Genesis 8 - Labrador Inuttitut Heritage Bible

Ullitornivaksoaᴋ sorairpoᴋ.

¹ Gudible Noa erᴋarpâ, ômajullo tamaita nergjutillo tamaita umiaᴋsoamioᴋatingit, anoremiglo anordlertitsivoᴋ nunab ᴋângagut, imaᴋsoarlo tinersoariarpoᴋ.

² Ittinersûblo puilavingit simiktaulerput, ᴋilaublo igalângit, sillaluksoarlo ᴋilangmit sorairᴋojauvoᴋ.

³ Imaᴋsûblo nuna ᴋemalerpâ ᴋemakpalliavlugo, imaᴋsoarlo miklivoᴋ, uvlut 150 nângmatta.

⁴ Taᴋᴋit sepangata uvlungita sepasenanganne umiaᴋsoaᴋ ikkarikpoᴋ Araratib ᴋaᴋᴋangane.

⁵ Imaᴋsoarlo miklivalliavoᴋ taᴋᴋit sinangat tikkidlugo. Taᴋᴋit sinangata uvlungita sivorlerpânganne ᴋaᴋᴋat ᴋângit nuitainarput.

⁶ Uvlullo 40 nângmatta, Noab igalâᴋ umiaᴋsoarmêtoᴋ sanajane upkoerpâ.

⁷ Tullugarlo annitipâ, tâmna aularpoᴋ uttertarlunelo, nuna imaᴋarungnailerᴋârtinago.

⁸ Taubelo annitipâ ᴋaujijomavlune imaᴋanginersaungimangât nuname.

⁹ Taubele miviksaminik naipitsinginame, tâpsomunga uttilerivoᴋ umiaᴋsoarmut, imaᴋarmat sulle nunaᴋsoarme ilûnâne. Issaktorlugo tiguvâ tagva, ingminut pitilugo umiaᴋsoarmut.

¹⁰ Utaᴋᴋivorlo amma uvlunik sepanik, amma taube annitilugo umiaᴋsoarmit.

¹¹ Taubiblo tâpsoma tikkipâ unnulermat, sunaubvalo, napârtub orᴋsuliub millukattanganik ômarmik kingmiartoᴋ. Tagva Noa tukkisilerpoᴋ imaᴋsoaᴋ miklisimangmat.

¹² Sullelo utaᴋᴋivoᴋ amma uvlunik sepanik; taubelo umiaᴋsoarmit annitingmago, uttervigijungnairpâ.

¹³ (Noa) jâreᴋarmat 601nik, taᴋᴋerub sivorliub uvlungita sivorlerpânganne nuna imairutivoᴋ. Tagva Noab umiaᴋsûb ᴋânga pêrpâ nautsertorlunelo, sunaubva, nunab ᴋânga imairutivoᴋ.

¹⁴ Taᴋᴋerublo aipangata uvlungita 27ingane nuna pannerpoᴋ.

¹⁵ Gudiblo Noa oᴋarvigivâ oᴋarlunelo:

¹⁶ Umiaᴋsoarmit annilerit igvit nuliallo ernitillo ernivillo nuliangit illagivlugit.

¹⁷ Omajullo ilûnatik illingnêtut, uvinilît ilûnatik illagijangit, tingmitjallo nergjutillo pâmgortullo ilûnatik pâmgorpaktut nuname annilit illagivlutit; pivalliajuksauvut nuname, kinguvâktârᴋattarlutiglo unuksivalliajuksauvut nuname.

¹⁸ Tagva Noa annilerpoᴋ ernine nulianelo ernermelo nuliangit illagivlugit.

¹⁹ Taimaktauᴋ ômajut ilûnatik, pâmgortullo ilûnatik, tingmitjallo ilûnatik, pâmgorpaktullo nuname ilûnatik, ingmikut illagêklutik, annilerput umiaᴋsoarmit.

²⁰ Noalo Nâlekamut tunerguserviliorpoᴋ, tigusivlunelo nergjutit ivsornaitut sunatuinait illanginik, tingmitjallo ivsornaitut sunatuinait illanginik, ôtaksanik tunerguserpoᴋ tunerguserviub ᴋângane.

²¹ Nâlekablo naimavâ tippitsiariktoᴋ, ômamigullo oᴋarpoᴋ: Kingorngane nuna ominarsititsomairtara inuit pitjutigivlugit; inub ômatingata kajungilarningit ajortoᴋsôngmatta sorusioninganit, kingornganelo ômajut tamaita nungutitsomairtakka, sorlo pisimagama.

²² Kingorngagut nunaᴋsûb uvlungit nâvlugit karngasuiviksaᴋ kattersuiviksarlo, itje kiaglo, aujaᴋ okiorlo, uvloᴋ unnuarlo sorairniatsangilat.