Hesekiel 13 - Labrador Inuttitut Heritage Bible

¹ Nalekablo oᴋausinga tikipânga, oᴋarlune:

² Inûb erninga, nelautaijut Israêleme nelautaivaktut nelautaivigikit, issumamingniglo nelautaivaktut oᴋautikit; Nâlekab oᴋausinga tusarsiuk;

³ Imâk oᴋarpoᴋ Nâlegaᴋ Nâlegaujoᴋ: Kapianarmêk nelautaijut silaidlartut, issumatuinamingnik oᴋartut, nelautainigârlutik.

⁴ Israêle, nelautaijoᴋotitit terrianiat inuᴋajuitomêtut adsigivait.

⁵ Aitanganernut ailungilat, avaluliolungilallônêt Israêlib ᴋitorngangita piksanganik, nangerungnarᴋovlugit sorᴋsungnerme Nâlekab uvlungane.

⁶ Uivêrinartunik takovut, saglovlutiglo nelautaivut, oᴋarlutik: Nâlegaᴋ oᴋarpoᴋ; tilijaunatiglo Nâlekamut: inuillo okpertipait oᴋausingit nelautsititaulârmatta.

⁷ Takolaungilasêle takotitjumik uivêrinartomîk? Oᴋalungilasêlo nelautainernik saglojunik, oᴋarapse: Nâlegaᴋ oᴋarpoᴋ, uvanga oᴋarsimatinangâ?

⁸ Taimaimat imâk oᴋarpoᴋ Nâlegaᴋ Nâlegaujoᴋ: Uivêrinartunik oᴋarapse, saglonerniglo nelautaigapse, tamanna pivlugo suadlaromârpapse oᴋarpoᴋ Nâlegaᴋ Nâlegaujoᴋ.

⁹ Aggamnullo tiglulârpakka nelautaijut uivêrinartunik oᴋâlajut saglonerniglo nelautaijut; inuᴋotikka ᴋaggimiolerpatta najûtijuksaungilat, aglaktaujuksaungilallônêt Israêlib ᴋitorngangita aglaksimaviane, aijuksaungilallônêt Israêlib nunanganut; ᴋaujijuksauvoselo uvangaugama Nâlegaᴋ Nâlegaujoᴋ.

¹⁰ Imaitoᴋ pivlugo, ila, imaitoᴋ pivlugo, inuᴋotikka tamartingmagit oᴋarlutik: Ulapirᴋsaumik, ulapirᴋsauteᴋartinago. Sorlo ᴋarmaliortoᴋarpat, ahâglo, nippitipât maggamut ᴋoajuitoᴋangitomut.

¹¹ Tâpkoa maggamut ᴋoajuitoᴋangitomut nippititsijut oᴋautikit oggolârmat: silaluksoalârpoᴋ suppujijomik; ilipselo nettaᴋonaᴋsoangojose katalârpose; aᴋᴋunaᴋsûblo tikigune serᴋomilârpâ.

¹² Takuitse, ᴋarmaᴋ oggosimakpat, oᴋarviginiangilâsê: Nauᴋ maggaᴋ nippijutigilauᴋtasê?

¹³ Taimaimat imâk oᴋarpoᴋ Nâlegaᴋ Nâlegaujoᴋ: Serᴋomitsomalârpara aᴋᴋunaᴋsoarmut ilungertornimne, silaluksoalârporlo suppujijomik ningaumavaksoadlarnimne, nettaᴋonaᴋsoalârporlo asseroijunik ᴋaningaumajârnimne.

¹⁴ Taimaglo ᴋarmaᴋ nippijuserlauᴋtase maggamut ᴋoajuitoᴋangitomut serᴋomitsomârpara, oggotilugo nunamut, tungavinga takuksauᴋovlugo: oggolârpoᴋ, ilipselo tagvane nungutaulârpose; tukkisijuksauvoselo uvanga Nâlegaugama.

¹⁵ Taimak ilungertornera nâmaksititsomavara ᴋarmarmut, tâpkonungalo maggarmut ᴋoajuitoᴋangitomut nippijusêlauᴋtunut tâpsominga; oᴋautitsomavapselo: ᴋarmaᴋ pijungnaipoᴋ, tâpkoalo nippijusêlauᴋtut tâpsominga.

¹⁶ Tamadja, Israêlib nelautaijungit nelautaijut Jerusalem pivlugo, takojullo takotitjutinik ulapirᴋsarnartunik; ulapirᴋsauteᴋangilarle, oᴋarpoᴋ Nâlegaᴋ Nâlegaujoᴋ.

¹⁷ Igvillo, inûb erninga, kênait sâtiuk inôᴋativit paninginut, ômatimingnit nelautaijunut, nelautaivigikillo,

¹⁸ Oᴋarlutit: Imâk oᴋarpoᴋ Nâlegaᴋ Nâlegaujoᴋ: Kapianarmêk arnat akkitinik merᴋsortut ikkusingnut tamainut, akkitiliortullo poᴋtoᴋatigêlungitunik niaᴋomingnut, tarninik nappersijomavlutik. Inuᴋotima tarningit napperomavisigîk, tarnillo perᴋutigijomajase inôᴋolugît?

¹⁹ Uvangalo naggonartungortipapsinga inuᴋotima akorngane senaugaksaᴋ tigumiaratuinaᴋ niaᴋôjallo serᴋomakut pivlugit, tarnit toᴋojuksaungitut toᴋotsomavlugit, tarnillo inôjuksaungitut inôᴋojomavlugit, saglokitsinipsingnut inuᴋotimnik, saglonernik tusaromajunik.

²⁰ Tamanna pivlugo imâk oᴋarpoᴋ Nâlegaᴋ Nâlegaujoᴋ: Ahâk, akkitise, napperniutigijase tarninik tingmiatitut, sâdlaromârpakka, tigukallagomavakka talipsingnit; tarnillo napperniarasuartase tingmiatitut aulartitsomavakka.

²¹ Akkitiliortaselo aliktoromagivakka, inuᴋotikkalo piulijomavakka aggapsingnit, napperniaraksaujungnairomârpullo aggapsingnut kingorngane; ᴋaujijuksaulârposelo uvanga Nâlegaugama.

²² Saglonernut idluartut ômatingit kiksartilungitakka kiksartigapsigik; idluitulijûblo aggangit pitsartutigapsigik, sangutailitilugo apᴋotiminit idluitomit, angervigigapsiuk inôtsemik;

²³ Taimaimat mattoma kingorngane takotitjutinik uivêrinartunik takojungnailârpose saglonerniglo nelautaijungnailuse: inuᴋotikkalo piulijomavakka aggapsingnit; ᴋaujijuksaulârposelo uvanga Nâlegaugama.