Hesekiel 11 - Labrador Inuttitut Heritage Bible

¹ Anernerublo uvanga ᴋangatarpânga âpângalo Nâlekab iglungata itertarvinganut taununga sângajomut; ahâglo, itertarviub upkoanganêput angutit 25; tâpkoalo ᴋerᴋane takovakka Jâsanîa, Azzurib erninga, Pelatialo, Benaiab erninga, angajoᴋaujuk inungne.

² Oᴋautivângalo: Inûb erninga, ukkoangovut angutit idluitulinermik erᴋarsartut atanertuiluktullo iglugasaksoarne ukkunane.

³ Oᴋartullo: Igloliorviksaᴋ neliutingilâᴋ? Iglugasaksuit makkoa ukkusiovut, uvagullo nerᴋêjauvogut.

⁴ Taimaimat nelautaivigikit, ila, nelautailerit, igvit inûb erninga.

⁵ Nâlekablo ânanauningata tupvigivânga, oᴋautivângalo: Oᴋarit: Imâk oᴋarpoᴋ Nâlegaᴋ: Taimak oᴋarsimavose, ilipse Israêlib ᴋitorngangit; anernipse issumangit ilitarigapkit.

⁶ Toᴋotase iglugasaksoarne ukkunane unuksitilauᴋpase, tataivoselo apᴋosineâlunginik toᴋotapsingnut.

⁷ Taimaimat imâk oᴋarpoᴋ Nâlegaᴋ Nâlegaujoᴋ: Toᴋotase ilijase iluanut, tâpkoa nerᴋêjauvut, iglugasaksuillo makkoa ukkusiovut; ilipsele anititaksauvose tagvangat.

⁸ Sivôralauᴋpose saviksoarmik: uvangalo saviksoaᴋ tikiutijomavara ilipsingnut, oᴋarpoᴋ Nâlegaᴋ Nâlegaujoᴋ.

⁹ Tagvangalle anititsomavapse, tuniluselo takorngartat agganginut, erᴋartorluselo pidlaromavapse.

¹⁰ Saviksoarmut oggotiluselo erᴋartoromârpapse Israêlib kiglingane: ᴋaujijuksauvoselo uvanga Nâlegaugama.

¹¹ Iglugasaksuit ukkua ukkusiojuksaungilat ilipsingnut, ilipselônêt nerᴋêjaujuksaungilase tâpkonane; erᴋartoromârpapse Israêlib kiglingane.

¹² Kaujijuksauvoselo uvanga Nâlegaugama: arvertalaunginapse perᴋojakka maliklugit, pinialaunginapselônêt idluarijamnik, pinialaurapsele inôᴋatigêksuit avatipsingnêtut nâmagijanginik.

¹³ Taimaglo nelautailertilunga, Pelatia, Benaiab erninga, toᴋovoᴋ. Pâmakterpunga tagva, nippeᴋortovlungalo ᴋaigarsukpunga: Kappê, Nâlegaᴋ Nâlegaujotit! Israêlib amiakungit nungumarigomavisigîk?

¹⁴ Nâlekablo oᴋausingata tikipânga, oᴋarlune:

¹⁵ Inûb erninga, ᴋatangutitit, ila, ᴋatangutitit ilagijavît angutingit, Israêliblo ᴋitorngangit ilûnatik, ila, ilûnamaritik, tâpkoangovut Jerusalemiut oᴋarvigijangit: Ungasidlaritse Nâlekamit; nuna tamanna uvaptingnut tunijaumangmat perᴋutauᴋovlugo;

¹⁶ Tamanna pivlugo oᴋarit: Imâk oᴋarpoᴋ Nâlegaᴋ Nâlegaujoᴋ: Kaningitomut nûlauraloarapse inôᴋatigêksuit akornganut, siamartilauraloarapselo nunanut, sulle katimaviksârsôjomavunga ilipsingnut nunane tikivigijapsingne.

¹⁷ Tamanna pivlugo oᴋarit: Imâk oᴋarpoᴋ Nâlegaᴋ Nâlegaujoᴋ: Inôᴋatigêksoarnit katersoromavapse, nunanillo siamartitauvigijapsingnit katersoromârpapse, tunitjivigijomavapselo Israêlib nunanganik.

¹⁸ Tikituksaulârpullo tagvunga, pêjalârpaillo maᴋojungnartut naggonartullo tamaita tagvangat.

¹⁹ Tunitjivigijomârpakkalo ômamik atausiojomik, anernermiglo nutâmik ilipsingnut pititsijomârpunga; ômallo ujaraᴋtun-itoᴋ uvininginit pêjaromârpara, tunitjivigilugillo ômamik uviniojomik;

²⁰ Arvertarᴋovlugit maligaksauᴋojamne, perᴋojakkalo nâleklugit piniarᴋovlugit: inuᴋutaujuksauvullo uvamnut, uvangalo Gudeojomavunga tâpkonunga.

²¹ Ipkoale arvertartut naggonartut maᴋojungnartullo ômatingita tussugijangit maliklugit, tâpkoa apᴋotingit tikiutijomavakka niaᴋunginut, oᴋarpoᴋ Nâlegaᴋ Nâlegaujoᴋ.

²² Tagva kerubit isarotik issivitipait, aksaloallo seninginêput; Israêliblo Gudingata ânanauningata ᴋolangiarpait.

²³ Nâlekablo ânanauninga ᴋongmuarpoᴋ iglugasaksuit ᴋerᴋânit, miporlo ᴋaᴋᴋame iglugasaksuit kitânêtome.

²⁴ Anernerublo ᴋangatartipânga, tikiutilungalo takotitjutikut Gudib Anerninganit pijokut Kaldêamut, aularutijaulauᴋtunut.

²⁵ Tagva aularutijaujut oᴋautivakka tamainik Nâlekab unertutigijanginik uvamnut.