Genesis 46 - Labrador Inuttitut Heritage Bible

Jakokut nûput Egiptenemut.

¹ Israele tagva aularpoᴋ perᴋutine tamaita neksarlugit. Bersêbamullo tikkiname, ômajomik tunerguserpoᴋ atâtame Isaab Gûdinganut.

² Gûdiblo Israêle oᴋarvigivâ takotitjutikut unnuarme, oᴋarlune: Jako, Jako! Kiovorlo: Tamânêpunga.

³ Oᴋautivâlo: Uvanga Gûdeovunga, atâtavit Gûdinga; sivôranak, attersartuksaugavit Egiptenemut, tagvane inugasaksoangortitsomagapkit.

⁴ Uvanga attersarᴋatigijomavagit Egiptenemut, uvangalo amma uttertitsomârivagit tamaunga, Josefiblo aggane ijîngnut illijomârpait.

⁵ Tagva Jako aularpoᴋ Bersêbamit; Israêliblo erningita atâtatik Jako, ᴋitorngatiglo, nuliatiglo, ᴋemuksiutivait ᴋamutinut aksaloalingnut Faraub tujûtigijanginut ᴋemuksiutigijaksanginut.

⁶ Tiguvaillo nergjuteᴋotitik perᴋutitiglo pisiarijatik nuname Kânaaneme, Egiptenemullo pivut, Jakolo kinguvângillo ilûnatik:

⁷ Ernine, ernimelo erningit, paninelo, ernimelo paningit, kinguvânelo tamaita Egiptenemut illagivait.

⁸ Tamadja Israêlib kinguvângita Egiptenemut tikkitut attingit: Jakolo erningillo: Jakob erninga angajukleᴋ Rubene.

⁹ Rubenib erningit: Hanoᴋ, Pallu, Hetseron, Karmi.

¹⁰ Simeonib erningit: Jemuel, Jamin, Ohad, Jakin, Sugar, Saulelo, arnab Kânaanemiub erninga.

¹¹ Levib erningit: Gerson, Kagat, Merari.

¹² Judab erningit: Ger, Onan, Sela, Peres, Sera. Gerelo Onanelo toᴋovuk nuname Kânaaneme. Peresib ernîgik: Hetseron Hamulelo.

¹³ Isassarib erningit: Tola, Puva, Jobe, Simeron.

¹⁴ Sebulonib erningit: Sered, Elon, Jaleel.

¹⁵ Tâpkoangovut Leab ᴋitorngangit, erniarijangit Jakomut Mesopotâmiame, paningalo Dina. Inuit ilûnatik, ernît panîllo katilugit, 33ovut.

¹⁶ Gadib erningit: Sifion, Haggi, Suni, Esbon, Eri, Arodi, Areli.

¹⁷ Asserib erningit: Jimna, Jesua, Jesui, Beria, najangalo Sera. Beriable ernîgik: Heber Malkielelo.

¹⁸ Tâpkoangovut Silpab ᴋitorngangit, Labanib tunijangata paniminut Leamut. Tâpkoa Jakomut erniarivait: inuit 16.

¹⁹ Rahelib Jakob nuliangata ernîgik: Josefe Benjaminelo.

²⁰ Josefelo Egipteneme ernertârpoᴋ Manassemik Efraimiglo, Asnatib, ajoᴋertuijub Onemêtub Potiferab paningata, erniarijâgingnik tâpsomunga.

²¹ Benjaminib erningit: Bela, Beker, Asbel, Gera, Naman, Eigi, Ros, Mupim, Hupim, Arde.

²² Tâpkoangovut Rahelib ᴋitorngangit, erniarijangit Jakomut, katilugit inuit 14.

²³ Danib erninga: Husim.

²⁴ Naftalib erningit: Jatseel, Guni, Jetser, Sillim.

²⁵ Tâpkoangovut Bilhab ᴋitorngangit, Labanib tunijangata paniminut Rahelemut. Tâpkoa erniarivait Jakomut, katilugit inuit 7.

²⁶ Inuit tamaita Jakob Egipteneliarᴋatingit, uviningata kinguvângit (erningita nuliangit kissêta pinagit) — tâpkoa tamaita katilugit 66ovut.

²⁷ Josefiblo ernîgik, Egipteneme erniarijaujuk tâpsomunga, maggôvuk. Jakokut, Egiptenemut tikkitut, tamaita katilugit 70ovut.

²⁸ Jakoblo Juda sivunermigut tilivâ Josefemut, apᴋomik Gosenemut unertutjerᴋovlugo sivunermigut. Nunamullo Gosenemut tikkiput.

²⁹ Tagva Josefe anujerᴋojivok, ᴋemukserlunelo paungarpoᴋ Gosenemut, atâtane Israêle pâriartorlugo. Takûtilermanik, ᴋongasingagut erᴋipâ ᴋeaᴋitârlune ᴋongasingane.

³⁰ Israêlelo Josefemut oᴋarpoᴋ: Mâna toᴋoleromavunga, kênat takogapko, sulle inôjotit.

³¹ Josefiblo ᴋatangutine atâtamelo inuᴋotingit oᴋautivait: Majorarniarpunga Farao ᴋaujititsomavlugo, oᴋautijomavaralo: Katangutikka atâtamalo inuᴋotingit nunamit Kânaanemit uvamnut tikkiput;

³² Angutillo taipkoa mianersijôvut, nergjuserigamik; saugaᴋotitiglo tuktuvaᴋotitiglo perᴋutitiglo tamaita neksarpait.

³³ Farauble ᴋairᴋokpase apertsorluse: Sumik inôgutiksarsijuteᴋarᴋisê?

³⁴ Tagva oᴋartuksauvose: Kivgatit nergjutinik mianersijeovogut sorusioniptingnit mâna tikkidlugo, uvagullo sivorlivullo, nunaᴋarᴋovluse Goseneme; saukanik mianersijut ilûnatik Egiptenemiunut maᴋojugijaungmatta.