Hesekiel 18 - Labrador Inuttitut Heritage Bible

¹ Nalekab oᴋausingata tikilerivânga, oᴋarlune:

² Suvisê oᴋausiovaktoᴋ imaitoᴋ atorapsiuk Israêlib nunangane, oᴋarluse: Atâtat paungatomavut vaineliksanik sênartunik, sorutsillo kigutingit kupserkolerpût?

³ Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, piviksaᴋarungnainiarpose oᴋausiovaktoᴋ tâmna atorlugo.

⁴ Ahâk, tarnit ilûnaita pigivakka; sorlo atâtab tarninga taimaktauᴋ ernerub tarninga pigivara; tarnelo idluitulijok toᴋojuksauvoᴋ.

⁵ Inugle idluartôgune, idluartuligune nâmaktulilunelo,

⁶ Kaᴋᴋane nerrilaungikune, ijinelo arlortingikunigik Israêlib ᴋitorngangita gudingoanginut, inôᴋatimelo nulianga ivsornartilaungikuniuk, arnarlo tutilaungikuniuk auᴋarningane;

⁷ Oᴋumaiksartitsingikune kinamik, satoraksaᴋ utertikuniuk akkiliksaᴋarvigijiminut, aksorornermut aᴋsârningikune, kâktoᴋ aitoruniuk nerᴋiksaminik ussingajorlo annorârtikuniuk;

⁸ Akkiliumik tapiksaᴋarᴋojingitoᴋ, attartortautitame unorᴋijanginik akkilêᴋojingitoᴋ, aggangminik issaktailijoᴋ idluitulinermut, nelâgôrtomik idluarsaijoᴋ inuit akorngane,

⁹ Maligaksauᴋojamne arvertartoᴋ, nâlektorlo perᴋojamnik nelâgôrtomik piniarlune, tâmna idluartôvoᴋ, tâmna inôjuksauvoᴋ, oᴋarpoᴋ Nâlegaᴋ Nâlegaujoᴋ.

¹⁰ Tâmnale ernitârune arᴋtaijomik, aungmik kovisijomik, tamakkoalônêt ilanganik piniartomik,

¹¹ Piniaraksallônêt ilanginik piniartailitsijomik, ᴋaᴋᴋanele nerrivaᴋtomik, inôᴋatimelo nulianganik ivsornartitsijomik,

¹² Aklujuniglo ajoᴋsartuniglo idluituliviᴋartomik, aksorornermut arᴋtaijomik, satoraksamik utertitsingitomik, ijiminiglo arlortitsijomik gudingoanut, maᴋojungnartulijomik,

¹³ Akkiliumiglo tapiksaᴋarᴋojijomik attartortautitame unorᴋijanginik akkilêᴋojijomik: taimaitoᴋ inôjuksauvâ? Inôjuksaungilaᴋ: maᴋojungnartut tamakkoa tamaita piniarnerivait: toᴋojuksauvoᴋ; aunga tâpsomanêtuksauvoᴋ.

¹⁴ Imâgle, ernermik ernitârune takojomik atâtame idluitulininginik tamainik, uloreasuklunelo taimailiortailititsijomik,

¹⁵ Kaᴋᴋane nerringikune, ijingminiglo arlortitsingikune Israêlib ᴋitorngangita gudingoanginut, inôᴋatimelo nulianganik ivsornartitsingikune,

¹⁶ Kinamik idluituliviᴋalaungikune, satoraksamik tigusingikune aksorornermut arᴋtaingikune, kâktullo tunitjivigigunigit nerᴋiksaminik, ussingajorlo ulikuniuk annorâmut,

¹⁷ Aggane aktuitailitikunigit aklujomik, tapiksamik attausermiglônêt tigusingikune, perᴋojamnigle piniarune maligaksauᴋojamnelo arvertarune; tâmna toᴋojuksaungilaᴋ atâtame idluituliningit pivlugit, inôjuksauvorle.

¹⁸ Atâtangale, nâpkiningneᴋarane oᴋumaiksartitsigame, ᴋatangutinelo arᴋtaramiuk, idlualungitomiglo piniarame inôᴋatime akorngane, ahâk, tâmna toᴋojuksauvoᴋ idluitulinine pivlugit.

¹⁹ Oᴋasôngovosele: Suna pivlugo ernerub atâtame idluituliningit nangmalungilagît? Erneᴋ perᴋojat maliklugit idluartomiglo piniarune, perᴋojakkalo nâlegunigit piniarlugillo, inôjuksauvoᴋ.

²⁰ Tarne idluitulijoᴋ toᴋojuksauvoᴋ: ernerub atâtame idluituliningit nangmaraksaringilait, atâtablônêt ernerub idluituliningit nangmaraksaringinivait; idluartûb idluarninga tâpsomanêtuksauvoᴋ, idluitulijûblo idluininga tâpsomanêtuksauvoᴋ.

²¹ Idluitulijorle sâgiarune idluitulinerijaminit tamainit piniarnerijaminit, maligaksauᴋojakkalo malikunigit, perᴋojallo maliklugit idluartomiglo piniarune, inôjuksauvoᴋ, toᴋojuksaungilarlo.

²² Tapanerijanginit piniarnerilauᴋtanginit tamainit issumagijungnaiviojuksauvoᴋ: idluartulinine pivlugo inôjuksauvoᴋ.

²³ Kuviasûteᴋarᴋêk idluitulijûb toᴋunganîk? oᴋarpoᴋ Nâlegaᴋ Nâlegaujoᴋ: ᴋuviagilualungilarâ sâgiarpat apᴋotiminit inôvlunelô?

²⁴ Idluartûble idluartulinine tunupago, idluitulilunelo, piniarlunelo maᴋojungnartunik tamainik idluitulijûb piniarningit maliklugit, inôjuksauvâ? Piniarningita idluartut neliarlônêt erᴋaumajauniangilaᴋ: tapanerijamine idluitulinerijaminelo piniartamine, tâpkonane toᴋojuksauvoᴋ.

²⁵ Oᴋarposele: Nâlekab apᴋotinga sangungavoᴋ. Nâlagitse, ilipse Israêlib ᴋitorngangit: Apᴋotiga sangungavâ? Apᴋotise niungalungilât?

²⁶ Idluartûb idluartulinine tunupago idluitulilunelo, toᴋovlunelo taimainermine, tagva toᴋovoᴋ idluitulinermine piniarnerijamine.

²⁷ Taimaktauᴋ idluitulijûb idluitulinerminik piniartaminik tunuikpat, piniarlunelo perᴋojat maliklugit idluartomiglo, tagva tarnine piulivâ.

²⁸ Issumaksarsiorame, tapanerijanelo piniarnerijane tamaita tunugamigit, inôjuksauvoᴋ ila, toᴋojuksaungilarlo.

²⁹ Sullele Israêlib ᴋitorngangit oᴋarput: Nâlekab apᴋotinga sangungavoᴋ. Ilipse Israêlib ᴋitorngangit, apᴋutikka sangungavât? Apᴋotise niungalungilât?

³⁰ Tamanna pivlugo erᴋartoromavapse, ilipse Israêlib ᴋitorngangit, atunit apᴋutine maliklugit, oᴋarpoᴋ Nâlegaᴋ Nâlegaujoᴋ. Sâgiaritse, tapanerilauᴋtaselo tamaita tunusigik, idluitulineᴋ piniartauᴋonago ilipsingnut.

³¹ Tapanise tamaita tapanerimajase iperarsigik, ômatetâritselo anernetârluselo: sôᴋ toᴋojomavisê, ilipse Israêlib ᴋitorngangît?

³² Toᴋolertûb toᴋunga ᴋuviaginginapko, oᴋarpoᴋ Nâlegaᴋ Nâlegaujoᴋ; taimaimat sâgiaritse inôᴋovluse.