Genesis 48 - Labrador Inuttitut Heritage Bible

Jako Efraimik Manassemiglo saimartitsivoᴋ.

¹ Pijokartut tamakkoa kingorngatigut Josefe oᴋautjauvoᴋ: Ahâk, atâtat ᴋanimavoᴋ. Tagva ernîngne illaurᴋovak Manasselo Efraimelo.

² Jakolo ᴋaujititsartorpât oᴋarlutik: Ahâk, ernît Josefe ᴋailerpoᴋ illingnut. Israêlelo sôngosarlune iksivalerpoᴋ nallavingmine.

³ Jakole Josefemut oᴋarpoᴋ: Gûdib ajugaᴋangitub saᴋᴋervigilaujuvânga Luseme, nuname Kânaaneme, saimauserlungalo,

⁴ Oᴋarvigivlunga: Ahâk, kinguvâktârtitsomavagit unuksivalliatitsomavlutillo inugasaksoangortilutit, nunalo manna sorairtuksaungitomik perᴋutautitsomavara kinguvângnut kingunikkut.

⁵ Taimaimat ernîkik tâpkoa, Egipteneme ernertârijâkik, ilingnut tikkerᴋârtinanga Egiptenemut, nangminerijomavâkka; Efraimelo Manasselo Rubenetut Simeonetullo nangminerijomavâkka.

⁶ Kingorngatigulle ernertârmiguvit, tâpkoa igvit nangminerijomârpatit, taiguseᴋaromârpullo angajûngmik attîgingnik tâpkoa kingormgutijomârtâgingne.

⁷ Mesopotâmiamit tikkinama, Rahele toᴋovoᴋ takkumne, nuname Kânaaneme ingerartiluta, Efratib ᴋanimarilungitangane; tagvanelo apᴋome Efratemut sangmijome iluverpara (Efrat tagva Betlehem).

⁸ Israêliblo Josefib ernîgik takoleramigik, oᴋarpoᴋ: Kikkuk ukkoâ?

⁹ Josefib atâtane kiovâ: Ernîkka ukkoa, Gûdib tunijâgik uvamnut tamâne. Oᴋarivoᴋ: Kailik uvamnut, saimauseromagapkik.

¹⁰ Israêlible ijîgik inutoᴋaunermut takpêlermanik, takojungnangilaᴋ nâmaktomik. Tassiormagik tâpsomunga, kuniklugiglo erᴋipak.

¹¹ Israêlelo Josefemut oᴋarpoᴋ: Kênat takolugo nerriugungnailauralloarpunga; sunaubvale, kinguvângnik aglât Gûdib takotipânga.

¹² Josefiblo sânganit pêrpak nunamut pâmakterlune.

¹³ Tagva Josefib tamarmik tiguvak: Efraime tallerpingminut Israêlib saumia sâdlugo, Manasselo saumingminut Israêlib tallerpia sâdlugo, tessiorlugik tâpsomunga.

¹⁴ Israêliblo aggane tallerpît issakpait illilaitalo Efraimib niaᴋoanut, nukardliogalloarmat tâmna, sauminelo illivait Manassib niaᴋoanut, pijarellunelo aggangminut taimailiorpoᴋ, Manasse angajukliogalloarmat.

¹⁵ Josefelo saimauserpâ oᴋarlunelo: Gûdib piksoma — atâtâkka Abrahalo Isaarlo arvertalaukpuk saᴋᴋâne — Gûdib uvamnik pairᴋsijub inûlervimnit uvlomemut aglât,

¹⁶ Engelib ajortunit tamainit piuliklertub uvamnik, tâpsoma nukapiâk ukkoa saimauserligik, taijaulerᴋovlugik attimnik atâtângmalo attîgingnik Abrahablo Isaablo, aglisivalliarᴋovlugik unuksivalliarᴋovlugiglo nuname!

¹⁷ Josefible atâtane takogamiuk tallerpingminik illijijoᴋ Efraimib niaᴋoanut, idluaringilâ, atâtamelo aggangit tiguvait Efraimib niaᴋoanit Manassib niaᴋoanut pititsomavlugit.

¹⁸ Josefiblo atâtane oᴋautivâ: Atâtâk, taimainak! una angajukliovoᴋ, ôma niaᴋoanut aggaktit tallerpît illilaukit.

¹⁹ Atâtangale taimailioromangilaᴋ, oᴋarlunelo: Nalungilanga ernîk, nalungilanga! Unatauᴋ inôᴋatigêksoangortitaujomârpoᴋ angijôvlunelo, nukangale anginersaujomârpoᴋ ômangat inôᴋatigêt unuktuit kinguvâksarivlugit.

²⁰ Taimak uvlorme taipsomane saimauserpak, oᴋarlunelo: Israêlikune saimausêjoᴋarangat kimik, oᴋartuksauvoᴋ: Gûdib iliorvigilitit Efraimetut Manassetullo! Taimak Efraim sivorliutivâ Manassemit.

²¹ Israêlelo Josefemut oᴋarpoᴋ: Takovarma toᴋolertunga, Gûdible illagijomârpâse uttertiluselo atâtapse nunanganut.

²² Nunab illanga perᴋutautipara illingnut, piksariluartat ᴋatangutingnit, saviksoamnut pittiksimnullo aᴋsârnigarijara Amoriterit agganginit.