Hesekiel 24 - Labrador Inuttitut Heritage Bible

¹ Nalekablo oᴋausingata tikipânga jârit 9ingata taᴋᴋingata 10ingata uvlungita 10ingane, oᴋarlune:

² Inûb erninga, aglagit uvlub tamattoma attinganik, uvlorme tamattomaneluatsiaᴋ Babilonib ataninga tikingmat Jerusalemib ᴋanitanganut.

³ Kitorngarêllo tapatojut oᴋarvigikit adsiujomik, oᴋautikillo: Imâk oᴋarpoᴋ Nâlegaᴋ Nâlegaujoᴋ: Ukkusik iliuk, iliuk imerlugolo:

⁴ Iggâksat avgorkit, iggâksat annernarnerpât ilûnaita, mimit talillo; tataguk saunernik annernarnerpaujunik.

⁵ Saukat katimgajut pionerpânganik tigusigit, sauningillo ᴋalerêktikit tâpsomunga; ᴋallatsiarlit; ila, sauningit ᴋallatsiarlit iluane.

⁶ Tamanna pivlugo imâk oᴋarpoᴋ Nâlegaᴋ Nâlegaujoᴋ: Kappê iglugasaksuit auliksuit, ukkusiojut ᴋapotalik, pêjaiviongitoᴋ ᴋapominik! Aviksimajut (ukkusiub ilulingit) nelleᴋârtuinarlutik pêrkit, ânanauniarnagit.

⁷ Aunga iluanêngmat; ᴋairtotuinarmut kovilauᴋpâ, ivjomut kovilaungilâ sanningnut saujaujungnarᴋovlugo;

⁸ Kaningaumajârneᴋ ᴋagvertitsomavlugo akkiniarutigijomavlugo, aunga kovijautilauᴋpara ᴋairtotuinarmut, saujauᴋonago.

⁹ Taimaimat imâk oᴋarpoᴋ Nâlegaᴋ Nâlegaujoᴋ: Kappianarmêk iglugasaksuit auliksuit! ᴋejuksat ᴋalerêt angijorortitsomavakka.

¹⁰ Angijomik ᴋejugiaruk, ikoma ikoâlatsiarle, nerᴋejaᴋ igamatsiarᴋovlugo, ᴋajoᴋ kinertangorᴋovlugo, saunillo ôtauᴋovlugit.

¹¹ Imaᴋartinagolo aumanut iliuk, ônadlarᴋovlugo, ᴋaᴋorlingalo aumalerᴋovlugo, salumaininga pêrᴋovlugo iluane, mangertorningalo nungutauᴋovlugo.

¹² Suliaᴋarnermut merngortomarikpoᴋ, mangertorniâluale pêngilaᴋ tâpsomangat; mangertorninga pêjartaulungilaᴋ ikomamut.

¹³ Ivsornarnît kangunartulinermik ilaᴋarpoᴋ; epᴋêjalauraloarapkit epᴋêjartaujomanginavillo epᴋêjartaujungnailârpotit salumainernit kingorngane, nâmaksititsiᴋârtinanga ningaumajârnimnik ilingnik.

¹⁴ Uvanga Nâlegaujunga tamanna oᴋautigivara, nelautsilârpoᴋ piniaromârparalo; uteromangilanga, anajagosugomanangalo, ᴋaᴋᴋialeromangilangalônêt; apᴋutigijatit piniarnerijatillo maliklugit erᴋartoromârpâtit, oᴋarpoᴋ Nâlegaᴋ Nâlegaujoᴋ.

¹⁵ Nâlekablo oᴋausingata tikipânga, oᴋarlune:

¹⁶ Inûb erninga, ahâk, ijikpit ᴋuviagijanga pêjaromavara ilingnit tagvainârtomik; igville ogguartuksaungilatit ᴋeajuksaungilatillônêt, ᴋugvitillônêt ᴋorlortuksaungilat.

¹⁷ Annersaumigit, tusaksaungitomigle; toᴋungajoᴋ ogguarutiginiarnago, niaᴋôserille kamiklutillo, ᴋangasinâkiglo mattoniarnagik, inuillo kiksartut nerrivaktanganik nerriniarnak.

¹⁸ Uvlâkut tagva inuit oᴋaᴋatigivakka; unnukullo nuliara toᴋovoᴋ; uvlângormallo piniarpunga sorlo perᴋojaugama.

¹⁹ Inuillo aperivânga: Oᴋautitsomangilaptigût taimailiornitit suksaumangâta uvaptingnût?

²⁰ Oᴋautivakka tagva: Nâlekab oᴋausingata tikipânga, oᴋarlune:

²¹ Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Ivsornaitoviᴋotiga, pitsartunipse inornautâ, ijipse ᴋuviagijangat, tarnipse kajungervigijangat ivsornaijungnaititsomavara; erniselo paniselo ᴋemaktase oggotitaujomârput saviksoarmut.

²² Pinialârposelo sorlo uvanga piniarama, ᴋangasinâse mattolulângilase, inuillo kiksartut nerrivaktangit nerrilulângilase.

²³ Niaᴋôsersimalârposelo kamiksimalârluselo; oggualulângilase ᴋeanaselônêt; kipilârposele idluinipsingne, ârusuᴋatigêlârluselo.

²⁴ Taimaglo Hesekiele nelunaikutaulârpoᴋ ilipsingnut; sorlo tâmna piniarmat taimailiolârpose: tamannalo neliutikpat, tagva ᴋaujilârpose uvangaugama Nâlegaᴋ Nâlegaujoᴋ.

²⁵ Igvillo, inûb erninga, uvlorme tâpsomane pitsartuneᴋarvingat, pinnarnarijangita inornautâ, ijingita ᴋuviagijangat, tarningitalo kajungervigijangat, erningillo paningillo, tâpkonangat tigugupkit,

²⁶ Uvlorme tâpsomane anigoijoᴋ ilingnôromangilâᴋ tusartitsomavlutit tamattominga siutingnût?

²⁷ Uvlorme tâpsomane ᴋannît angmaromârpoᴋ tâpsomunga anigoijomut, oᴋartuksaulârpotillo nipangerungnailutillo; taimaglo nelunaikutaujomârpotit tâpkonunga; ᴋaujilârpullo uvangaugama Nâlegaᴋ.