Genesis 50 - Labrador Inuttitut Heritage Bible

Jako iluvertauvoᴋ. Josefe toᴋovoᴋ.

¹ Tagva Josefib, atâtame kênanganut pûlune, ᴋeajutigivâ kuniklâlo.

² Josefiblo kivgane âniasiortit perᴋovait, atâtane mingoartaurᴋovlugo. Tagva âniasiortit Israêle mingoarpât.

³ Uvlut 40 tâpsomunga nâvlugit, uvlut taimak unuktigijut nâjariaᴋarmatta mingoartaugiamut. Egiptenemiullo uvlunik 70nik ᴋeavât.

⁴ Uvlullo taipkoa ᴋeaviojut sorairmatta, Josefib Faraub inuᴋotingit oᴋarvigivait, oᴋarlune: Saimaneᴋsiguma illipsingne, tagva Farao oᴋarvigisiuk oᴋautivlugo:

⁵ Atâtama angertipânga, oᴋarlune: Takovarma toᴋolertunga; iluviksamnut nuname Kânaaneme pijarêrtamnut illijaksarivarma. Taimaimat takpaungarlangatôᴋ atâtaga illijartorlugo; utteromârpunga.

⁶ Faraub oᴋautivâ: Takpaungartuinarit atâtat illijartorlugo, sorlo angertingmatit.

⁷ Tagva Josefe takpaungarpoᴋ, atâtane illijartoromavlugo. Faraublo kivgangit ilûnatik illagivlugo takpaungarput, angajoᴋaujut iglungane, angajoᴋaujullo ilûnatik nuname Egipteneme,

⁸ Taimaktauᴋ Josefib inuᴋotingit ilûnatik, ᴋatangutingillo, atâtangatalo inuᴋotingit; ᴋitorngatik kissêta, saugaᴋotitiglo, tuktuvaᴋotitiglo, ᴋemakpait nunamut Gosenemut.

⁹ Amma ᴋemuksertut ablângajullo horsine illagivlugo takpaungarput; ingergaᴋatigêksuit.

¹⁰ Katjugvik Atat Jordanib akkianêtoᴋ tikkinamitsuk, angijomik ilungertortomiglo ogguarput tagvane; atâtane pivlugo ogguarneᴋ atorpâ uvlut 7 nâvlugit.

¹¹ Nunable inungita Kânaanemiut ogguarneᴋ katjugvingme Atatime takogamitsuk, oᴋarput: Egiptenemiut ilungertorlutik tagvane ogguarput. Tamanna pivlugo nuna tamanna Jordanib akkianêtoᴋ taijauvoᴋ Egiptenemiut ogguarvinganik.

¹² Erningitalo taimailiorvigivât, sorlo perᴋungmagit.

¹³ Ikârlugolo nunamut Kânaanemut illijartorpât perorsêviub Makpêlab ᴋairosunganut, Abrahab pisiarijanganut (perorsêvik illaliudlugo) iluverviksaurᴋovlugo Efronemit Hetiteremit, Mamrib akkianêtomut.

¹⁴ Atâtanelo illijarêramiuk, Josefe Egiptenemut utterpoᴋ, tâmnalo, ᴋatangutingillo, ilûnatiglo illagivlugo takpaungarsimajut, atâtanga iluveriartorlugo.

¹⁵ Josefible ᴋatangutingit, atâtamik toᴋunga issumajârutigivlugo, oᴋarput: Kapianarmêk, Josefib mâna omiginajarpattigut akkiniarlutalo idluitunik tamainik piniartaptingnik tâpsomunga!

¹⁶ Taimaimat Josefe oᴋautjaurᴋovât: Toᴋolerᴋârane atâtat perᴋojivoᴋ oᴋarlune:

¹⁷ Imâk oᴋariaᴋarniarpose Josefemut: Katangutivit piungituliningit idluituliningillo issumagijungnailaungmikit, idluitulivigingmatit illa. Taimaimat mâna issumagijungnailaukittôᴋ atâtavit Gûdingata kivgangita idluituliningit! Josefele ᴋeavoᴋ, taimak oᴋarvigingmatsuk.

¹⁸ Katangutingitalo pâmaktervigijartorpât, oᴋarlutik: Tagga, illingnut kivgaulerpogut.

¹⁹ Josefible oᴋautivait: Sivôraniarase! uvanga Gûdeogalloarᴋingâ?

²⁰ Illipse issumaᴋalauralloarpose, idluitulivigijomavlunga, Gûdele ajungitomik issumaᴋarpoᴋ taimailioromavlune, sorlo mâna saᴋᴋijâdlarmat, inôᴋatigêksuit inûlivlugit.

²¹ Taimaimat sivôraniarase mâna! Uvanga patangaititsomavapse ᴋitorngaselo. Manigorpaillo kiblingnartunik oᴋauseᴋarvigivlugit.

²² Taimak Josefe Egipteneme nunaᴋarpoᴋ, tâmnalo atâtangatalo inuᴋotingit; inôvorlo Josefe jârinik 110nik.

²³ Efraimiblo kinguvârêngningita pingajungit Josefib takovait; taimaktauᴋ Maggerib, Manassib erningata, erningit inôlerput Josefib sângane.

²⁴ Josefiblo ᴋatangutine oᴋautivait: Toᴋolerpunga; Gûdiblo nalipsaromârpâse, nunamit mattomangat paungartiluse nunamut angerutigijaminut Abrahamut Isaamullo Jakomullo.

²⁵ Josefiblo Israêlikut angertipait, oᴋarlune: Gûdib nalipsaromârpâse, tagva saunikka tamângat takpaungartitsomârpase.

²⁶ Tagva Josefe toᴋovoᴋ 110nik jâreᴋarlune. Mingoarpâlo iklervingmut illivlugo Egipteneme.