Hesekiel 21 - Labrador Inuttitut Heritage Bible

¹ Nalekablo oᴋausingata tikipânga, oᴋarlune:

² Inûb erninga, kênait sâtiuk Jerusalemut, oᴋausîllo kataktiuk ivsornaitovingmut, Israêliblo nunanga nelautaijutigileruk;

³ Israêliblo nunanga oᴋautiuk: Imâk oᴋarpoᴋ Nâlegaᴋ: Ahâk, sâdlaromavagit, saviksoaralo amujomavara kênailitanganit, idluartullo idluitullo kipiniaromavlugit ilingnit.

⁴ Idluartullo idluitullo kipiniaromagapkit ilingnit, tamanna pivlugo saviksoara anijuksauvoᴋ kênailitaminit uvinilingnut tamainut ângat avunga tikidlugo:

⁵ Uvinilîllo ilûnatik ᴋaujijuksauvut uvanga Nâlegaᴋ saviksoara amusimagapko kênailitanganit; kingornganelo mangugungnailârpoᴋ.

⁶ Taimaimat anersaumisârit, igvit inûb erninga, ᴋetilerilutit ᴋasilidlarlutillo anersaumijuksauvotit tâpkoa ijingita sângine.

⁷ Aperikpatillo: Sôᴋ anersaumivêt? oᴋartuksauvotit: Unipkautaujut pivlugit, neliutilermat: ômatillo ilûnatik auksijomârput, aggaillo ilûnatik nukingêrutijomârput, anernillo ilûnatik maksuijarsimajomârput, serᴋullo ilûnatik imeᴋtut sangêtigijomârput; ahâk, neliutilerpoᴋ nelautsilârporlo, oᴋarpoᴋ Nâlegaᴋ Nâlegaujoᴋ.

⁸ Nâlekablo oᴋausingata tikipânga, oᴋarlune:

⁹ Inûb erninga, nelautailerit, oᴋarlutillo: Imâk oᴋarpoᴋ Nâlegaᴋ: Oᴋarit, Saviksoaᴋ, saviksoaᴋ, kênaksartauvoᴋ kiligartaulunelo:

¹⁰ Kênaksartauvoᴋ toᴋoraiᴋovlugo, kiligartauvorlo ᴋaumalaktun iᴋovlugo: ᴋuviasuktuksauvitâ tagva? Ernerma issaᴋautinga naggovoᴋ napartunik tamainik.

¹¹ Kiligartautitauvorlo tigumiartaujungnarᴋovlugo: saviksoaᴋ ila kênaksartauvoᴋ, ila, kiligartauvoᴋ tunijaksauᴋovlugo toᴋotsijûb agganginut.

¹² Keadlarit avâladlarlutillo, inûb erninga, inuᴋotikka pilermagit, Israêliblo angajoᴋaujungit tamaita pingmagit: saviksoaᴋ pivlugo kapiasungnersoaᴋ inuᴋotimnêpoᴋ: tamanna pivlugo sibviat tigluguk.

¹³ Idluarsaiviᴋarpoᴋ, ᴋanoelingalârᴋâlo issaᴋaublônêt ilerasungitûb sapperpagô? oᴋarpoᴋ Nâlegaᴋ Nâlegaujoᴋ.

¹⁴ Taimaimat, igvit inûb erninga, nelautailerit, aggaktit pataktorkit: saviksoaᴋ tapitarêlerle pingasuertorlune, toᴋonartomik ikkilersimajub saviksoanga: ila, erᴋanartûb, toᴋonartomik ikkilersimajûb, saviksoarivâ, saviksoaᴋ kajusijoᴋ ininginut.

¹⁵ Saviksûb nuvua torârtipara iterviksoanginut tamainut, ômatingit mungorᴋovlugit, naukiutiningillo unuksiᴋovlugit. Kebleriksartauvoᴋ ᴋaumalaᴋtut, kênaksartauvoᴋ toᴋotsinermut.

¹⁶ Katsungailerit, talerpingmut aigit; sangulermît, saumingmut aigit; namullônêt kênait torârmangât.

¹⁷ Uvangatauᴋ aggakka pataktoromavakka, ningaumajârneralo nâmaksititsomavara: uvanga Nâlegaujunga taimak oᴋarpunga.

¹⁸ Nâlekab oᴋausingata tikilerivânga, oᴋarlune:

¹⁹ Omât, inûb erninga! Titerkik apᴋutiksâk maggûk, Babilonib ataningata saviksoangata apᴋutigijungnartâgik; tamarmik nunamit atautsimit apᴋutiksaujuksauvuk; tikoartûserlugolo, torauseruk apᴋosiniub iglugasaksoarnut sangmijûb issuane.

²⁰ Titeruk apᴋosineᴋ saviksûb apᴋotigijaksanga Rabbamut Ammonib ᴋitorngangita pinganut, Judamullo Jerusalemut sôngotitaujomut.

²¹ Babilonib ataninga nangilaungmat apᴋosiniub aviktarviane, apᴋutîk maggûk issûgingne, nelautaiviojomavlune angakoᴋtornermut: ᴋargjutit aulapait, gudingoat aperivait, tingolo ᴋemergovâ.

²² Nelautaijût Jerusalemut ilingajoᴋ talerpianêpoᴋ, kautaᴋsoarmik ilijiᴋovlugo, ᴋannerlo angmarᴋovlugo toᴋotsiᴋojinermut, nippillo angijororᴋovlugit ᴋaigarsungnermut, kautaᴋsoarmik ilijiᴋovlugo upkoaᴋsoarnut, taluksat âᴋiktauᴋovlugit, sôngoviksaliortoᴋarᴋovlugo.

²³ Tâpkoale (Judit), angermaringnermik angilauᴋtut tâpkonunga (Kaldêerinut), nelautailukangniojorilârpât: tâpsomale (Nebukadnezarib) idluitulineᴋ erᴋaumajautipâ, tâpkoa tigujauᴋovlugit.

²⁴ Tamanna pivlugo imâk oᴋarpoᴋ Nâlegaᴋ Nâlegaujoᴋ: Idluitulinise erᴋaumajautinapsigik, tapanise ulernairtaungmat, piniarnipsingne tamaine idluitulinise saᴋᴋijarmatta, piniarnipsingne tamaine idluitulinise saᴋᴋijarmatta; erᴋaumajaugapse ila, tigujaulârpose aggangnut.

²⁵ Igvillo idluitotit toᴋonartomik âniatitaujotit, ataniojotit Israêleme, uvluksat tikisimavoᴋ, naggatiksab pidlartauvingata neliuningane; imâk oᴋarpoᴋ Nâlegaᴋ Nâlegaujoᴋ:

²⁶ Nessarlugaᴋ pêrsâruk, niaᴋôtik pêjartaule: tamanna taimailingajungnailermat; alleᴋ ᴋagvertitaujomârpoᴋ, poᴋtojorlo poᴋilititaujomârpoᴋ.

²⁷ Mumiklugo, mumiklugo, mumidlaromavara: tamanna taimailingajungnailârivoᴋ, tâpsominga peᴋartuksaᴋ tikerᴋârtinago, tâpsomungalo tunijomârpara.

²⁸ Igvillo, inûb erninga, nelautailerit oᴋarlutillo: Imâk oᴋarpoᴋ Nâlegaᴋ Nâlegaujoᴋ Ammonib ᴋitorngangit pivlugit, mitauteᴋarningillo pivlugit; oᴋarillo: saviksoaᴋ, saviksoaᴋ amujauvoᴋ, ᴋebleriksartauvoᴋ toᴋorainermut, nungutsiᴋovlugo, ᴋaumalaᴋtut ilingaᴋovlugo;

²⁹ Takotitjutinik sulingitunik takoneraitilugit ilingnut, saglonernik oᴋartilugit ilingnut, ilijijomavlutit idluitulijut toᴋonartomik âniatitaumajut ᴋongesinginut, tâpkoa uvluksangat tikisimavoᴋ, naggatiksab pidlartauvingata neliuningane.

³⁰ Pônganut pôtuinarmiuk. Nuname pingortitauvigilauᴋtarne, nuname inûlervigilauᴋtarne, erᴋartoromavagit.

³¹ Kaningaumajârneralo kovijomavara ilingnut, ningaumajârnima ikomanga supôrdlugo ilingnut: pititsomavagillo angutit nâpkiningneᴋangitut agganginut, asseroinermik ilisimajut.

³² Kejuksatuinaujuksauvotit ikomamut; erᴋaumajauniatsangilatit: uvanga Nâlegaᴋ taimak oᴋarama.