Habakûb 2 - Labrador Inuttitut Heritage Bible

¹ Nangeromavunga udjertorᴋojauvimne, ungalujijoᴋsoarmêtuaromavlungalo, kamatsiaromavungalo missigijomavlunga ᴋanoᴋ oᴋâlalârmangât ilumne, sumiglo kiojuksaumangârma ârusungnera pivlugo.

² Nâlekablo kiovânga, oᴋarlunelo: Takotitjut aglaguk, aglagviglo takuksautsiartiuk, atuarsijoᴋ tâpsominga aᴋpasugungnarᴋovlugo.

³ Takotitjutib neliuniksane tikitsiaringmago, naggatiksamullo aisâdlarpoᴋ sagloniangilarlo; muludlaraloarpat utaᴋituinaruk; neliutidlalârmat, nelautsinginiangilarlo.

⁴ Ahâk, tarninga pingijaidlarpoᴋ, nelâgôrlungilaᴋ iluane; idluartûble okpernine inôtiginiarpâ.

⁵ Ilâ, vaine uivêrijaunarpoᴋ, piojorititsilune inungmik, angergarme ᴋikarviᴋartailititsilune; pijomatudlarninga nerrototipâ toᴋungajut iningatut ilingatilugo, toᴋotut silititaujungnangilaᴋ, inôᴋatigêksuille tamaita ingminut katersorpait, inuillo tamaita ingminut pitipait.

⁶ Tâpkoa ilûnnatik adsiujomik atorniangilât tâmna pivlugo, oᴋausiovaktomiglo mitauteᴋartomik tâmna pivlugo, oᴋarlutik: Kapianarmêk pigingitaminik piᴋangârniartoᴋ! ᴋanoᴋ sivitutigijomîk? Kalerêktitsijorlo satoraksanik ingminut.

⁷ Tagvainârlutik makitsomângilât ilingnik kêsijuksat, tupaklutiglo ilingnik nakêlititsijuksat, igvillo aᴋsârnigaujomarpotit tâpkonungâ?

⁸ Asseroilauravit inôᴋatigêksoarnik unuktunik, inuit amiakungita ilûnnatik asseroromârpâtit, inuit aungit pivlugit, idluitulinerillo pivlugit piniarutaujut nunamut, iglugasaksoarnullo, tagvanelo igloᴋartunut tamainut.

⁹ Kapianarmêk idluitomik piksarsiortoᴋ inûᴋotiminut, ublolioromavlune poᴋtojome, piulijaujomavlune idluitûb agganginit.

¹⁰ Inûᴋotivît kangusûtigijaksanganik atuinaruterivotit, inôᴋatigêt unuktut kipigangne, tarnîllo idluitulivigivat.

¹¹ Ujaraᴋ ᴋarmamêtoᴋ nipliadlaromârmat, ikârlo kiojomârpoᴋ tâpsominga.

¹² Kapianarmêk iglugasaliortoᴋ aungmut, iglugasaksoarniglo tungatitsijoᴋ idluitulinermut.

¹³ Ahâk, Nâlekamit Zebaotemit pisimangilâᴋ inôᴋatigêksuit senamatta ikomamut pijuksanik, nunaᴋatigêllo merngortudlarmatta sulingitomîk?

¹⁴ Nunaᴋsoaᴋ tatatsomârmat ilitarᴋsinermik Nâlekab opinartoᴋsôninganik, sôrlo imaᴋsuit imarbik ulingmatsuk.

¹⁵ Kapianarmêk inuk inôᴋatiminik imertitsijoᴋ, toᴋonartomiglo akkulugo, talatitsijorlo tâpsominga, kangusûtigijanga takojomavlugo.

¹⁶ Nertornaumik pinak naggonaumik ilumertauvotit; igvittauᴋ imerit, kipimaneᴋangitotullo îlerit; ᴋajûtaᴋ Nâlekab talerpingmiutanga ilingnut sangutitaulârpoᴋ, nertornautigijallo saujaulârpoᴋ kangusungnermut mamaidlartomut.

¹⁷ Idluitulinerub Libanonemit pijûb ulilârmatit, nergjutillo nungutauningita kaggailârpâtit; inuit aungit pivlugit, idluitulinerillo pivlugit piniarutaujut nunamut, iglugasaksoarnullo, tagvanelo igloᴋartunut tamainut.

¹⁸ Inungoaliarimajak suksaungmât, senajib senamago, inungoarlo kussersimajoᴋ, ajoᴋertuijorlo saglonermik, senajûb senajane tatigingmago, oᴋajuitomik gudingoaliormât?

¹⁹ Kapianarmêk ᴋejungmut oᴋartoᴋ: Tupalerit! ujarᴋamullo nipliajuitomut: Makigit! Tamanna ajoᴋertuiniarᴋâ? Ahâk, goldemik silberemiglo ᴋagleᴋarpoᴋ, iluminele anerneᴋangimarikpoᴋ.

²⁰ Nâlegarle inigijaminêpoᴋ ivsornaitome; silaᴋsoaᴋ ilûnnane nipangerle tâpsoma sângane.