Hesekiel 1 - Labrador Inuttitut Heritage Bible

¹ Jarit 30ingita taᴋᴋingita sittamangita uvlungita tellimangane, aularutijaujut akornganêtilunga kôngme Kêbareme, ᴋilaᴋ angmarpoᴋ, takovungalo takotitjunik Gudemit pijunik.

² Taᴋᴋiub uvlungita tellimangane, tagva ataniub Jojakinib aularutijauningata jâringita tellimangane,

³ Nâlekab oᴋausinga tikipoᴋ Hesekielemut Busib erninganut ajoᴋertuijomut Kaldêamiut nunangane kôngme Kêbareme; tagvanelo Nâlekab aggangita ᴋolangiarpât.

⁴ Takosarpungalo, ahâglo, aᴋᴋunaᴋsoaᴋ sôngojoᴋ saᴋᴋerpoᴋ avangat, nuvujaᴋsôvlune, ikomaliksoaᴋ ingminut ᴋaivitsainartoᴋ ilagilugo, ᴋebleridlartoᴋ avatâne ilûnâne, ᴋerᴋânillo sorlo ᴋaᴋorleᴋ ᴋingarnartoᴋ ikomab ᴋerᴋânit.

⁵ Kerᴋânillo saᴋᴋertoᴋarpoᴋ sorlo ômajut sittamat. Imâglo tautuᴋarput: inôjârput.

⁶ Ilûnatiglo atunit kênaᴋarput sittamanik, ilûnatiglo atunit isaroᴋarput sittamanik.

⁷ Ittigangille nappaluarput; alungillo noggaub ittigangita alungititut iput: ᴋeblâlâvullo ᴋaᴋorlertut ᴋeblersarsimajotut.

⁸ Inûblo aggangititut aggaᴋarput isarungita atâne senerangine sittamane: ilûnatiglo atunit kênaᴋarlutiglo isaroᴋarput imailingajunik:

⁹ Isarungit ilûnatik ingmingnut aktoagutivut, pisugamiglo sangulungilat: ilûnatiglo pisugamik tukkimuatsiarput.

¹⁰ Kênangita adseᴋarningit pitjutigilugit, kênaᴋarput inûb kênangatut; ilûnatiglo sittamat loevib kênangatut kênaᴋarput talerpingine; ilûnatiglo sittamat kênaᴋarput tuktuvaub kênangatut saumingine; ilûnatiglo kênaᴋarivut nektoraliub kênangatut.

¹¹ Taimailingavut kênangit; isarungillo issivimavut ᴋongmut; isarûk maggûk ingmingnut aktoagutivuk; isarungnullo maggungnut ingmingnik ulikput.

¹² Ilûnatiglo ingerarlutik tukkimuatsiarput: anernerub aivigijomajanganut, tâpkoa aivut; ingeraramiglo sangulungilat.

¹³ Omajullo adseᴋarningit pitjutigilugit tautuᴋarput aumatitut ikoâlajutitut, nenergoat ikitaumajut tautungititut; tâpkoalo utitaᴋatarput ômajut akorngane: ikomalo ᴋaumadlarpoᴋ, ikomamillo ᴋaumalaᴋ anivoᴋ.

¹⁴ Omajullo pangalikput uterlutiglo ᴋaumalaktut.

¹⁵ Omajullo taimak takonârapkit, sunaubva aksaloaᴋ atauseᴋ nuname ômajut seniane, kênangine sitamane tamaine.

¹⁶ Aksaloat tâpkoa tautungit senajauningillo tautuᴋarput ujaraᴋtut pivianartotut Tarsisib ujarangatut: tâpkoalo sittamat adsigêkput: tautungillo senajauningillo ilingavut sorlo aksaloaᴋ aksaloab tâpsoma assiata iluane.

¹⁷ Ingeraramik sângajamingnut sittamanut ingergavut: sangulungilat ingeraramik.

¹⁸ Pergângit poᴋtovut erᴋsinarlutiglo; ilûnatiglo sittamat pergângit tatadlarput ijinik avatâne.

¹⁹ Omajullo ingerarmatta aksaloat ingerarivut seniane: ômajullo nunamit ᴋangatarmatta aksaloat ᴋangatarivut.

²⁰ Namullônêt anernerub aivigijariaᴋartanganut, tâpkoa aivut; tagvunga anerneᴋ aijariaᴋarmat: aksaloallo ᴋangatarput ilagilugit; anerneᴋ ômajutaujoᴋ aksaloanêngmat.

²¹ Tâpkoa ingerarmatta ukkoa ingerarivut; tâpkoalo noᴋangamatta ukkoa noᴋangagivut; tâpkoalo nunamit ᴋangatartitaungmatta, aksaloat ᴋangatarᴋataugivut; anerneᴋ ômajutaujoᴋ aksaloanêngmat.

²² Omajullo niaᴋungita ᴋolâne issivisimajôjârtoᴋarpoᴋ, sorlo aligoᴋ akkisuktoᴋ, issivisimajoᴋ niaᴋungita ᴋolâne.

²³ Issivisimajublo atâne isarungit isângavut tuglerêklutik: ilûnatiglo isaroᴋarput maggungnik timingita mattuksâgingnik senerangine omane, ilûnatiglo isaroᴋarput maggungnik timingita mattuksâgingnik senerangine igluane.

²⁴ Ingerarmattalo tusarpunga isarungita suluksungninginik sorlo imaᴋsuit imarpalungninginik, Ajugaᴋangitub nippingatut, perajaluktut pervalungningititut sorᴋsuktoᴋatigêksuit pervalungningititut: noᴋangamattalo isarungit imuvait.

²⁵ Nippeᴋarporlo issivisimajôjârtub niaᴋungita ᴋolânêtub ᴋolânit: noᴋangamattalo isarungit imuvait.

²⁶ Issivisimajôjârtublo niaᴋungita ᴋolânêtub ᴋolâne iksivautaᴋsoangojârtoᴋarpoᴋ, ujarᴋab Safiremik atteliub tautuatut: iksivautaᴋsoangojârtomelo iksivajoᴋarpoᴋ inôjârtomik.

²⁷ Takovungalo sorlo ᴋaᴋorliub ᴋebleridlarninganik, ikomaujârtublo ilumavâ iluanêtilugo okpatîkita saᴋᴋijarnîgingnit ᴋongmullo; okpatîkitalo saᴋᴋijarnîgingnit angmut, takovunga ikomaujârtomik, avatânelo ᴋaumajoᴋsoaᴋadlarpoᴋ.

²⁸ Ajagutab nuvujanêtub silalungnerub uvlungane tautuatut, taimak ᴋaumajoᴋsoaᴋ avatâne tautuᴋarpoᴋ. Tamanna tagva Nâlekab ânanauningata adsingata tautua. Takogapkolo pâmangalerpunga, tusarpungalo oᴋartub nippinganik.