᴋ Nâlegaᴋ Nâlegaujoᴋ: Igvit, Tiruse, oᴋarpotit, pionera inornarpoᴋ.

⁴ Kiglitit imarbiksuit ᴋeterᴋanganêput, ilingnik senajut pionît inornartilauᴋpât.

⁵ Amiksatit ᴋebleriktôvut Sêneremit pijut, tigusilauᴋput Sîderenik Libanonemit naparutalioromavlutit.

⁶ Eputiksatit ᴋejôvut sittijoᴋsajat Basanemit; iktogaksatit senalauᴋpait tôgânit, avaliarutaᴋarlutik ᴋejungmik sittijomik Kittimib ᴋikkertanginit.

⁷ Tingergautaᴋalauᴋpotit ilupâksajamik ᴋaᴋᴋoriktomik pinnarnarsautetalingmik Egiptenemit, nelunaikutauᴋovlugo ilingnut; pinnailutarijatillo tungujoᴋtauvut tungulângajorlo Elîsab ᴋikkertanginit.

⁸ Eputoᴋalauᴋpotit Zidonemiunik Arvademiuniglo; ilisimajoᴋotitit ilingnêput, ᴋaujimajigilauᴋpatit, Tiruse.

⁹ Angajoᴋaunerojut ilisimajullo ilingnêlauᴋput upsersoilutik; imarbiub umiaᴋsoangit ilûnatik umiaᴋtortingit ilagilugit ilingnêput niorvgutiksatit niorvgutigilugit.

¹⁰ Persiamiullo Ludimiullo Putimiullo sorᴋsuktuksarilauᴋpatit unatartuksauvlutik; sapûlutaniglo nessaluganiglo nivingailauᴋput ilingne; ânanaudlarnît allakaluarᴋovlugo.

¹¹ Arvademiut sorᴋsuktoᴋatigêksoaᴋotitit ilagivlugit avaloᴋsoavit ᴋânginêlauᴋput ilûnâne, ᴋoaᴋsângaitullo nuvugusingnêput; nivingaigivut sapûlutamingnik ᴋarmangne ilûnâne; nâmaksititsivut ânanaunernik.

¹² Tarsisemiut niuverniarᴋatigivâtit perᴋutitit adsigêngitut unuktoᴋsôngmatta; silbere, kikiarlo, amertajarlo, aᴋitorlo tauᴋsiutivait perᴋutingnut.

¹³ Javanemiullo Tubalemiullo Mesekemiullo niuverniarᴋatigivâtit: inungnik senamajuniglo ᴋaᴋorlermit taungniuteᴋalauᴋput perᴋutingnik.

¹⁴ Togârmamiut pisiaksatit pisiarilauᴋpait, horsenik, horseniglo unatarnermut ilingajunik, siutiᴋortojoᴋsoarniglo, akkiliuteᴋarlutik.

¹⁵ Dêdanemiut niuverniarᴋatigivâtit, ᴋikkertane unuktune niuverniarviᴋalauᴋpotit: tôgânik ᴋejungniglo ᴋernertanik tauᴋsiutjivut.

¹⁶ Siriamiut niuverniarput ilingne, senajavit unurningit pitjutigilugit, perᴋutitit akkilerlugit aligonut, tungulângajunullo annorâksanut, puttolapânullo, annorâksanullo ᴋaᴋᴋoriktomut, ujaraujârtunullo puttolapânut imarbiub erᴋânit, ujarangnullo pivianartunut.

¹⁷ Judakut Israêlitillo niuverniarᴋatigivâtit, perᴋutitit akkileromavlugit ᴋaitsilauᴋput senaugaksanik Minitimit pijunik, mamaktuniglo, igupsaujârtullo orᴋsuanik, orᴋsumiglo, mingoarutiksaniglo.

¹⁸ Senajavit unurningit pitjutigilugit, Damaskusemiut niuverniaᴋatigilauᴋpâtit, akluinivit adsigêngitut unurningit pitjutigivlugit; vainemut Helbonemit saukallo merᴋunginut ᴋaᴋᴋortamut akkilêvlutik.

¹⁹ Vêdanemiut Jâvanemiullo akkiliutiksaᴋalauᴋput annorâksajanik merᴋolingmik; ilingnullo aulaivut kikiangmik, âniasiutiniglo tipitsiariksautiniglo.

²⁰ Dêdanemiut niuviaksaᴋalauᴋput ᴋemuksertunut ulitsiaᴋsoarnik.

²¹ Arâbiamiut Kêdariblo angajoᴋâᴋsoangit niuverniaᴋatigilauᴋpâtit, aulaivigivâtit saugâraniglo saukaniglo tuktungajuniglo.

²² Niuverniartit Sêbamelo Râmamelo niuverniaᴋatigivâtit: perᴋutitit akkilerpait tauvlukutiksanut pionerpânut, ujarᴋanullo pivianartunut, goldemullo.

²³ Hâranemiut Kannemiullo Edenemiullo, niuverniartit Sêbame, Assurmiut Kilmademiullo niuverniarput ilingne.

²⁴ Tâpkoa niuverniaᴋatigilauᴋpâtit perᴋutinik pijominartunik, immutiksanik tungulângajunik puttolapâniglo, iklervingniglo annorâksatalingnik akkitudlartunik, aklunânut nimersimajunik, sîderemit senamajunik, niorvgutiksatit akorngane.

²⁵ Tarsisemiut umiaᴋsoangita niuviaksatit adjartorpait: pitsartutitaulauᴋpotillo nakorijauvlutillo imarbiub ᴋerᴋâne:

²⁶ Eputoᴋotiville tikiutivâtit imaᴋsoarnut angijunut; kanangâble serᴋomipâtit imarbiub ᴋerᴋâne.

²⁷ Akluinitit perᴋutitillo, niuviaksatit imarbiksiortitillo, ᴋaujimajitit upsersoijitillo, niorvgutiksarniglo aulatsijitit, sorᴋsuktuksatillo ilingnêtut, inuᴋotitillo ilûnatik ilingnêtut kivijomârput imarbiub ᴋerᴋânut asserortaunivit uvlungane.

²⁸ Kaujimajivit ᴋaggudlarningita pervalungninginut avalitit sajugomârput.

²⁹ Eputiniglo tigumiarpaktut, imarbiksiortitillo, ᴋaujimajillo imarbiksiortut ilûnatik niojomârput umiaᴋsoamingnit, nangeromârpullo nuname,

³⁰ Nippitiglo tusartautitsomârpait pivlutit, ᴋeadlaromârput, egitsijomârput saningnik niaᴋomingnut, aksapaloajomârput arᴋjanut;

³¹ Mattaromârpullo pivlutit, attisilutiglo pôksajavinernik, ᴋugviorutigilârpâtillo tarnimik ilungertorninginut kiksarpâdlutik.

³² Keadlarnermingnelo ogguarutelioromârput pivlutit, oggorilutillo, imailijomârput: Kina Tirusetut ilingavâ, tâpsotunaᴋ nipangertitaujotut imarbiub ᴋerᴋânê?

³³ Niuviaksatit nuingmatta imarbingnit, inoᴋatigêksuit unuktut aᴋᴋeartortipatit; nunaᴋsûb ataningit akluitilauᴋpatit akluinivit niorvgutiksavillo unuktoᴋsôningninut.

³⁴ Mânale imab navgorpâtit imab itiningane, niuviaksatit inuᴋotitillo ilingnêtut ilûnatik kiviᴋatigivâtit.

³⁵ Kiᴋᴋertamiut ilûnatik tataminiarput pivlutit, ataningit sivôradlarput angijoᴋsoarmik, kapiasudlartunik kênaᴋarput.

³⁶ Niuvertit inôᴋatigêksoarnêtut kôkoviarput inerᴋogingimatit; asserorningorsimavotit, suniarungnairpotillo issoᴋangitomut.