Hesekiel 17 - Labrador Inuttitut Heritage Bible

¹ Nalekablo okausingata tikipânga, oᴋarlune:

² Inûb erninga, nelaupsaraksamik âᴋiksoigit, adsiujomiglo oᴋarit Israêlib ᴋitornganginut;

³ Oᴋarillo: Imâk oᴋarpoᴋ Nâlegaᴋ Nâlegaujoᴋ: Nektoraliksoaᴋ isaroᴋortôᴋ sulluᴋortôk merᴋoᴋadlartoᴋ taᴋsapatâlingnik tikipoᴋ Libanonemut, napârtublo sideremik taijab papia tigulugo;

⁴ Nuvungita nutât ᴋollerpângat navikpâ âlugolo nunamut niuverviktalingmut; ilivâlo iglugasaksoarnut niuvertetalingnut.

⁵ Ama nunab karngasutiksangita ilanganik tigusivoᴋ, ᴋarngasorlugolo perorsêvingmut ivjoriktomut; imaᴋatsiartub senianut ilivâ; ukpigaᴋtullo ilivâ.

⁶ Perorporlo vaineliksataliksangordlune siamangajoᴋ poᴋtoluganele; akkerungita sanguvigivât, amângillo atânêput: taimaglo vaineliksataliksangorpoᴋ, akkerotârlune milukatatârlunelo.

⁷ Ama nektoraliksoaᴋarivoᴋ tâpsoma assianik isaroᴋortojomik merᴋoᴋadlartomik: ahâglo, vaineliksataliub amâne sangutipait tâpsomunga, akkerunelo avalaktipait tâpsomunga, tâmna koveraiᴋovlugo tâpsominga perorsêvingata kogârsunginit.

⁸ Ilijaulauᴋpoᴋ ivjoriktomut imatsiartub seniane, akkerotârᴋovlugo paungatârᴋovlugo vaineliksatalitsiangorᴋovlugo.

⁹ Oᴋarit: Imâk oᴋarpoᴋ Nâlegaᴋ Nâlegaujoᴋ: Perutsialârᴋâ? Tâpsoma nussungniangilagît amângit, paungangillo kiblorlugit, ᴋunolerᴋovlugo, milukatangit nutaijortut ᴋunolerᴋovlugit; pitsartujoᴋangikaloartilugo inugiartoᴋsoaᴋangikaloartilugolo nussuksijuksanik tâpsoma amânginîk?

¹⁰ Ila, omat, ilijaugaloardlune perolârᴋâ? Kunoleromângilâᴋ aktortaugune nigermût? Kunolilârpoᴋ perorsêvingme perorvigijamine.

¹¹ Sullelo Nâlekab oᴋausingata tikipânga, oᴋarlune:

¹² Oᴋarit mâna ᴋitorngarêngnut tapatojunut: Kaujimangilasê ᴋanoᴋ tamakkoa tukkeᴋarmangâtâ? Oᴋautikit: ahâk, Babilonib ataninga tikilauᴋpoᴋ Jerusalemut, tâpsomalo ataninga angajoᴋângillo tigulugit Babilonemut aularutivait nangminerminut;

¹³ Ataniublo kinguvângita ilangat tiguvâ angiᴋatigilugolo; angermariktipâlo, erᴋanartulle nuname aularutivait;

¹⁴ Ataniovik erᴋanangitôᴋovlugo makitalerᴋonagolo, angiᴋatigêngneruble tapagijautailigianganut attaluarᴋovlugo.

¹⁵ Kissianele tâpsoma tapagivâ, aᴋpârtunik tiliklerame Egiptenemut, tâpkonunga tunitjiviojomavlune horsenik inugasaksoarniglo. Piluangolârkâ? Taimailiortoᴋ pijautaililârkâ? Angiᴋatigêngneᴋ serᴋomilârᴋaûk pijautaililunelô?

¹⁶ Naggolauᴋpoᴋ ataniub, tâpsominga ataningortitsijub, oᴋamaringninganik, serᴋomitsilauᴋpoᴋ ataniub tâpsoma angiᴋatigêngneliarijanganik, sorlole mikseᴋârtomik inôgama, oᴋarpoᴋ Nâlegaᴋ Nâlegaujoᴋ, nuname ataniub tâpsoma najugâne, tagva Babiloneme, toᴋojuksauvoᴋ.

¹⁷ Faraoblo sorᴋsuktuksaᴋsoaᴋotine inugasaksoaᴋotinelo ilagilugit ilalioromângilâ unatarnerme, taluksoaliorpatta avaloᴋsoaliorpattalo inuit unuktut toᴋojomavlugit.

¹⁸ Angermaringneᴋ naggogilaungmago angiᴋatigêngneᴋ serᴋomingmago; ahâk, aggane tunilauᴋpait (angiᴋatigêngnerme), taimailioraloaramelo tamakkoa tamaita piniarnerivait; pijaunginiangilarlo.

¹⁹ Taimaimat Nâlegaᴋ Nâlegaujoᴋ oᴋarpoᴋ imâk: Sorlo mikseᴋârtomik inôgama, angermaringnera tâpsoma naggogijanga, angiᴋatigêngneralo tâpsoma serᴋomitanga tikiutijomavara tâpsoma niaᴋunganut.

²⁰ Nuluakkalo issipteromavakka tâpsomunga, nigamnullo nigartitaujomârpoᴋ, tikiutijomavaralo Babilonemut, tagvanelo erᴋartoromavara uvamnut idluitulinerijangit pivlugit.

²¹ Kemâᴋatingillo ilûnatik siamangajut ilûnâne saviksoarmut oggotitaujomârput, amiakôjullo siamartitaulârput annorenut tamainut: ᴋaujijuksaulârposelo uvanga Nâlegaujunga oᴋautigilaurapko.

²² Imâk oᴋarpoᴋ Nâlegaᴋ Nâlegaujoᴋ: Sîderib poᴋtojub pappinganik tigusijomavunga, ilijomavlugolo; akkeroarsunginit poᴋtonerpânit nutaijortomik naviksijomavunga, ᴋaᴋᴋamullo poᴋtojomut nuitajomut ilijomavara;

²³ Israêlib ᴋaᴋᴋangita poᴋtonerpânganut ilijomavara; akkerotârlunelo paungatâlârpoᴋ, napârtutsiangolârporlo Sîdereojoᴋ; atânelo tingmiat sunatuinait, sunatuinarnik isarolit, ineᴋalârput; akkerungita allipângine iniᴋalârput.

²⁴ Napârtullo naternamêtut ilûnatik ᴋaujijuksaulârput uvanga Nâlegaujunga napârtoᴋ poᴋtojoᴋ pokkilerapko, napârtoᴋ pokitoᴋ poᴋtosigapko, napârtoᴋ ômaᴋ pannertigapko, napârtorlo pannaᴋ ômartigapko. Uvanga Nâlegaᴋ oᴋauserivara piniarlugolo.