Hesekiel 14 - Labrador Inuttitut Heritage Bible

¹ Israeliblo angajoᴋângita ilangita tikipânga, ingilutiglo sâmne.

² Nâlekablo oᴋausingata tikipânga, oᴋarlune:

³ Inûb erninga, angutit ukkoa gudingoaliarijatik ᴋagvartisimavait ômatimingne, idluitulinermiglo nâkliutiviksanganik pititsivut kênangita sânginut; tâpkonunga sumiglônêt aperijaujuksauvêk?

⁴ Tamanna pivlugo oᴋarvigikit, oᴋautilugillo: Imâk oᴋarpoᴋ Nâlegaᴋ Nâlegaujoᴋ: Inuk neliarlônêt Israêlib ᴋitornganginit ᴋagvartitsijoᴋ gudingoaminik ômatiminut, idluitulinimelo nâkliutiviksanganik pititsijok kênangata sânganut, aijorlo nelautaijomut; uvanga Nâlegaujunga kiojomavara tamanna pitjutigivlugo, gudingoarme unurningit maliklugit;

⁵ Nappersiᴋovlunga Israêlib ᴋitorngangita ômatinginik, ilûnatik avilaungmatta uvamnit gudingoaliarijatik pivlugit.

⁶ Taimaimat Israêlib ᴋitorngangit oᴋautikit: Imâk oᴋarpoᴋ Nâlegaᴋ Nâlegaujoᴋ: Uteritse, allaivluselo gudingoapsingnik, kênaselo sangutisigik maᴋojungnartulinipsingnit tamainit.

⁷ Israêlib ᴋitorngangita neliarlônêt, takorngartarlônêt nunaᴋartoᴋ Israêleme, avitoᴋ nangminerminik uvamnit, ᴋagvartitsilunelo gudingoaminik ômatiminut, idluitulinimelo nâkliutiviksanganik pititsijoᴋ kênangata sânganut, tikitorlo nelautaijomut aperijomavlugo pivlunga: uvanga Nâlegaujunga nangmineᴋ kiojomavara:

⁸ Kênaralo inungmut tâpsomunga sangmititsomavara, tataminiarutiksangortitsomavaralo, nelunaikutiksauᴋovlugo oᴋausiovaktôᴋovlugolo, inuᴋotimalo akornganit kipijomavara; ᴋaujijuksaulârposelo uvanga Nâlegaugama.

⁹ Nelautaijorlo uivêrijaulerpat oᴋautsimiglo oᴋarune, tagva uvanga Nâlegaᴋ nelautaijoᴋ tâmna uivêrilaukpara, aggakkalo issagomavakka tâpsomunga, pêjaromavaralo inuᴋotima Israêlitit akornganit.

¹⁰ Ilûnatik nangmartuksauvut idluitulinermingnik: nelautaijub idluitulininga taimailingaluatsialârpoᴋ sorlo tâpsominga aperijartortûb idluitulininga ingmat;

¹¹ Israêlib ᴋitorngangit tamarungnaiᴋovlugit uvamnit, ivsornartitsijungnaiᴋovlugillo nangminermingnik idluitulinermingnut tamainut; inuᴋutaujungnarᴋovlugille uvamnut, uvangalo Gudeojungnarᴋovlunga tâpkonunga, oᴋarpoᴋ Nâlegaᴋ Nâlegaujoᴋ.

¹² Nâlekablo okausingita tikipânga, oᴋarlune:

¹³ Inûb erninga, nunab idluitulivigikpanga, sôngojomik tapalune, uvangalo aggakka issagupkit tâpsomunga, nerᴋiksangillo ᴋematuliutaumajut asserorlugit, kângnerlo tiligupko tâpsomunga, kipilugillo inuillo nergjutillo tagvangat:

¹⁴ Angutit ukkua pingasut, Noa, Danielelo, Hiobelo tagvanênajaraloarunik, tâpkoa tarnitik kisseta piulinajarpait idluarnermingnut, oᴋarpoᴋ Nâlegaᴋ Nâlegaujoᴋ.

¹⁵ Omajullônêt erᴋsinartut ingerarᴋonajarupkit nunakut, asseroiᴋovlugit tâpsominga ᴋemaktauᴋovlugo, apᴋusârtauᴋonago kimut ômajoaluit pitjutigivlugit;

¹⁶ Angutit ukkua pingasut tagvanêgaloarunik, sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, ernitiglônêt panitiglônêt piulinajangilait; tâpkoa nangmineᴋ kisseta piulijaunajarput, nunale inuêrutjaunajarpoᴋ.

¹⁷ Saviksoarlônêt tikiutinajarupko nunamut tâpsomunga, oᴋarlungalo: Saviksoaᴋ, nuna ingerarvigiuk; kipisiᴋovlunga inungnik nergjutiniglo tagvangat;

¹⁸ Angutit ukkua pingasut tagvanêgaloarunik, sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, ernitiglônêt panitiglônêt piulinajangilait; tâpkoa nangmineᴋ kisseta piulijaunajarput.

¹⁹ Nûsilingnartorlônêt tilinajarupᴋo nunamut tâpsomunga, ningaumajârneralo kovilugo tâpsomunga aukkut, inuit nergjutillo pêjarlugit tagvangat;

²⁰ Noalo, Danielelo, Hiobelo tagvanênajaraloarunik, sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, ernermiglônêt paningmiglônêt piuliklerajangilat; tarnitigle kisseta piulinajarpait idluarnermingnut.

²¹ Imâk oᴋarmat Nâlegaᴋ Nâlegaujoᴋ: Kanoᴋ anginersautigilârᴋât akkiniarutikka sugaluluartut sittamat tiligupkit Jerusalemut: saviksoaᴋ, kângnerlo, ômajullo erᴋsinartut, nûsilingnartorlo, pêjaiᴋovlugit inungnik nergjutiniglo tagvangât?

²² Sullele, ahâk, amiakoᴋartuksaulârpoᴋ anigoijunik ᴋemâjomârtunik, ernerniglo, paningniglo; ahâk, tikitsomârput ilipsingnut, takolârposelo ilinganinginik piniarninginiglo: manigortaulârposelo idluitoᴋ Jerusalemut tikiutijara pivlugo, tamaita tâpsomunga tikiutijakka pivlugit.

²³ Tâpkoalo manigortaujutigilârpase takogupse ilinganinginik piniarninginiglo; ᴋaujilârposelo pitjuteᴋarnanga pinialaunginama tamainik piniarnerijamnik tagvane, oᴋarpoᴋ Nâlegaᴋ Nâlegaujoᴋ.