Haggai 1 - Labrador Inuttitut Heritage Bible

¹ Ataniup Dariusip jâringita aippangani taᴋᴋit 6ingita uvlungita sivorlerpângani, Nâlekab oᴋausinga tikipoᴋ nalauttaijokkut Haggaikut Serûbabelemut, Sealtialip erninganut, angajoᴋâᴋsoangojomut Jûdame, Josuamullo, Jehôsadap erninganut, ajoᴋittuijisoarmut, oᴋarluni:

² Imâk oᴋarpoᴋ Nâlegaᴋ Zebaot: Inuit ukkoa oᴋarput: Nâlekab igluksangata igloliorviksanga nilliutisimangilak sulle.

³ Nâlekablo oᴋausinga tikipoᴋ nallauttaijokut Haggaikut oᴋarlune:

⁴ Ilipsingnut nalliutisimavâ iglupsingne ilupâᴋsimajune ineᴋarviksase, iglo una asserorsimaningortilugô?

⁵ Taimaimmat imâk oᴋarpoᴋ Nâlegaᴋ Zebaot: Apᴋutisi issumagiummijâsigik.

⁶ Unuktunik karngasoivosi, ikittunigli itârᴋaivosi; nerrivose, nâmaksilungilasili; imerposi, imerugungnailungilasele; annorârposi, ᴋiujajungnailungilasili; akkiliutiksarsijûblo akkiliutiksane pôᴋpait pôrmut killalingmut.

⁷ Imâᴋ oᴋarpoᴋ Nâlegaᴋ Zebaot: Apᴋutisi issumagiumijârsigik.

⁸ Kakᴋalialusi, ᴋijungnik aikleritsi, iglomiglo iglolioritse; ᴋuviagilârpara tagva opinatsijomârpungalo, oᴋarpoᴋ Nâlegaᴋ.

⁹ Angijunik ᴋinilauᴋposi, sunaubvalo ikitlivut; angirautigapsigiglo supôrpakka. Sôᴋ? oᴋarpoᴋ Nâlegaᴋ Zebaot. Igluga asirorsimaningortoᴋ pivlugo, ilipsilo ilûnnasi igloᴋotipsingnut aᴋpangittilusi.

¹⁰ Tamanna pivlugo ᴋilak mitsuksoaᴋartailititauvoᴋ, nunalo saᴋᴋêtailivoᴋ paungaminik.

¹¹ Ipterilingnerlo ᴋaikᴋolauᴋpara nunamut ᴋakᴋanullo, senaugaksanullo, vainiksanullo, orᴋsuksanullo, nunablo saᴋᴋititanginut, inungnullo, nergjutinullo, aggaillo suliarijanginut tamainut.

¹² Tagva Serûbabelib, Sealtialib erningata, Josuablo, Jehôsadab erningata, ajoᴋertuijersûb, inuillo amiakungita ilûnatik nâlekpait Nâlekab Gudimik nippinga, nalauttaijûblo Haggaip oᴋausingit, Nâlekab Gudingata tâmna tililaungmago; inuillo Nâlegaᴋ sivôragivât.

¹³ Tagva Haggaib Nâlekab aᴋpârtitangata Nâlekab aᴋpautaukᴋojanga oᴋautigivâ inungnut, oᴋarluni: Ilagivapsi, oᴋarpoᴋ Nâlegaᴋ.

¹⁴ Nâlekablo Serûbabelib, Sealtialib erningata, angajoᴋâᴋsoangojûp Jûdami, aninninga, Josuablo, Jehôsadab erningata, ajoᴋertuijitsûb, aninninga, inuillo amiakungita ilûnatik aninningit, tupaktipait; tikipullo Nâlekab Zebaotib Gudimik igluksanga suliariniappât;

¹⁵ Ataniup Dariusib jâringita aippangata taᴋᴋingita 6ingata uvlungita 24ingani.