Genesis 6 - Labrador Inuttitut Heritage Bible

Ullitornivaksûb oᴋautauninganik.

¹ Inuille unuksivallialermatta nuname panniktârmattalo,

² Tagva Gûdib erningita inuit panningit ᴋemergolerpait pinnarnarasugivlugit, annerijamiglo nallît nuliarivait.

³ Tagva Nâlegaᴋ oᴋarpoᴋ: Anernera inungnêtsainaromângilaᴋ, uviniongmatta illa; nalliata uvluksangit tagva jârit 120

⁴ Taipsomane nuname inukpaᴋarpoᴋ kingornganelo, Gûdib erningita inuit panningit nuliarigamigit ᴋitorngaᴋarlutiglo tâpkonangat; tamadja pitsartujoᴋsuit itsaᴋ tussaumajaudlartut.

⁵ Nalegarle takovoᴋ inuit uivêtoᴋsôninginik nuname, ômatingitalo issumangita sanajangit idluênarmatta ᴋaut tamât.

⁶ Tagva Nâlegaᴋ ᴋaᴋᴋialerpoᴋ, inuit pingortigamigit nuname, ômatimigullo kiksarutigivâ.

⁷ Nâlegarlo oᴋarpoᴋ: Inuit pingortitakka pêjaromavakka nunamit inuillo nergjutillo pâmgortullo tingmitjallo aglât ᴋilaub atânêtut, ᴋaᴋᴋialerama pingortigapkit.

⁸ Noale saimaneᴋsivoᴋ Nâlekab ijîgingne.

⁹ Tamadja unipkautsit Noamik: Noa angutauvoᴋ idluartoᴋ, pidlaraksausuertoᴋ inôᴋatime akornganne; Gûde aiparivlugo Noa arvertarpoᴋ.

¹⁰ Pingasuniglo Noa ernertârpoᴋ: Sememiglo, Hamemiglo, Jafetemiglo.

¹¹ Nunale asserorsimavoᴋ Gûdib sângane, idluitulinermik tatavlune.

¹² Tagva Gûdib nuna ullernaigivâ, sunaubva asserorsimavoᴋ, uvinilît ilûnamatsiatik apᴋutigijatik asserormattigik nuname.

¹³ Tagva Gûde Noamut oᴋarpoᴋ; Uvinilît ilûnamatsiatik naggatiksangat nalliutivoᴋ uvamnut, nuna idluitulinermik tatamat, ahâk, asseroromavakka nuna illagivlugo.

¹⁴ Illingnut umiaᴋsoaliorit pingermik, takamanelo iglunik sanavlutit, kutsorlugolo kutsumik illuagut sillatâgullo.

¹⁵ Imâk senajaksarivat; tallertut 300tut takitigijok, tallertut 50tut silliktigijoᴋ, tallertut 30tut poᴋtotigijoᴋ.

¹⁶ Igalâᴋartitaksarivat umiaᴋsoaᴋ, tallertut poᴋtotigijoᴋ sanavlugo ᴋollânit, upkoaᴋartilugolo umiaᴋsoaᴋ sanirangagut, ᴋollerêktoᴋartilugolo allermik ᴋetterdlermiglo ᴋollermiglo.

¹⁷ Ahâk, ullitornivaksoarmut nuna tikkitaurᴋojomavara, asseroromavlugit uvinilît tamaita ômanartomik anernelît ᴋilaub atânêtut. Ilûnamatsiatik nunamêtut nungutaksauvut.

¹⁸ Igville angervigivagit, umiaᴋsoarmullo ikijariaᴋarpotit igvit, ernitillo, nuliallo, ernivit nuliangillo illagivlugit.

¹⁹ Umiaᴋsoarmullo itertitsijuksauvotit ômajut ilûnatik nerᴋelît illanginik, attunit aiparêngnik angumiglo arnamiglo toᴋotailititaurᴋovlugit ilingnêdlutik.

²⁰ Tingmitjat ingmikut pitjutilît, nergjutillo ingmikut pitjutilît, pâmgortullo sunatuinait nunamêtut ingmikut pitjutilît illangit, attunit aiparêklutik itertuksauvut illingnut toᴋotailititaurᴋovlugit.

²¹ Nerᴋiksanik sunatuinarnik nerᴋiksauvaktunik naksartuksauvotit torᴋorlugillo, nerᴋiksaurᴋovlugit illingnut tâpkonungalo.

²² Noablo Gûdib perᴋojangit tamaita nâlatsiarlugit piniarutigivait.