Genesis 45 - Labrador Inuttitut Heritage Bible

Josefe ᴋatangutiminut nalonailivoᴋ.

¹ Tagva Josefe najortime ilûnatik sângane nujungnarungnailerpoᴋ, nipliavorlo: Ilûnatik uvamnit anilit! Najortoᴋangilarlo, Josefe ᴋatangutiminut nelonailingmat.

² Keadlalerporlo, Egiptenemiut tussâtilugit Faraublo kivgangit tussâtilugit.

³ Josefelo oᴋarpoᴋ ᴋatangutiminut: Josefeovunga; atâtaga sulle inôvâ? Katangutingitale kiovlugo sapperpât, kênanga ᴋoaᴋsârutiginamitsuk.

⁴ Katangutinelo oᴋautivait: Kailauritsetôᴋ uvamnut! Tagva aivigivât. Oᴋarporlo: Josefeovunga ᴋatangutise niorvgutigijase Egiptenemut.

⁵ Kissiane issumajârniarase mâna, ningautiniaraselo niorvgutigigapsinga tamaunga; inûlijauniksapsingnut Gûdib sivunapsigut tilingmanga.

⁶ Jâringnik maggungnik kângnartoᴋsoaᴋarêrpoᴋ mâna nuname, sulle jârit tallimat nâvlugit poagrejartoᴋarane kattersoijoᴋarniangilaᴋ.

⁷ Gûdible sivunapsigut tamaunga tilivânga nungumariktailijomavluse nuname, inûlijomavluselo piulijaujutiksamut angijoᴋsoarmut.

⁸ Taimaimat, illipse tililungilapsinga tamaunga, Gûdible. Tâpsoma Faraomut atâtangortipânga, nâlegangortilarmalo iglunganut ilûnânut, attaningortilungalo nunamut Egiptenemut ilûnânut.

⁹ Tuavileritse mâna paungarluse atâtamnut oᴋautijartorlugolo: Imâk ernivit Josefib oᴋaudjaurᴋovâtit: Gûdib attaningortingmanga Egiptenemut ilûnânut; katsungatailivlutit attersalaurit uvamnut.

¹⁰ Goseneme nunaᴋartuksauvotit ᴋanitamnêdlutit, igvillo ᴋitorngatillo erngutatillo saugaᴋotitillo tuktuvaᴋotitillo perᴋutitillo ilûnatik.

¹¹ Tagvane pattangaititsomavagit, sulle jârinik tallimanik kângarnartoᴋsoaᴋarniarmat, ajulerᴋonak igvit inuᴋotitillo perᴋutitillo tamaita.

¹² Ahâk, ijipse takovânga, nukamalo Benjaminib ijîkita takovânga, ᴋanipkut oᴋarvigigapse.

¹³ Nakorijaunera ilûnât Egipteneme oᴋautigisiuk atâtamnut takojaselo tamaita; tuavidluselo atâtaga tamaungartisiuk.

¹⁴ Nukanelo Benjamin ᴋongasingagut erᴋipâ ᴋeavlunelo, Benjaminelo ᴋeagivoᴋ ᴋongasingane.

¹⁵ Katangutinelo tamaita kunikpait ᴋeavigivlugillo, kingornganelo ᴋatangutingita oᴋarᴋatigivât.

¹⁶ Farauble iglungane tussaumajauvoᴋ, oᴋartoᴋarmat: Josefib ᴋatangutingit tikkisimavut. Tamanna Faraub kivgangitalo ᴋuviasûtigivât.

¹⁷ Faraublo Josefe oᴋautivâ: Katangutitit oᴋautikit: Imailioritse; siuterᴋortojoᴋotise ussilertorsigik aularluselo Kânaanib nunanganut.

¹⁸ Atâtaselo inuᴋotiselo illagivlugit ᴋailauritse uvamnut, nunab Egiptenib pitangita ânanauninginik tunitjivigijomavapse, nunablo pitangita ajungininginik nerᴋiksaᴋarniarpose.

¹⁹ Igvit perᴋojauvotit; imailioritse [gôk]: Kamutit aksaloalît neksarniarsigik nunamit Egiptenemit ᴋitorngapsingnut nuliapsingnullo, atâtaselo aivlugo tikkilermititse.

²⁰ Perᴋutiselo ivleriniarasigik, nunab Egiptenib ilûnane pitangita ânanauningit nangminerijaksarigapsigik.

²¹ Taimailiorpullo Israêlib erningit. Josefiblo ᴋamutinik aksaloalingnik tunitjivigivait Faraub perᴋojanga maliklugo, taᴋoaksanginiglo.

²² Ilûnaita attunit tunitjivigivait annorâtsiamik atautsemik, Benjaminele tunitjivigivâ kênaujanik 300nik annorâtsianiglo tallimanik.

²³ Amma atâtaminut tujûtigivait siuterᴋortojut tellimaujortut, Egiptenib pitangita ânanauningita illanginik nangmartut, siuterᴋortojullo arnaujut tellimaujortut, ᴋaᴋᴋôjaksanik ᴋaᴋᴋôjaniglo, atâtame taᴋoaksanginik, nangmartut.

²⁴ Katangutine tagva aularᴋovait. Aularmatta oᴋautivait; ningautiniarasetôᴋ ingergatiluse.

²⁵ Egiptenemillo paungaramik, atâtatik Jako, nuname Kânaanemêtoᴋ, tikkipât.

²⁶ Unipkârvigivlugolo oᴋautivât; Josefe inôvoᴋ sulle, attaniovorlo nuname Egipteneme ilûnâne. Kissiane ômatinga ônartailivoᴋ, okperingimagit.

²⁷ Tagva Josefib oᴋausingit tamaita oᴋautigivait tâpsomunga oᴋauserijangit taipkonunga. Kamutillo aksaloalît takolermagit, Josefib tujûtigijangit, ᴋemuksiutigijaksane, tagva atâtangata Jakob anerninga ômalerivoᴋ.

²⁸ Oᴋarporlo Israêle: Nâmaksivoᴋ! Ernera, Josefe sulle inôvoᴋ; takojartoromavara toᴋolerᴋârnanga.