Hesekiel 26 - Labrador Inuttitut Heritage Bible

¹ Pijokarporlo jârit 11ingita taᴋᴋingita uvlungita sivurlerpângane, Nâlekab oᴋausingata tikingmanga, oᴋarlune:

² Inûb erninga, Tiruse Jerusalem pivlugo oᴋarmat: Annerpanarmêk, taimna inôᴋatigêksuit itervigilauᴋtangat serᴋomisimavoᴋ, uvamnut sanguvoᴋ; ilumertaulârpunga mâna tâmna asserortaungmat:

³ Tamanna pivlugo imâk oᴋarpoᴋ Nâlegaᴋ Nâlegaujoᴋ: Ahâk, akkerartorpagit, Tiruse, inôᴋatigêksuillo unuktut majuartitsomârpakka ilingnut, sorlo imarbiksûb maliksoarne ᴋagvertingmagit.

⁴ Asseroijomârpullo Tirusib avaluᴋsoanginik, nuvugusingillo oggotidlarlugit; siorangit aglât kiliortoromârpakka tâpsomangat, ᴋairtuînangordlugolo.

⁵ Nulluanik issivitsiviksaujomârpoᴋ imarbingme; uvanga taimak oᴋarama, oᴋarpoᴋ Nâlegaᴋ Nâlegaujoᴋ: aᴋsârnigaksaujomârporlo inôᴋatigêksoarnut.

⁶ Paningillo naternamêtut toᴋotaujomârput saviksoarmut; ᴋaujijuksauvullo uvangaugama Nâlegaᴋ.

⁷ Imâk oᴋarmat Nâlegaᴋ Nâlegaujoᴋ: Ahâk, Tirusemut tikiutijomârpara avangat Nebukadnezar, Babilonib ataninga, ataniojut atanerijangat, horselijarlune, aksaloalingnik ᴋemukserlune, horsene ablângajunik, katimgajuniglo, inugiartoᴋsoarniglo ilaᴋarlune.

⁸ Panitit naternamêtut toᴋotsomârpait saviksoarmut: talulioromârporlo avaluᴋsoalioromârlunelo sapûlutalioromârlunelo sângne.

⁹ Kautaᴋsoarniglo asserortautinik âᴋiksoijomârpoᴋ avaloᴋsoarnut, ulimautiminullo oggotitsijomârpoᴋ nuvugusingnik.

¹⁰ Horsingit unuktoᴋsôngmatta uliktaulârpotit pujunginut: avaloᴋsoatit sajukpilugomârput horsit aksaloalillo ᴋamutillo unatautiksat pervalungninginut iterviksoatigôrpatta, sorlo inuit itârmatta iglugasaksoarnut ᴋoppakut.

¹¹ Horsingita kukiujanginut apᴋosinitit tullerajaromârpait, inuᴋotitit toᴋotsomârpait saviksoarmut, nappajoliatillo sôngojut nunamut nakkalârput.

¹² Perᴋutitillo aᴋsârnigarijomârpait, niorvgutitillo arᴋtautigilugit; avaloᴋsoatillo serᴋomilârpait, iglotillo takominartut asserorlugit; ujarᴋatillo ᴋejuktillo siorᴋatillo egitsomârpait imânut.

¹³ Tuksiarnivillo errinangit sorairtitsomârpakka, harfivillo nippingit tusaksaujungnairomârput.

¹⁴ Kairtuînangortitsomârpagillo: issipterviksaujomârpotillo nulluanik; ᴋarmaliorviojungnairomârpotit kingorngane; uvangaujunga Nâlegaᴋ taimak oᴋarama, oᴋarpoᴋ Nâlegaᴋ Nâlegaujoᴋ.

¹⁵ Imâk oᴋarpoᴋ Nâlegaᴋ Nâlegaujoᴋ Tirusemut; Kikkertat sajukpilâromângilât oggonivit pervalungninganût, ikkilersimajut âlalerpatta, toᴋoraineᴋ pigialerpat ilingnê?

¹⁶ Ataniojut ilûnatik imab tungânêtut aᴋᴋaromârput iksivautaᴋsoarmingnit, uliksoatik pêrlugit, annorâtiglo pinnarnarsautelit mattarlugit: attisilârpullo sajungnermik; iksivajomârput nuname, sajuktailijungnaratik, tataminiarutigilârpâtillo.

¹⁷ Oggualârpullo pivlutit, oᴋautilutillo: Sinaungamêk asserortaugavit igvit inigijaulauᴋtotit imarbiksiortunut, iglugasaksoangojotit nertugaujoᴋ, imarbingme pitsartulauᴋtotit, igvit inuᴋotitillo kapiasûtiksaulauᴋtose tagvane nunaᴋartunut.

¹⁸ Mâna ᴋikkertat sajukpilukput oggotitaunivit uvlungane; ila, ᴋikkertat imarbingmêtut ôlikput naggatiksat pivlugo.

¹⁹ Imâk oᴋarmat Nâlegaᴋ Nâlegaujoᴋ: Iglugasaksoangortikpagit inuêrutjaujunik, iglugasaksoatitut inuᴋarungnaitutitut; itinersoaᴋ ilingnut ᴋagvertikupko imaksuillo mattukpatit;

²⁰ Kanungartitsomavagit attersârtut itersâlungmut ilagivlugit, inungnut itsarnitanut, nunaᴋartitsomârpagillo nunane allerpâne, inine nutaungitomit inuêrutjaujune, itersâlungmut attersârtut ilagivlugit, inuᴋarungnaiᴋovlutit, allianarnîllo ilijomângilara inôjut nunangane.

²¹ Asserornilukungortitsomârpagit itsungnaijomârpotillo: ᴋenertaugaloaruvit nagvartauniatsangilatit issoᴋangitomut, oᴋarpoᴋ Nâlegaᴋ Nâlegaujoᴋ.