Genesis 7 - Labrador Inuttitut Heritage Bible

Ullitornivaksoaᴋ.

¹ Nalekablo Noa oᴋautivâ: Umiaᴋsoarmut ikkilerit, igvit inuᴋotitillo ilûnatik idluartorigapkit sâmne kinguvarêt ukkua akornganne.

² Nergjutit ivsornaitut sunatuinait illanginik ilaurᴋojilerit illingnut, attunit aiparêngnik sepanik, nergjutillo ivsornartut illanginik attunit aiparêngnik atausingnik.

³ Taimaktauᴋ tingmitjat ᴋilaub atânêtut illanginik, attunit aiparêngnik sepanik, kinguvâksaᴋarungnartut nungutaurᴋonagit nunaᴋsoarme ilûnâne.

⁴ Uvlut sepat nâkpatta, uvlut 40 unnuallo 40 nâvlugit sillalurᴋojijomârpunga nunamut, nunamit pêjaromavlugit ômajut tamaita pingortitakka.

⁵ Noable Gûdib perᴋojangit tamaita nâlatsiarlugit piniarutigivait.

⁶ Noa jâreᴋarmat 600nik, ullitornivaksûb nuna tikkipâ.

⁷ Noalo umiaᴋsoarmut ikkivoᴋ ernine nulianelo ernimelo nuliangit illagivlugit, ullitornivaksûb sivorngagut.

⁸ Nergjutit ivsornaitut illangit, ivsornartullo illangit, tingmitjallo illangit, pâmgortullo nunamêtut ilûnatik illangit

⁹ Illauvut Noamut umiaᴋsoarmut attunit aiparêklutik, sorlo Nâlekab Noa perᴋongmago.

¹⁰ Uvlulle sepatt nâlermatta, ullitornivaksûb nuna tikkilerpâ.

¹¹ Noa jâreᴋarmat 600nik, taᴋᴋerub aipangata uvlungita sepasenangane, uvlorme tamattomane ittinersûb puilavingit ilûnatik aitangalerput ᴋilaublo igalângit ilûnatik angmalerput.

¹² Sillaluᴋarporlo nuname uvlut 40 unnuallo 40 nâvlugit.

¹³ Uvlorme taipsomaneluatsiaᴋ Noa ikkivoᴋ umiaᴋsoarmut, Semelo, Hamelo, Jafetelo, ernine, nulianelo, ernimelo nuliangit pingasut illagivlugit.

¹⁴ Taimaktauᴋ ômajut sunatuinait ingmikut pitjutilît, nergjutillo sunatuinait ingmikut pitjutilît, pâmgortullo sunatuinait pâmgorpaktut nuname ingmikut pitjutilît, tingmitjallo sunatuinait ingmikut pitjutilît, tingijungnartut ilûnatik, esaroᴋartut ilûnatik.

¹⁵ Tâpkoa ilûnatik aiparêklutik ikkivut Noamut umiaᴋsoarmut, uvinilît ômanartomik anernelît ilûnatik illangit.

¹⁶ Aiparêklutik ikkivut, uvinilît ilûnatik illangit, sorlo Gûdib perᴋongmago. Nâlegarlo pallangairsivoᴋ kingorngagut.

¹⁷ Tagva ullitornivaksoaᴋ nunamut nelliutilerpoᴋ uvlut 40 nâvlugit, imaᴋsoarlo angijororlerpoᴋ, umiaᴋsoaᴋ pokilaktilugo ᴋangatartilugolo nunab ᴋânganit.

¹⁸ Imaᴋsoarlo sugaluluarpoᴋ angijororlune nuname, umiaᴋsoarlo imaᴋsûb ᴋângagut ingergavoᴋ,

¹⁹ Imaᴋsoarlo sugaluluarpoᴋ angijomik nuname, ᴋaᴋᴋaᴋsuit tamaita ᴋilaub atânêtut ulliklugit.

²⁰ Tallertut 15tut ittitigijomik imaᴋsoaᴋ sugaluluarpoᴋ ᴋaᴋᴋat ulliklugit.

²¹ Tagva ippidlarput uvinilît ilûnamatsiatik aulajut nuname: tingmitjallo nergjutillo ômajullo pâmgortullo ilûnatik pâmgorpaktut nuname inuillo ilûnatik.

²² Ilûnamatsiatik panertomêtut, ômanartomik anernermik anerterijut ᴋingâmikkut toᴋolerput.

²³ Taimak nunamêtut ilûnamatsiatik nungutauvut; inuillo nergjutillo pâmgortullo tingmitjallo ᴋilaub atânêtut, ilûnamatsiatik nunamit pêjartauvut. Noalo kissime amiakôvoᴋ umiaᴋsoarmioᴋatingillo.

²⁴ Imaᴋsoarlo sugaluluarpoᴋ nuname uvlut 150 nâvlugit.