Hesekiel 10 - Labrador Inuttitut Heritage Bible

¹ Takosarpungalo, ahâglo, aulangitome kerubit niaᴋungita ᴋolânêtome takuksaujoᴋarpoᴋ sorlo ujaraᴋ pivianartoᴋ ᴋeblâlâjoᴋ, ilutseᴋartoᴋ iksivautaᴋsoangojârtotut.

² Angullo imna, ᴋaᴋortamik annorâlik, oᴋautivâ: Iterit aksaloat aksakâdlartut akornganut, kerubib atânut, aggaktillo tatakit aumanik ikomalingnik kerubit akornganit, katararkillo iglugasaksoarnut. Iterporlo takonârtilunga.

³ Kerubille iniᴋarput iglub seniane talerpiane angut itermat; nuvujarlo tataivoᴋ avaluliorsimajomik ilulermik.

⁴ Nâlekablo ânanauninga ᴋangatarpoᴋ kerubimit, iglub sânganut nûlune; iglolo tatatauvoᴋ nuvujamut, avaluliorsimajorlo tatatauvoᴋ Nâlekab ânanauningata ᴋaumajoᴋsôninganut.

⁵ Kerubillo isarungita suluksungit tusaksauvut avaluliorsimajoᴋ silardleᴋ tikidlugo, sorlo Gudib ajugaᴋangitoᴋsôjub nippinga oᴋarmat.

⁶ Imaiporlo, angut imna, ᴋaᴋortamik annorâlik, perᴋongmago, oᴋautilugo: Tigusilerit ikomamik aksaloat aksakâdlartut akornganit, kerubit akornganit, iterpoᴋ tagva, nangerdlunelo aksaloat ilangata seniane.

⁷ Kerubelo issakpoᴋ kerubit akornganit ikomamut kerubit akornganêtomut, tigusilunelo tagvangat, tunilugolo angutib ᴋaᴋortamik annorâliub agganginut; tâpsomalo tiguvâ anilunelo.

⁸ Kerubinelo takuksaujoᴋarpoᴋ sorlo inûb agganginik isarungita atâne.

⁹ Takosarpungalo, ahâglo, aksaloat sittamat kerubit seningine, aksaloaᴋ atauseᴋ kerubiub atausiub seniane, aksaloarlo tâpsoma assia kerubiub tâpsoma asiata seniane; aksaloallo tautuᴋarput ujaraᴋtut pivianartotut Tarsisib ujarangatut.

¹⁰ Takonârlugillo tâpkoa sittamat ilutseᴋarput adsigêktomik, sorlo aksaloaᴋ aksaloab tâpsoma assiata iluane.

¹¹ Ingerarmatta, sângajamingnut sittamanut ingerarput; sangulungilat ingeraramik, niaᴋungitale takonârvinganut tagvunga ingerarput; sangulungilat ingeraramik.

¹² Timingillo ilûnatik, tunungillo, aggangillo, isarungillo, aksaloangillo tataput ijinik ilûnâne, aglât tâpkoa aksaloangit sittamat.

¹³ Aksaloangit taijauvut tusâtilunga: aksaloanik aksakâdlartunik.

¹⁴ Ilûnatiglo kênaᴋarput sittamanik: sivorleᴋ kerubib kênanga, aipâ inûb kênanga, pingajuak loevib kênanga, sittamangat nektoraliub kênanga.

¹⁵ Kerubillo ᴋangatarput: tamannauvoᴋ ômajoᴋ takolauᴋtara kôngme Kêbareme.

¹⁶ Kerubillo ingerarangata, aksaloat ingerarput seningine; kerubillo isarotik issivijarangamigit nunamit ᴋangataromavlutik, aksaloat sangungilat seninginit.

¹⁷ Tâpkoa noᴋarangata ukkoa noᴋarput; tâpkoalo ᴋangatarangata ukkoa ᴋangatarivut ilagilugit: anerneᴋ ômajutaujoᴋ tâpkonanêngmat.

¹⁸ Nâlekablo ânanauninga anivoᴋ iglub sânganit, noᴋarlunelo kerubit ᴋolâne.

¹⁹ Kerubillo isarotik issivipait, ᴋangatarlutiglo nunamit anigamik takonârtilunga, aksaloallo seninginêput; noᴋarpullo Nâlekab iglungata itertarvingata taununga sângajub upkoangane; Israêliblo Gudingata ânanauningata ᴋolangiarpait.

²⁰ Tamannauvoᴋ ômajoᴋ takolauᴋtara kôngme Kêbareme; ᴋaujivungalo kerubiongmatta.

²¹ Ilûnatik atunit kênaᴋarput sittamanik, ilûnatiglo isaroᴋarput sittamanik; isarungitalo atâne pitaᴋarput sorlo inûb aggangititut.

²² Kênangitalo tautungit tâpkoangovut kênat takolauᴋtakka kôngme Kêbareme, tautungillo ilutsingillo; ilûnatiglo sivumut ingerarput.