Hesekiel 12 - Labrador Inuttitut Heritage Bible

¹ Nalekab oᴋausingata tikilerivânga, oᴋarlune:

² Inûb erninga, tapatojoᴋsuit akorngane nunaᴋarpotit; tâpkoa ijeᴋaraloarput, tautulungilalle; siuteᴋarpullo, tusalungilalle; tapatojoᴋsôᴋatigêngogamik.

³ Taimaimat, igvit inûb erninga, perᴋutitit opalungaisarkit aulârnermut, uvlôtilugolo tâpkoa takonârtilugit aulârit; nunagijarnillo aulartuksauvotit nunagijavît assianut tâpkoa takonârtilugit; imaᴋa malugosulârput tapatojoᴋsôᴋatigêgamik.

⁴ Perᴋutitillo anititaksarivatit aulârtut perᴋutingititut uvlôtilugo tâpkoa takoane; takoanelo igvit nangmineᴋ anijuksauvotit unnutilugo, sorlo nûmariktut aulârpangmatta.

⁵ Karmaᴋ putoraksarivat tâpkoa takoane, tagvûnalo anititsilutit.

⁶ Tâpkoa takoane erᴋsugaksarivatit, tâᴋsilerpallo anititaksarivatit; kênait mattujaksarivat nuna takuksauᴋonago: nelunaikutangortigapkit Israêlib ᴋitorngarêngninginut.

⁷ Taimailiorpungalo sorlo perᴋojaugama; uvlôtilugo perᴋutikka anipakka nûgomajub perᴋutingititut, unnulermallo ᴋarmaᴋ puttovara aggamnut; tâᴋsilermalle anipakka erᴋsuklugillo tâpkoa takoane.

⁸ Uvlângolermallo Nâlekab oᴋausingata tikipânga, oᴋarlune:

⁹ Inûb erninga, Israêlib ᴋitorngangita tapatojoᴋsôᴋatigêt aperingilâtît: Sulerᴋêt?

¹⁰ Oᴋautisarkit: Imâk oᴋarpoᴋ Nâlegaᴋ Nâlegaujoᴋ: Oᴋumailutab tamattoma Jerusalemib angajoᴋângit Israêliblo ᴋitorngangit tâpkonanêtut tamaita nênilârpait.

¹¹ Oᴋarit: Nelunaikutauvunga ilipsingnut: sorlo uvanga piniarama, taimak piniarviolârivut: aularutijaulârput, kipalungortitauvlutiglo.

¹² Angajoᴋârlo tâpkonanêtoᴋ erᴋsuklune anijomârpoᴋ tâᴋsitilugo; ᴋarmarlo puttolârpât tagvûna anijomavlutik; kênane mattulârpâ, nunamik takojomanane ijiminut.

¹³ Nulluakkalo issivitsomârpakka tâpsomunga, nigamnullo nigartitaulârpoᴋ; tikiutijomârparalo Babilonemut, Kaldêarit nunanganut; takojomângilâlle, tagvane toᴋolâraloarame.

¹⁴ Ilûnaitalo tâpsoma najortingit ikajortingillo sorᴋsuktuksarsoangillo siamartitsomârpakka anorinut tamainut; kingornganelo saviksoarmut pijomârpakka.

¹⁵ Kaujijuksaulârpullo uvanga Nâlegaugama, ajaktorupkit inôᴋatigêksuit akornganut, siamartikupkillo nunanut.

¹⁶ Ikitunigle simnikoᴋartitsomârpakka saviksoarmit kangnartoᴋsoarmillo nûsilingnartomillo; inôᴋatigêksoarnut tikitamingnut unipkarungnarᴋovlugit maᴋojungnartulinerijamingnik tamainik; missigijuksauvullo uvanga Nâlegaugama.

¹⁷ Nâlekablo oᴋausingata tikilerivânga ama, oᴋarlune:

¹⁸ Inûb erninga, ôliklutit nerᴋiksat nerrijaksarivat, imiksallo imeraksarivat sajuklutit erᴋasuklutillo;

¹⁹ Nunablo inungit oᴋautikit: Imâk Nâlegaᴋ Nâlegaujoᴋ oᴋarpoᴋ Jerusalemiut Israêliblo nunanga pivlugit: Erᴋasuklutik nerᴋiksatik nerrilârpait, kapiasuklutiglo imiksatik imilârpait, nuna perᴋutairtaungmat perᴋutiminik tamainik, inuit tamaita tâpsomanêtut idluitulinersoangit pivlugit.

²⁰ Iglugasaksuillo inulit asserortaujomârput, nunalo ᴋemaktaujomârpoᴋ; ᴋaujijuksauvoselo uvanga Nâlegaugama.

²¹ Nâlekablo oᴋausingata tikipânga, oᴋarlune:

²² Inûb erninga, sunauvâ oᴋausiovaktoᴋ pigijase Israêlib nunangane, oᴋartoᴋ: Uvlut sivitovut, takotitjutillo ilûnatik sulilungilât?

²³ Taimaimat oᴋautikit: Imâk oᴋarpoᴋ Nâlegaᴋ Nâlegaujoᴋ: Oᴋausiovaktoᴋ tamanna sorairtitsomârpara, kingornganelo oᴋausiojungnailârpoᴋ Israêleme; oᴋautikille: Uvlut ᴋaglilerput, takotitjutillo ilûnatik oᴋausingit.

²⁴ Piungitunik takotitjuteᴋarungnairomârmat, uivêrinartuniglo nelautainerluktoᴋarungnailârmat Israêlib ᴋitorngangita akorngane.

²⁵ Uvanga Nâlegaugama; oᴋaromârpunga, oᴋauserlo oᴋauserijara nelautsilârpoᴋ, akunêromângilarlo: uvlupsingne, ilipse ᴋitorngaujose tapatojosôᴋatigêngojose, oᴋauseᴋ oᴋauserijomavara nelautsitilugolo, oᴋarpoᴋ Nâlegaᴋ Nâlegaujoᴋ.

²⁶ Amalo Nâlekab oᴋausingata tikipânga, oᴋarlune:

²⁷ Inûb erninga, ahâk, Israêlib ᴋitorngangit oᴋarput: Takotitjut takojanga uvlunut ᴋaijomârtunut ilingavoᴋ, neliunerillo ᴋanilungitut nelautaijutigivait.

²⁸ Tamanna pivlugo oᴋautikit: Oᴋausima neliallônêt akunêrtitauniangilaᴋ mânamit, oᴋauserle oᴋauserijara nelautsilârpoᴋ, oᴋarpoᴋ Nâlegaᴋ Nâlegaujoᴋ.