Hesekiel 23 - Labrador Inuttitut Heritage Bible

¹ Nalekab oᴋausingata tikilerivânga, oᴋarlune:

² Inûb erninga, arnaᴋalauᴋpoᴋ maggungnik, anânab atautsib panîgingnik:

³ Tâpkoalo anguniaᴋattalauᴋpuk Egipteneme; angunialauᴋpuk inôsungnermingne: tagvane iviangîgik nênertaulauᴋpuk, tagvanelo uigasônîkita mullingit tigluktauvut.

⁴ Attîgik imaipuk: angajukleᴋ: Ohôla, nukâlo: Ohôliba. Pigilerpâkalo, ernertârpuglo panitârlutiglo. Attîgiglo pitjutigilugik, imaipoᴋ: Ohôla tagva Samaria, Ohôliba tagva Jerusalem.

⁵ Ohôlalo, perᴋutauvlune uvamnut, assiniarpoᴋ; assiniakatinelo ikligivait, Assiriamiut, nunangata silalingit.

⁶ Tungujortanik annorâlît, atanerutsit angajoᴋâᴋsuillo, ilûnatik inôsuktut takominartut, horselijartut, ablângalutik horsene.

⁷ Tâpkoa assiniaᴋatigilauᴋpait Assiriab angutingit erᴋanarnerpât tamaita, ivsornartiporlo nangminerminik assiniaᴋatigijangita gudingoanginut ilûnainut.

⁸ Iperailungilarlônêt assiniarnerminik Egiptenemit neksartaminik, inôsungnermine inangaᴋatigilauᴋpât, uigasôningatalo mullingit tiglulauᴋpait: koverarvigilauᴋpâllo assiniarnermingnik.

⁹ Tamanna pivlugo tunilauᴋpara assiniaᴋatigijangita agganginut, Assiriamiut agganginut, ikligilauᴋtanginut.

¹⁰ Tâpkoa kangusûtinga ulêrpât: erningillo paningillo aᴋsârnigarivait, tâmnalo saviksoarmut toᴋopât: tâmna attetuinaulilauᴋpoᴋ arnat akorngane; tâpkoa erᴋartormatsuk.

¹¹ Nukangata Ohôlibab tamanna takovâ tâmnale sugaluluarpoᴋ tâpsomangat ikligudlarnermine assiniarnerminelo, assiniarningit unuluarmatta angajume assiniarninginit.

¹² Tâpsoma ikligidlarpait Assiriamiut, atanerutsit angajoᴋâᴋsuillo silalingit, annorâtsialijartut, horselijartut ablângalutik horsene, ilûnatik inôsuktut takominartut.

¹³ Takovaralo ivsornartitaudlarmat; apᴋut atauseᴋ tamarmik atorpâk.

¹⁴ Tâpsomale assiniarnine unuksitipait; takoleramigit ᴋarmarme angutit adsingoangit, Kaldêamiut adsingoangit aupaluktamik adsiliortaumajut.

¹⁵ Tapserusijartut makitingitigut, niaᴋôsijartut taᴋsapatânik nivingasulâlingniglo, ilûnatik atanerutsititut tautulit, sorlo Babilonemiut nuname Kaldêame inûlervingmingne.

¹⁶ Takotuaramigit tagva ikligidlarpait, aᴋpârtuniglo aulartitsivlune tâpkonunga Kaldêamut.

¹⁷ Babilonemiullo tikipât tuttigomavlugo ungajigêktut inangaviane, ivsornartipâllo assiniarnermingnut, tâmnalo ivsornartitauvoᴋ tâpkonunga, tarningatalo ariulerpait.

¹⁸ Tagva assiniarnine ᴋaujijautipait, kangusûtigijanelo saᴋᴋertipait: tarnimale ariupâ, sorlo angajua ariumago.

¹⁹ Assiniarninele unuksitidlarpait, erᴋaivlune inôsungnime uvlunginik assiniarvigilauᴋtaminik Egipteneme.

²⁰ Ikligivailletauᴋ tâpkoa assiniaᴋatigijangit, tâpkoa uvinekarputsiuteᴋortojut uviningatitut, ikliguningillo horsit ikliguningititut iput.

²¹ Taimaglo aulajilauᴋpotit assiniarnerijarnik inôsuktilutit, mullivit tigluktauninginik Egiptenemiunut inôsungnivit iviangîgik pitjutigivlugik.

²² Taimaimat, Ohôliba, imâk oᴋarpoᴋ Nâlegaᴋ Nâlegaujoᴋ: Assiniaᴋatigilauᴋtatit ariulilauᴋtatit makititsomavakka, avatingnit akkerartoriartorᴋovlugit ilingnik;

²³ Babilonemiut Kaldêamiullo ilûnatik, Pekod Soalo Koalo, Asseriamiullo ilûnatik ilagilugit; inôsuktut takominartut, aulatsijut angajoᴋâᴋsuillo ilûnatik, atanerutsit angutillo erᴋanartut, ilûnatik ablângavlutik horsene.

²⁴ Ilingnut pijomârput sakkolijarlutik ᴋamutilijarlutiglo unatautinik aksaloalingniglo, inugiartoᴋsoalijarlutiglo katersortaujunik; ilumajomârpâtillo avatikut ilûnâgut sagvingmiutalijarlutik sapûlutalijarlutiglo niaᴋoarêkutilijarlutiglo; tâpkonungalo erᴋartuineᴋ perᴋojomârpara, erᴋartoromârpâtillo erᴋartuinitik maliklugit.

²⁵ Ilungertorneralo makititsomârpara ilingnut, tâpkoalo ningaumajâdlarlutik iliorvigilârpâtit; ᴋingairlutit siutairomârpâtit; amiakoᴋotitillo saviksoarmut oggolârput; ernitit panitillo tigujomârpait; amiakoᴋotitillo ikomamut nungutaujomârput.

²⁶ Mattarlutit annoraijaromârpâtit, pinnarnarsautitit pêjaromârpait.

²⁷ Taimak kangunartulinitit sorairtitsomavakka ilingnit, assiniarnitillo neksartatit Egiptenemit; arlorungnaiᴋovlutit tâpkonunga, erᴋaumajungnaiᴋovlutillo Egiptenemik kingorngane.

²⁸ Imâk oᴋarmat Nâlegaᴋ Nâlegaujoᴋ: Ahâk, tunijomavagit ômigijivit agganginut, tarnivit ariutangita agganginut:

²⁹ Tâpkoalo ômigidlarlutit iliorvigilârpâtit, katersortatillo tamaita tigulârpait, ussingalutillo sunairutilutillo ᴋemalârpâtit: assiniarnivillo kangunarninga, kangunartulinitillo, assiniartitillo saᴋᴋertitaujomârput.

³⁰ Taimailiorviolârpotit nelojunut assiniarnitit pivlugit, ivsornartitaugavillo tâpkoa gudingoanginut.

³¹ Angajuvit apᴋutigijangane arvertalauᴋpotit: tamanna pivlugo tâpsoma ᴋajûtanga tunijomavara aggangnut.

³² Imâk oᴋarpoᴋ Nâlegaᴋ Nâlegaujoᴋ: Angajuvit ᴋajûtanganit, itijomit nerrotojomillo, imertuksauvotit: ijoralautigijaudlalârpotit mitautigijauvlutillo ajornarmariktomik.

³³ Tatadlalârpotillo talanermik kiksarnermiglo, tatamnadlarnerub asserorsimanerublo ᴋajûtanganit, angajuvit Samariab ᴋajûtanganit.

³⁴ Imeraksarivat aluktorlugolo, kinganekungit ipardlugit, iviangîkik aliktorlugik; uvanga taimak oᴋarama, oᴋarpoᴋ Nâlegaᴋ Nâlegaujoᴋ.

³⁵ Tamanna pivlugo Nâlegaᴋ Nâlegaujoᴋ oᴋarpoᴋ imâk: Puigoramga egigamgalo tunungnut, tamanna pivlugo kangunartulinitit assiniarnitillo nangmaraksarivatit.

³⁶ Nâlekab oᴋautivânga sulle: Inûb erninga, Ohôla Ohôlibalo erᴋartoromavigîk? tagva nelonaijaivigikik maᴋojungnartulinermingnik.

³⁷ Ajortulilaungmanik, aggangillo auliksôvut, gudingoangillo assiniaᴋatigilauᴋpait; ernitiglo, uvamnut erniarijatik, tâpkonunga tunivait ôtaksautilugit nungutauᴋovlugit.

³⁸ Tamakkoalo tapilugit imailiorvigivânga: ivsornaitoviᴋotiga ivsornartipât uvlorme tâpsomanetsainaᴋ, sabbatikkalo ivsornaijungnaitilugit.

³⁹ Kitorngatik toᴋojarangamigit gudingoarijamingnut, uvlorme tâpsomanetsainaᴋ iterput ivsornaitoviᴋotimnut ivsornartilugolo; ahâglo, taimailiorput iglumne.

⁴⁰ Sullelo tiliklilauᴋpotik angutinut ungasiktomit tikituksanut: tâpkonunga aᴋpârtoᴋ tilijaulauᴋpoᴋ, ahâglo, tikiput; tâpkoalo pivlugit ubvarpotit, ijîkiglo mingoarpakik, ânanausivotit pinnarnarsautinut;

⁴¹ Iksivavotillo innangavingme piojôdlartome, sângane sâᴋartomik nerᴋiksatalingmik, tâpsomalo ᴋânganut tipigiksautiga orᴋsuᴋotigalo ilivakik.

⁴² Inugasaksuillo uimajârtut nippingit tâpsomanêput: inutuinarnullo ilauvut talapaktut inuᴋajuitomit; ilijivullo aggautemiutanik tâpkoa tamarmik aggautîgingnut, niaᴋôtîngniglo piojûngnik niaᴋôgingnut.

⁴³ Uvangale oᴋarpunga tâmna assiniarnerme ningiongojoᴋ pivlugo: Mâna tâpkoa assiniaᴋatigilârpât, tâpsomalo piᴋatigilârivait.

⁴⁴ Itervigivâllo sorlo assiniarpaktomut itersôngomatta, taimak iterput Ohôlamut Ohôlibamullo, arnângnut tapkungnunga kangunartulijûngnut.

⁴⁵ Angutille idluartut erᴋartoromarpakit sorlo anguniarpaktut erᴋartortauvangmatta, sorlolo arnat aungmik kovisijut erᴋartortauvangmatta; anguniarpaktôngmanik aggangillo auliksôngmatta.

⁴⁶ Imâk oᴋarmat Nâlegaᴋ Nâlegaujoᴋ: Inugiartoᴋsuit majorartitsomavakka tâpkungnunga, tunijomavâkalo egitauᴋattarᴋovlugik namutuinaᴋ asserortauᴋovlugiglo.

⁴⁷ Inugiartoᴋsuillo milolârpakik ujarᴋanut, kapilugiglo saviksoarnut; toᴋotsilârput erninginik, paninginiglo, iglungillo ikomamut nungulugit.

⁴⁸ Taimak kangunartulineᴋ sorairtitsomavara nuname, arnat ilûnatik anusingorᴋovlugit, ilipsetut kangunartuliᴋonagit.

⁴⁹ Ilijivigilârpâselo kangunartulinipsingnik, gudingoapsingniglo akkiniartaujutigijomârpase: ᴋaujijuksauvoselo uvanga Nâlegaᴋ Nâlegaugama.