Hesekiel 20 - Labrador Inuttitut Heritage Bible

¹ Pivorlo jarit 7ingata, taᴋᴋingata tellimangata uvlungita 10ingane, Israêlib angajoᴋângita ilangit tikingmatta Nâlegaᴋ aperijomavlugo, sâmnullo ingiput.

² Nâlekablo oᴋausingata tikipânga, oᴋarlune:

³ Inûb erninga, Israêlib angajoᴋângit oᴋarvigikit, oᴋautilugillo: Imâk oᴋarpoᴋ Nâlegaᴋ Nâlegaujoᴋ: Tikikisê uvanga aperijomavlungâ? Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aperijaujomangilanga ilipsingnut.

⁴ Erᴋartoromavigît, igvit inûb erninga, erᴋartoromavigît? Kaujitisârkit atâtagijangita maᴋojungnartulinerilauᴋtanginik;

⁵ Oᴋautikillo: Imâk oᴋarpoᴋ Nâlegaᴋ Nâlegaujoᴋ: Uvlorme ipsomane Israêle annerilaurapko, aggakkalo ᴋolangiutitigapkit Jakokut kinguvânginut, ᴋaujijautilauramalo tâpkonunga nuname Egipteneme, aggakka ᴋolangiutitigapkit tâpkonunga, oᴋarlunga: Uvangauvunga Nâlegaᴋ Gudise;

⁶ Uvlorme tâpsomane aggakka ᴋolangiutitilauᴋpakka tâpkonunga anititsomavlugit nunamit Egiptenemit nunamut tâpkonunga ᴋenilauᴋtamnut imungmik igupsaujârtullo orᴋsuanik kôᴋartomut, nunat tamaita pionerpânganut.

⁷ Oᴋautivakkalo: Ilûnase atunit ijipse maᴋojungnartulijutigijangit egisigik, ivsornartiniaraselo nangminipsingnik Egiptenemiut gudingoanginut; uvangauvunga Nâlegaᴋ Gudise.

⁸ Tâpkoale tapagilauᴋpânga nâlegomanangalo; egitsijoᴋangilaᴋ ijingita maᴋojungnarutigijanginik, iperaingilallônêt Egiptenemiut gudingoanginik: oᴋarpunga tagva, kovisivigijomavakka ᴋaningaumajâdlarnimnik, nâmaksijomavlugo ningaumajârnera tâpkoninga tagvane Egipteneme.

⁹ Piniarpungale attera issumagivlugo, tâmna ivsornaijungnaititauᴋonago inôᴋatigêksuit, tâpkoa najortangita, takoane, tâpkoa takoane ᴋaujijautilaurama uvamnik tâpkonunga anitilaurapkit nunamit Egiptenemit.

¹⁰ Taimaimat anitilauᴋpakka nunamit Egiptenemit, tikiutilugillo sunaᴋajuitomut.

¹¹ Tunitjivilauᴋpakkalo maligaksauᴋojamnik, nelojungnaitilugillo idluarijamnik, tamakkoalo inûb piniarpagit inôjûtigilârpait.

¹² Tunitjivigivakkalo sabbatimnik, nelonaikutauᴋovlugit uvangalo tâpkoalo akunaptingne, ᴋaujimaᴋovlugit uvanga tâmnaugama Nâlegaᴋ tâpkoninga ivsornaititsijoᴋ.

¹³ Israêlible ᴋitorngangita tapagilauᴋpânga sunaᴋajuitome; arvertalaungilat maligaksauᴋojamne ajaktuivulle perᴋojamnik, inûb tamakkoa piniarpagit inôjûtigilârpait; sabbatikkalo sôngojomik ivsornaijungnaitipait: oᴋarpunga tagva ningaumajârnera kovijomagapko tâpkonunga sunaᴋajuitome, nungutsomavlugit.

¹⁴ Piniarpungale attera issumagivlugo, tâmna ivsornaijungnaititauᴋonago inôᴋatigêksuit aularutjivigilauᴋtama tâpkoninga sângine.

¹⁵ Aggakkalo isângatilauᴋpakka tâpkonunga sunaᴋajuitome, tikiutijomanginapkit nunamut tunijamnut tâpkonunga, kôᴋartomut imungmik igupsaujârtullo orᴋsuanik, nunanit tamainit pionerpaujomut;

¹⁶ Perᴋojakka ajaktulaungmagit, arvertaratiglo maligaksauᴋojamne, sabbatikkalo ivsornaijungnaitingmagit; ômatingita gudingoaliarimajatik malingmagit.

¹⁷ Ijimale anajagivait asserortauᴋonagit, nungujomangilakkalônêt sunaᴋajuitome.

¹⁸ Sunaᴋajuitomelo ᴋitorngangit oᴋautivakka: Arvertarniarase atâtapse maligaksauᴋojangine, nâlengniaraselo perᴋojanginik, ivsornartiniaraselo ilipsingnik gudingoanginut;

¹⁹ Uvanga Nâlegaugama Gudise; arvertaritse maligaksauᴋojamne nâlekluselo perᴋojamnik, tamakkoa piniarlugit;

²⁰ Sabbatikkalo ivsornaitisigik; tâpkoalo nelunaikutaujuksauvut uvangalo ilipselo akunaptingne, ᴋaujimaᴋovluse uvanga Nâlegaugama Gudise.

²¹ Kitorngalletauᴋ tapagivânga; arvertalaungilat maligaksauᴋojamne, perᴋojakkalo nâlengilait piniaromavlugit, inûb tamakkoa piniarpagit inôjûtigijangit; sabbatikka ivsornaijungnaitipait, oᴋarpunga tagva ᴋaningaumajârnera kovijomagapko tâpkonunga, ningaumajârnera tâpkoninga nâmaksijomavlugo sunaᴋajuitome.

²² Aggakkale isângajungnaitipakka, piniarpungalo attera issumagivlugo, tâmna oᴋarnerlutigijauᴋonago inôᴋatigêksuit aularutjivigilauᴋtama tâpkoninga sângine.

²³ Sullele aggakka isângatilaurivakka tâpkonunga sunaᴋajuitome siamartitsomagapkit inôᴋatigêksuit akornganut nunanullo serᴋitijomavlugit;

²⁴ Malilaungimatta perᴋojamnik, ajaktuimattalo maligaksauᴋojamnik, ivsornaijungnaititsingmattalo sabbatimnik ijingillo sangumatta atâtagijangita gudingoanginut.

²⁵ Tunitjivigivakkatauᴋ maligaksanik idlualungitunik perᴋojaniglo inôgûtaungitunik;

²⁶ Ivsornartipakkalo tunergutimingnut, ikomakôrtitsingmatta tamainik erniangojunik, asseroiᴋovlunga tâpkoninga, ᴋaujimalerᴋovlugit tâmnaugama Nâlegaᴋ.

²⁷ Tamanna pivlugo, igvit inûb erninga, oᴋarit Israêlib ᴋitornganginut, oᴋautikillo: Imâk oᴋarpoᴋ Nâlegaᴋ Nâlegaujoᴋ: Tamattomanetauᴋ atâtapse mitautigivânga, tapagilaungmanga.

²⁸ Tikiutisimalaurapkit nunamut, aggakka isângatilugit tunijamnut tâpkonunga, ulernairtuivut ᴋaᴋᴋanik poᴋtojunik tamainik, napârtuniglo siliktunik tamainik, tagvanelo tunerguserput, tagvungalo pajukput tunergutimingnik maᴋojungnartunik, tagvanelo âᴋiksorpait tipigiktut naimajominartuliarimajatik, tagvanelo kovivait tunergutitik imiksat.

²⁹ Oᴋautivakka tagva: Suvâ imna poᴋtojoᴋ aivigijase? Sullelo uvlome tikidlugo taijauvoᴋ Poktojomik.

³⁰ Tamanna pivlugo Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Ivsornartiᴋisê ilipsingnik atâtapse iluserijangit maliklugît? Assiniarᴋisêlo tâpkoa maᴋojungnartuliangit maliklugît?

³¹ Tunergutiselo tunigupsigik, erniselo ikomakôrᴋogupsigik, ivsornartikisê ilipsingnik gudingoapsingnut uvlome tikidlugô? Uvangalo aperijaujuksauvingâ ilipsingnut, ilipse Israêlib ᴋitorngangît? Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aperijaujomangilanga ilipsingnut;

³² Issumapsingnullo pijut nelautsiniangimarikput, oᴋarapse: Inôᴋatigêksoatitut ilingajomavogut, nunat ᴋitorngarêngningititut, ᴋejuit ujarᴋallo kivgartorlugit.

³³ Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, aggangnut pitsartujunut, talingmullo issamijomut, ᴋaningaumajârnermullo kovijaujomut, ataniojomavunga ilipsingnut:

³⁴ Tikiutijomavapselo inôᴋatigêksuit akornganit, katersoromavapselo nunanit siamarvigijapsingnit, aggangnut pitsartujunut, talingmullo issamijomut, ᴋaningaumajârnermullo kovijaujomut;

³⁵ Tikiutijomavapselo inôᴋatigêksuit sunaᴋajuitunganut, tagvanelo erᴋartoromavapse kênarmit kênarmut.

³⁶ Sorlo atâtagijase erᴋartulaurapkit sunaᴋajuitome nuname Egipteneme, taimak erᴋartoromavapse, oᴋarpoᴋ Nâlegaᴋ Nâlegaujoᴋ.

³⁷ Ajaupiab atâgôrtitsomavapse, tikiutijomavapselo angiᴋatigêngnerub ᴋelarutinganut;

³⁸ Akunapsingnillo pêjaromavakka nâlegungnaitut tapatojullo uvamnik; anititsomavakka nunamit tujormivigijanginit, itertuksaungilalle Israêlib nunanganut; ᴋaujijuksauvoselo uvangaugama Nâlegaᴋ.

³⁹ Ilipsele, Israêlib ᴋitorngangit, imâk oᴋarpoᴋ Nâlegaᴋ Nâlegaujoᴋ: Aileritse, ilûnaselo atunit gudingoaliarimajase kivgartorsigik, kingornganelo, nâlegomangikupsinga, attera ivsornaitoᴋ ivsornaijungnaititaksaringilase tunergutipsingnut gudingoapsingnullo.

⁴⁰ Kaᴋᴋamne ivsornaitome, Israêlib poᴋtoningata ᴋaᴋᴋangane, oᴋarpoᴋ Nâlegaᴋ Nâlegaujoᴋ, tagvane Israêlib ᴋitorngangita ilûnatik, ila, nunamêtut ilûnamaritik, kivgartoromârpânga: tagvanelo ilalioromârpakka, tagvanelo tunergutise, paungallo pijariorutit tunijaksarijase, ivsornaititase tamaita ilagilugit, ᴋaitauᴋojomârpakka.

⁴¹ Tippe naimajominartoᴋ naivlugo ilalioromavapse, anitikupse inôᴋatigêksuit akornganit, katersorupselo nunanit siamarvigijapsingnit; ivsornaititaujomavungalo ilipsigut inôᴋatigêksuit takoane.

⁴² Kaujijuksaulârposelo uvangaugama Nâlegaᴋ, tikiutigupse Israêlib nunanganut, nunamut, aggakka issângatilugit, angerutigilauᴋtamnut tunijomavlugo atâtapsingnut.

⁴³ Tagvanelo erᴋaijomârpose apᴋotigijapsingnik piniarnerijapsingniglo tamainik, ivsornartitsijutigijapsingnik ilipsingnik, maᴋojugilârposelo ilipsingnik, piungitulinerit piniartase tamaita pitjutigilugit.

⁴⁴ Kaujijuksaulârposelo uvangaugama Nâlegaᴋ, attera pivlugo sulivigigupse, apᴋutise idluitut maliklugi-ungitoᴋ, piniarniselo asserornartut maliklugi-ungitoᴋ, ilipse Israêlib ᴋitorngangit, oᴋarpoᴋ Nâlegaᴋ Nâlegaujoᴋ.

⁴⁵ Nâlekablo oᴋausingata tikipânga, oᴋarlune:

⁴⁶ Inûb erninga, kênait sâtiuk seᴋᴋinermut, oᴋausîllo kataktiuk seᴋinermut, naternablo ânêtub napârtoᴋotingit nelautaijutigikit;

⁴⁷ Napârtoliksuillo ânêtut oᴋautikit: Tusarsiuk Nâlekab oᴋausinga; Imâk oᴋarpoᴋ Nâlegaᴋ Nâlegaujoᴋ: Ahâk, ikomamik ikitsijomârpunga ilingne, napârtullo ômat ilûnaita, napârtullo pannait ilûnaita ilingnêtut nungutsomârpait: ikoma ikoâlajoᴋ ᴋamitaululângilaᴋ, kênallo ilûnatik ângat avunga tikidlugo tâpsomunga ôtaujomârput.

⁴⁸ Uvinilîllo ilûnatik takojuksaulârput uvanga Nâlegaᴋ ikilaurapko: ᴋaminiatsangilaralo.

⁴⁹ Uvangale oᴋarpunga: Ila, Nâlegaᴋ, imâk oᴋautigivânga; una adsiujutigut oᴋarpaktôlungilâᴋ?