Habakûb 3 - Labrador Inuttitut Heritage Bible

¹ Nelautaijub Habakûb tuksiarutâ, ogguarutsit erinanganut ilijaᴋ.

² Nâlegaᴋ, oᴋautaunît tusarpara, erᴋsivungalo; Nâlegaᴋ suliaksat ômartilaungmiuk jârit ᴋerᴋane; nelonaijaruk jârit ᴋerᴋane; ningarnermelo nâpkiningneᴋ erᴋaumalauruk.

³ Gûde tikipoᴋ Têmanemit, ivsornaitorlo Pâranib ᴋaᴋanganit. (Sela.) Ânanauningata ᴋilait ulikpait, nunalo nâmavoᴋ nertornautinganik.

⁴ Âkᴋisungningalo ᴋaumanertun-ipoᴋ; issagutâᴋarpoᴋ agganginit anijunik; tâpkonanelo pitsartuninga ijersimavoᴋ.

⁵ Nusilingnartoᴋ ingergavoᴋ sivorngane, aumallo anivut itigangita atânit.

⁶ Nangilauᴋpoᴋ nunaᴋsoarlo ôktorpa; taᴋosarpoᴋ, inôᴋatigêksuillo siamartipait; ᴋaᴋaksuillo isoᴋangitomit isoᴋangitomut pijut serᴋalijauvut, ᴋaᴋallo nungusuitut okᴋovut; tâpsoma apᴋotingit soᴋosijuitôvut.

⁷ Tupit Kûsanemêtut kapiasudlarlutik takolauᴋpakka; ᴋalerᴋat nuname Midianemêtut sajukpilâdlarput.

⁸ Nâlekab kôksuit nakêlijutigilauᴋagît? Ningarnivît kôksuit pilauᴋagît, ningaumajârnivîllônêt imarbingmut tôᴋᴋâ, horseᴋotingne ikimavlutit ingeraravit, ᴋamutîngne piuliklerutinê?

⁹ Pitiksît ulêrmarilauᴋpoᴋ; angernerijatit inôᴋatigêksoarnut tunganarput. (Sela.) Kôksoarnut nuna ᴋoplolaukpat.

¹⁰ Takolutit ᴋaᴋaksuit ôlikput; imersuit iktulijartut ᴋângerput: itinersûb nipinne anivâ, agganelo ᴋongmuartipait.

¹¹ Seᴋineᴋ takᴋerlo noᴋangalauᴋpuk inîngmingne, ᴋargjuvît ingergajut ᴋaumaningat pivlugo, ᴋalugiavît ᴋebleridlartûb ᴋebleridlarninga pivlugo.

¹² Iluluklutit nuna ingerarvigilauᴋpat, ningadlarlutillo inôᴋatigêksuit annaulauᴋpatit.

¹³ Anivotit inûᴋotitit piulijomavlugit, mingoartavît piulijauniksanganut; idluitûb iglungane niaᴋôjoᴋ nakalauᴋpat, tungavinga saᴋᴋijârtilugo ᴋongaseᴋ tikidlugo aglât. (Sela.)

¹⁴ Sorᴋsuktuksangita niaᴋorijangat putolauᴋpât ᴋalugiaminut; tâpkoa ulajujaᴋsoatut tikilauᴋput siamartitsomavlunga; ᴋuviasûtigilauᴋpâllo aklujut nerrijomavlugit, angijivlutik.

¹⁵ Imarbik tullerajâlauᴋpat horseᴋotingnut, imaᴋsuit pitsartujut malliksoangit.

¹⁶ Tusarapko iluga aulavoᴋ, ᴋangasinâka sajukpûk nipe pivlugo; auneᴋ iterpoᴋ saunimnut, sajudlarpungalo inimne; merngoêrserviksarsilangatôᴋ uvlorme kapianartovingme, katingajoᴋsôvlutik opagiartortut majorarpatta inuit sorᴋsugomavlugit.

¹⁷ Napârtoᴋ paungatannaᴋut nuvugulâᴋtâlungikaloarpat, vaineliksataliglo paungatâlungipat, orᴋsuliub napârtunga sulijungnaigaloarpat, perorsêvillo nerᴋiksanik sakᴋêlungipatta, saukat ungalulingmit nungugaloarpatta, nergjuteᴋaullo nergjutetaᴋangipat;

¹⁸ Sule Nâlegaᴋ ᴋuviagijomavara, Gûdelo piulijiga serrijûtigijomavlugo.

¹⁹ Jehôva Nâlegaujoᴋ pitsartutigivara, tâpsomalo itigakka tuktûb itigangititut îtipait, arvertartiniarpângalo poᴋtojoᴋotimne. Imgitit angajoᴋânganut, noᴋaᴋseraliᴋotimne.