Hesekiel 22 - Labrador Inuttitut Heritage Bible

¹ Sulle Nâlekab oᴋausingata tikipânga, oᴋarlune:

² Igvit, inûb erninga, erᴋartuilutit iglugasaksuit aungmik kovisiviotsainartut erᴋartoromangilatît? maᴋojungnartuliningillo unertûtigijomangilatît tâpkonungâ?

³ Oᴋartuksauvotillo: Imâk oᴋarpoᴋ Nâlegaᴋ Nâlegaujoᴋ: Iglugasaksoangojose, aungmik kovisitsainarpose iglupsingne, piviksase neliutiᴋovlugo, piksapsingniglo gudingoaliorpose iglupsingne, ivsornartitauᴋovluse!

⁴ Auk ilipsingne kovijoᴋ pivlugo pidlaraksautipose, ivsornartitauvoselo gudingoarnut senajapsingnut; taimaidluse uvluse ikitlitipase, jâriselo nâlertipase; tamanna pivlugo allêkutiksangortipapse inôᴋatigêksoarnut, mitautiksangortiluselo nunane ilûnaine.

⁵ Kanitullo ungasiktullo ilipsingnit mitautigilârpâse, attekut ivsornartisimajose, pikablartuniglo tatadlartose.

⁶ Ahâk, Israêlib ataningit, ilûnatik pitsartunitik maliklugo, ilipsingnêlauᴋput aungmik kovisijomavlutik.

⁷ Ilipsingne atâtat anânallo naggogijauvut; takorngartat oᴋumaiksartitauvut; ilipsingne iliarsuit uigarnerillo nâmangituliviovut.

⁸ Ivlernartoᴋotikka naggogivase, sabbateᴋotikkalo ivsornaijungnaitipase.

⁹ Ilipsingnêlauᴋput angutit terliarkataijut aungmik kovisijomavlutik, ilipsingnelo nerrivut ᴋaᴋᴋane; ilipsingnelo kangunartulivut.

¹⁰ Ilipsingne ulêrpait atâtamik kangugijangit: ilipsingnelo arnat neliuneᴋsiortut pagvisartauvut.

¹¹ Ilangata inôᴋatime nulianga maᴋojungnartuliᴋatigivâ, aipangata ᴋuksalaidlarlune ukkoane ivsornartipâ; assiata ama najane, atâtame paninga, naggonartipâ.

¹² Ilipsingne piliusianik tigusivut, aungmik kovisiᴋovlugit; tapiksaᴋarᴋojivullo aᴋᴋilêᴋojivullo ununersanik attartortautilauᴋtanginit; pijomatudlarlutik aᴋsârput aksorornermut, puigorpapsingalo, oᴋarpoᴋ Nâlegaᴋ Nâlegaujoᴋ.

¹³ Taimaimat, ahâk, aggakka pataktorpakka akkituterineᴋ nelâgôngitoᴋ iluserijase pivlugo, auglo kovimajoᴋ ilipsingnêtoᴋ pivlugo.

¹⁴ Omatise sapingilârᴋât, aggaselônêt sangijolârᴋât uvlorme piniarvigijomârtamne ilipsingnîk? Uvanga Nâlegaujunga oᴋautigivara, taimailioromavungalo.

¹⁵ Siamartitsomavapse inôᴋatigêksuit akornganut, ajaktoromavapselo nunanut; maᴋojungnarniselo pêjaromavara ilipsingnit.

¹⁶ Ominalârposelo nangminipsingnut inôᴋatigêksuit sângine; ᴋaujijuksauvoselo uvangaugama Nâlegaᴋ.

¹⁷ Nâlekablo oᴋausingata tikipânga, oᴋarlune:

¹⁸ Inûb erninga, Israêlib ᴋitorngangit piunginerlukotuinangorsimavut uvamnut: ilûnatik ᴋaᴋorliovut amertajauvlutiglo kikiangovlutiglo aᴋitôvlutiglo auksititsivingmêtut; silberib piunginerlukogivait.

¹⁹ Taimaimat imâk oᴋarpoᴋ Nâlegaᴋ Nâlegaujoᴋ: Ilûnase piunginerlukongorsimagapse, tamanna pivlugo ahâk, Jerusalemib iluanut katersoromavapse.

²⁰ Sorlo silbere ᴋaᴋorlerlo kikiarlo aᴋitorlo amertajarlo pititauvangmatta auksititsiviub iluanut, ikoma tâpkonunga supôrdlugo auksiᴋovlugit, taimaktauᴋ katersoromârpapse ningaumajârnimne ᴋaningaumajârnimnelo, tagvungalo ilijomavapse auksitiluselo.

²¹ Ila, katersoromârpapse supôrdluselo ningaumajârnima ikomanganut, auksititaujomârposelo iluane.

²² Sorlo silbere auksititaungmat auksititsivingme, taimaluatsiaᴋ auksititaujomârpose iluane; ᴋaujijuksaulârposelo uvanga Nâlegaujunga ningaumajârnera kovigapko ilipsingnut.

²³ Nâlekablo oᴋausingata tikipânga, oᴋarlune:

²⁴ Inûb erninga, oᴋautiuk: Nunauvotit ivsornaititaungitoᴋ, silalugviomangitoᴋ uvlorme silugviojome.

²⁵ Nelautaijungit tâpsomanêtut idluitomik angiᴋatigêkput, loevetut kalingoartotut aliktuiniartotut ilingalutik: tarnenik nerrivut; tigusivut perᴋutinik ivlernartuniglo; uigarnerillo unuksitipait tagvane.

²⁶ Ajoᴋertuijungita perᴋojakka idluiliorvigivait, ivsornaitoᴋotikkalo ivsornaijungnaitipait: ivsornaitullo ivsornaingitullo adsigêngitilungilait, inôᴋatitiglo ajoᴋertulungilait adsigêngititsijuksaungmatta ivsornaituniglo ivsornaingituniglo, sabbatimnullo ijitik mattuvait, uvangalo ivsornaijungnaititauvunga tâpkoa akorngane.

²⁷ Erᴋanartungit tagvanêtut amarᴋutitut aliktuiniartutitut iput; aungmik kovisiniarlutik, tarninigilo asseroilutik, pijomatudlarnitik pitjutigilugit.

²⁸ Nelautaijungillo nippitinerᴋusêvut maggarmut ᴋoajuitoᴋangitomut tâpkonunga, piutsangitunik, takovlutik, saglonerniglo nelautaivigivlugit, oᴋarlutik: Imâk oᴋarpoᴋ Nâlegaᴋ Nâlegaujoᴋ; Nâlegaᴋ oᴋarsimatinago.

²⁹ Nunab inungit aksorotjivut arᴋtaivlutiglo; ilo, aklujut ajoᴋsartullo oᴋumaiksartipait, takorngartallo nênerpait idluangimariktomik.

³⁰ Tâpkoa akorngane angutisiolauᴋpunga ilâᴋtuijuksamik avalungmik, sâdlungalo nunalo serngnigilugo aitanganerme nangertuksamik, asseroiᴋonanga nunamik; nagvângilangale.

³¹ Tamanna pivlugo ningaumajârnera ilivara tâpkonunga; nungutipakka ᴋaningaumajârnima ikomanganut: apᴋutingit ilivakka niaᴋunginut, oᴋarpoᴋ Nâlegaᴋ Nâlegaujoᴋ.