Genesis 49 - Labrador Inuttitut Heritage Bible

Jakub ernine nalautaivigivait, toᴋovorlo.

¹ Jakuble ernine ᴋairᴋovait oᴋarlune: Katimatitse, nalojungnairtitsomagapse tikkitautigijomârtapsingnik nalliutome pijomârtome.

² Katimatitse tussarluselo, Jakub erningit; atâtase Israêle tussarsiuk!

³ Rubene, igvit tagva ernera angajukleᴋ, nukkiga, anguteonimalo saᴋᴋerᴋârtanga; anginerôjoᴋ, pitsartunerôjoᴋ.

⁴ Imertut tertipotit; pinerôjungnairtuksauvotit tagva, atâtavit inangavianut inaravit, tagvanêdlutit ivsornartinangne. Inangaviga inarvigivâ!

⁵ Simeonelo Levilo ᴋatangutigêkpuk; saviksoâktik sakkogivakit pikablanermut.

⁶ Kaggimiolerangamik, tarniga tagvanêrᴋolungitara; katimalerangamik, ivlernartoᴋutiga (tarne) illaurᴋolungitara; ningarlutik inuarmanik, ᴋuksalailutik tuktuvait illakungortimattikik.

⁷ Kapianarmêk ningarningak ilungertortoᴋ, ningaumajârningak kassêtoᴋ! Aviuterᴋovakka Jakokune, siamartilugit Israêlikune.

⁸ Igvit, Juda, igvit nakorijaksarivâtit ᴋatangutivit. Aggatit akkerartortivit tununginêtuksauvut, pâmaktervigijaksarivâtit atâtavit ᴋitorngangita.

⁹ Loeviarauvoᴋ Juda. Sâlaᴋarᴋârlutit aglivalliavotit, ernîk. Pâmakpoᴋ, aᴋopivoᴋ loevitut, loevitut piaraᴋartotut; kia ullapilugo sappingilaûk?

¹⁰ Attaniub ajaupianga Judamit pêraksaungilaᴋ, opigijautiksarlônêt ittigangita akornganit, Silo (ullapirᴋsaijoᴋ) tikkilerᴋârtinago; tâmnalo inôᴋatigêksuit nâlegaksarivât.

¹¹ Siuterᴋortojoᴋotine vaineᴋutimut pittukpâ, siuterᴋortojoᴋotimelo piaranga vaineᴋutib akkerunganut; annorâne ergortorpâ vainemut, ulliksoarnelo vaineᴋutib paungangita iptinganut.

¹² Ijîgik aupaluksivuk vainemut, kigutingit ᴋaᴋorsivut imumut.

¹³ Sebulone nunaᴋartuksauvoᴋ imarbiksûb sikjangane, umiaᴋsuit kissarviane; kiglinga attavoᴋ Sidonemut.

¹⁴ Isassarib siuterᴋortojoᴋ nukkeᴋatsiartoᴋ adsigivâ, aᴋopijoᴋ avalut illuane.

¹⁵ Inilangaviksaᴋ ajungitoᴋ maluginamiuk, nunalo ânanauginamiuk, ᴋollêngne manivak nangmarnermut kivgangordlune akkeᴋangitoᴋ.

¹⁶ Danib inuᴋotine erᴋartoraksarivait, Israêlib kinguvângititut assimititut.

¹⁷ Dane ᴋuglugiangovoᴋ apᴋosinerme, ᴋuglugiarâluk pissugvingme: horse kêngmago kingmingagut, inua niverpoᴋ kataklune.

¹⁸ Nâlegaᴋ, piuliklernît nerriugivara!

¹⁹ Gade inôᴋatigêksuit sorsugvigijomâralloarpât, tâpsomale sorsugvigingmivlugit ᴋemâtitsomârpait.

²⁰ Asserib nerᴋiksalianga orᴋsuliovoᴋ, attanerit mamarivaktanginik tunitjijomârpoᴋ.

²¹ Naftalib tuktu ômariktok adsigivâ; tussarominartunik oᴋauseᴋarpoᴋ.

²² Josefe napârtoarsutun-ipoᴋ paungaliktut, napârtoarsutut paungaliktut puilaviub sennianêtotut; akkerungita ᴋarmaᴋ nâvât:

²³ Pittiksilît ullapigalloarmatsuk pittiklugolo unangmivlugolo,

²⁴ Tâpsoma pittiksinga soᴋosingilaᴋ, aggangitalo nukkingit ajulungilat, ajugaujub Jakokune ikajormago, Israêlib pairijingata, ᴋairtorijangata.

²⁵ Atâtavit Gûdinganit tamanna pivoᴋ: Tâpsoma ikajorlitit, ajugaᴋangitublo saimauserlitit pikuminartunik pângat ᴋilangmit pijunik, pikuminartuniglo kanangat ittinermit pijunik, pikuminartunik amâmamit igliamillo pijunik!

²⁶ Saimanartut atâtavit tunijangit pitsartunersauvut saimanartunit ᴋaᴋᴋat nutaungitut tunijanginit, ᴋaᴋᴋârulait aulajuitut allianarninginit. Josefib niaᴋoanut pilit, ᴋatangutingita akorngane attaniotijub kabjinganut!

²⁷ Benjaminib amaroᴋ késuktoᴋsoaᴋ adsigivâ; uvlâkut pijane nerrivait, unnukut aᴋsârnigarijane aitûtigivait.

²⁸ Tamadja Israêlib kinguvârêngit 12 ilûnatik: tamadjalo atâtangata oᴋauserijangit tâpkonunga, saimausermagit; ilûnaita attunit saimauserlugit saimauserpait.

²⁹ Perᴋovlugillo oᴋautivait: Illaliudjaujomâruma sivorlerijamnut, iluveriartorsinga sivorlima akornganut, ᴋairosungmut Efronib Hetiterib perorsêvinganêtomut,

³⁰ Perorsêviub Makpêlab ᴋairosunganut, Mamrib akkianêtomut, nuname Kânaaneme. Taimna Abrahab pisiarivâ perorsêvik illaliudlugo Efronemit Hetiteremit, iluverviksaᴋarᴋovlugo.

³¹ Tagvunga Abraha illivât nuliangalo Sara. Tagvunga Isaaᴋ illivât nuliangalo Rebekka. Tagvunga Lea illivara.

³² Perorsêvik taimna ᴋairosungalo pisiangomavuk Hetib ᴋitornganginit.

³³ Jakublo perᴋojane ᴋitorngaminut sorairamigit, ittigane nellavingminut pitipait anernangerdlunelo, illaliutjauvorlo sivorlerijaminut.