Genesis 9 - Labrador Inuttitut Heritage Bible

Perᴋojat nutât. Gûdib angerninga. Noab erningit.

¹ Gudiblo saimauserpait Noa erningillo oᴋarvigivlugit: Kinguvâktâᴋattarluse unuksivallialeritse, nuna nâmavlugo.

² Nergjutit ilûnatik nunamêtut, tingmitjallo ilûnatik ᴋilaub atânêtut, aulajullo ilûnatik nunamêtut, mingeritjallo ilûnatik imarbingmêtut erᴋsigijaksarivâse ᴋoaᴋsârutigivluselo; aggapsingnut tunijaumavut.

³ Aulajut ilûnatik ômajut nerᴋiksauvut illipsingnut; taimaktauᴋ perortunik tungujoᴋtarnik tamainik tunitjivigivapse.

⁴ Kissianele nerᴋe, aungminik sulle ômajutelik, nerrijaksaringilase.

⁵ Illâle, ause inôtigijase aperᴋutigijomârpara, ômajunut tamainut aperᴋutigijomârpara; inublo inôtigijanga aperᴋutigijomârpara inungmut kinamullônêt, ᴋattangutigingmago.

⁶ Nalliat inub aunganik kovisijoᴋ, tâpsoma aungatauᴋ inungmut kovijaujuksauvoᴋ; Gûdib inuk sanangmago ingminik adsilivlune.

⁷ Kinguvâktâᴋattarluse unuksivallialeritse, ômaridlaritse nuname unuksivalliavluse.

⁸ Gudiblo Noa erningillo oᴋarvigivait oᴋarlune:

⁹ Ahâk, illipsingnut angerpunga kinguvâksapsingnullo,

¹⁰ Omajunullo tarnelingnut tamainut illipsingnêtunut, tingmianullo, nergjutinullo, nunablo ômajunginut tamainut najortapsingnut, illa, umiaᴋsoarmit anisimajunut ilûnamatsianginut, ômajut nallîlônêt nunamêtut illautilugit,

¹¹ Illipsingnut angerpunga, mattoma kingorngane uvinigit ilûnatik asserortauniarungnairtuksaungmatta ullitornivaksûb imaᴋsoanginut, mattomalo kingorngane ullitornivaksoaᴋarniarungnairtuksaungmat nunab asserortautiksanganik.

¹² Gûdelo oᴋarpoᴋ: Tamadja nallunaikutaksaᴋ, illipsingnut angerama ômajunullo tarnelingnut tamainut illipsingnêtunut, kingorlerpaujuksanut aglât:

¹³ Ajagutaᴋotiga nuvujanut illivara; tâmna nallunaikutaksauvoᴋ, angerama nunamut.

¹⁴ Nuvujaniglo saᴋᴋijârtitsilerangama nunab ᴋollâgut, ajagutaᴋotigalo takuksaulerangat nuvujane,

¹⁵ Tagva angernera erᴋaumajomârpara, illipsingnut angerama ômajunullo tarnelingnut tamainut, uvinilingnut tamainut, mattoma kingorngagut ullitornivaksoaᴋarniarungnairtuksaungmat uvinigit ilûnatik asserortautiksanganik.

¹⁶ Ajagutarlo nuvujanêtuksauvoᴋ, uvangalo takosarlugo erᴋaumajomârpara Gûdib angerninga soᴋᴋosijuitoᴋ ômajunut tarnelingnut tamainut, uvinilingnut nunamêtunut tamainut.

¹⁷ Gûdelo oᴋarpoᴋ Noamut: Tamadja nellunaikutaksaᴋ angernimnut, uvinigit tamaitaᴋsuit nunamêtut angervigigapkit.

¹⁸ Tamadja Noab erningit umiaᴋsoarmit anisimajut: Semelo Hamelo Jafetelo. Hamelo Kânaanib atâtagivâ.

¹⁹ Pingasut tâpkoa Noab ernerivait, tâpkutigunalo nunaᴋsoaᴋ ilûnane inuᴋalerpoᴋ.

²⁰ Noale perorsêvilerilerpoᴋ, vaineliksatalingmiglo perorsêviliorpoᴋ.

²¹ Vainemiglo imerame, âmaingavoᴋ, tupperminelo inangavoᴋ ᴋipiksimanane.

²² Hamible, Kânaanib atâtangata, atâtame kangusûtinga takogamiuk, oᴋautigivâ ᴋattangutîngminut sillatânêtûngnut.

²³ Tagva Semib Jafetiblo ᴋipiksaᴋ tiguvâk tuimingnut illivlugo, tunungavlugolo ulligiartorpâk atâtamik kangusûtinga; kênâgiglo allaumavuk, atâtamik kangusûtinga takojomanago.

²⁴ Noale vainetornerminit tuppalerame tussarlarmelo illiorvionerminik ernerminut nukardlermut,

²⁵ Oᴋarpoᴋ: Ominarsijaule Kânaane; kivganut kivgaujuksauvoᴋ ᴋattangutimine.

²⁶ Amma oᴋarivoᴋ: Nakorijaule Nâlegaᴋ, Semib Gûdinga; Kânaanelo kivgaujuksauvoᴋ tâpsomunga.

²⁷ Gûdib Jafete kinguvâksaᴋartiliuk unuktunik, iniksaᴋartilugo Semib tupingine, Kânaanelo kivgaujuksauvoᴋ tâpsomunga.

²⁸ Noale ullitornivaksûb kingorngagut inôvoᴋ jârinik 350nik.

²⁹ Noable jâringit ilûnatik 950ovut; toᴋovorlo.