Hesekiel 25 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Inûb erninga, kênait sâtiuk Ammonib ᴋitornganginut, nelautaivigikillo:

³ Ammoniblo ᴋitorngangit oᴋautikit: Nâlekab Nâlegaujub oᴋausinga tusarsiuk: Imâk oᴋarpoᴋ Nâlegaᴋ Nâlegaujoᴋ: Annerpanarmêk, ivsornaitoviᴋotiga pivlugo ivsornaijungnaititaungmat; Israêliblo nunanga pivlugo sujuktaungmat; Judablo ᴋitorngangit pivlugit aularutijaungmatta;

⁴ Tamanna pivlugo, ahâk, tunijomârpapse kingormgutijaksauᴋovluse taunanêmiut ᴋitornganginut, tâpkoalo tangmârteromârput ilipsingne, nunasivigiluselo; perortoᴋotise nerrijomârpait, imuselo imerlugo.

⁵ Rabbalo igluksautitsomârpara kamêlinut, Ammoniblo ᴋitorngangita nunangat aᴋᴋopiviksautitsomavlugo saukanut: ᴋaujijuksaulârposelo uvangaugama Nâlegaᴋ.

⁶ Imâk oᴋarmat Nâlegaᴋ Nâlegaujoᴋ: Aggaktit pataktolaurangne, tukkarᴋataravillo itigarnut, tarnivillo ilungertorninganut mitauteᴋarlutit ᴋuviasulauravit Israêlib nunanga pivlugo;

⁷ Taimaimat, ahâk, aggakka issakpakka ilingnut, tunijomavagillo aᴋsârnigauvlutit inôᴋatigêksoarnut: nunaᴋatigêksoarnillo pêjaromavagit, assioᴋojomavagillo nunanit: nungutsomavagillo: ᴋaujijuksauvotillo uvangaugama Nâlegaᴋ.

⁸ Imâk oᴋarpoᴋ Nâlegaᴋ Nâlegaujoᴋ: Moabelo Siarelo oᴋarmanik: Ahâk, Judab ᴋitorngangit ilingangmatta inôᴋatigêksoatitut ilûnaititut;

⁹ Tamanna pivlugo, ahâk, Moabib seneranga angmaromârpara iglugasaksoanginit, iglugasaksoanginit kiglinganêtunit, nunab pijorijangit, Bet-Jesimot, Baal-Meonelo, Kiriatailo,

¹⁰ Taunanêmiut ᴋitornganginut tunijomârpakka, Ammonib ᴋitorngangit ilagilugit, perᴋutauᴋovlugit, Ammonib ᴋitorngangit erᴋaumajaujungnaiᴋovlugit inôᴋatigêksuit akorngane:

¹¹ Moabelo erᴋartoromârpara; ᴋaujijuksauvullo uvangaugama Nâlegaᴋ.

¹² Imâk oᴋarpoᴋ Nâlegaᴋ Nâlegaujoᴋ: Edomib Judab ᴋitorngangit akkiniarvigingmagit, angijomiglo pidlaraksautingardlune tâpkonunga akkiniarvionermut:

¹³ Tamanna pivlugo imâk oᴋarpoᴋ Nâlegaᴋ Nâlegaujoᴋ: Aggakka issagomârpakka Edomemut, kipisijomavungalo inungnik nergjutiniglo tagvangat: Têmanelo sunaᴋarungnaititsomârpara: aglât Dêdan tikidlugo saviksoarmut oggotitaujomârput.

¹⁴ Akkiniarneralo ilijomârpara Edomemut inuᴋotima Israêlib agganginut: Tâpkoalo Edomeme piniaromârput ningaumajârnera ᴋaningaumajârneralo maliklugik: ᴋaujijuksauvullo akkiniarnimnik, oᴋarpoᴋ Nâlegaᴋ Nalegaujoᴋ.

¹⁵ Imâk oᴋarpoᴋ Nâlegaᴋ Nâlegaujoᴋ: Filisterit akkiniaromamut piniarmatta, tarnimiglo ilungertorninganut akkiniarmatta asseroromavlugo ômisungnermut soraijuitomut;

¹⁶ Taimaimat imâk oᴋarpoᴋ Nâlegaᴋ Nâlegaujok: Ahâk, aggakka issagomârpakka Filisterenut, Kêritemiullo kipigomârpakka, imarbiksûblo sidjanganêtut amiakungit nungutsomârpakka.

¹⁷ Angijomiglo akkiniarvigijomârpakka inerterinernut ilungertortunut; ᴋaujijuksaulârpullo uvangaugama Nâlegaᴋ, akkiniarnera pitigupko tâpkonunga.