Genesis 44 - Labrador Inuttitut Heritage Bible

Josefib ᴋatangutine ôktorpait.

¹ Tagva pimaklertoᴋotine perᴋovâ oᴋautilâlo: Angutit tâpkoa pôngit nerᴋiksanik tattakit ajungitanginik, ilûnatiglo attunit kênaujangit ᴋalliutivlugit pônginut.

² Ermguseralo, ermguseᴋ silbereojoᴋ, nukardlerpâb pônganut ᴋalliutijaksarivat, kênaujallo ᴋaᴋᴋôjaksarsiniutigijangit. Taimailiorporlo, sorlo Josefib oᴋarvigingmago.

³ Kaulermalle, angutit tâpkoa siuterᴋortojoᴋotingillo aularᴋovait.

⁴ Iglugasaksoarnille anisimangmatta, ᴋanitomêtilugit sulle, Josefib pimaklertoᴋotine oᴋautivâ: Attê, tuavilutit angutit taipkoa udlakit; angukungnelo oᴋarvigijaksarivatit: Sôᴋ ajungitoᴋ ajortomut akkiniarpisiûk?

⁵ Tâmnaungilâᴋ nâlekama imervigijanga nalautaijutigijangalo? Idluitulivose taimailiorapse.

⁶ Angugamigillo, oᴋautsit tamakkoa oᴋautigivait taipkonunga.

⁷ Kiovâlle: Sôᴋ angajoᴋâvut taimaitunik oᴋauseᴋarᴋâ? Taimailiorneᴋ ajornarpoᴋ kivgarnut.

⁸ Takkuit, kênaujat pôptingne ᴋalliutisimajut nagvâraptigik, uttertipavut illingnut nunamit Kânaanemit. Sugapta nâlekavit iglunganit silberemik goldemiglônêt tigliktuksaunajarᴋitâ?

⁹ Kivgavit nalliat mattominga nagvârviojoᴋ toᴋotaksauvoᴋ, amma uvaguttauᴋ kivgaujomavogut nâlegaptingnut.

¹⁰ Oᴋautivait: Sorlo oᴋarapse taimaile. Nalliat mattominga nagvârviojoᴋ kivgaujuksauvoᴋ uvamnut, illipsele kivgauniangilase.

¹¹ Tuavilutiglo ilûnatik pôtik illivait nunamut, ilûnatiglo pôtik ᴋelarudjârpait.

¹² Kenerasuarporlo angajuklerpâb pônganit pigiarlune nukardlerpâb pônganut tikkidlune; ermguserlo Benjaminib pôngane nagvârtauvoᴋ.

¹³ Tagva annorâtik alikpait, siuterᴋortojoᴋotitiglo ussilertormivlugit, ilûnatik iglugasaksoarnut utterput.

¹⁴ Judalo ᴋatangutingillo iterput Josefib iglunganut tagvanêtilugo sulle, pâmakterpullo sânganut.

¹⁵ Josefible oᴋautivait; Sugapse taimailiorᴋisê? Kaujimangilasê, angut uvaptun-itoᴋ nalautaijungnarmât?

¹⁶ Juda oᴋarpoᴋ; Sumik oᴋartuksauvitâ attaniptingnut? Kanorlo oᴋauseᴋartuksauvitâ? Kanorlônêt idluarsitilutâ? Gûdib kivgavit idluituliningit nagvârpait. Tagga! attanimnut kivgaulerpogut uvagut tâmnalo ermgusermik nagvârviojoᴋ.

¹⁷ Oᴋarporle: Taimailiorneᴋ ajornarpoᴋ uvamnut. Ermgusermik nagvârviojoᴋ tâmna kivgaujuksauvoᴋ uvamnut, illipsele ullapirᴋsauteᴋarluse paungaritse atâtapsingnut.

¹⁸ Tagva Judab sângerpâ oᴋarlune: Attaneng-ai? kivgat oᴋâlagalâlauletôᴋ attanera tussartilugo, ningaumajârnîllo katsungainiaranetôᴋ kivgarnut, Faraotut igalloaravit.

¹⁹ Attanerma kivgatit aperingmagit oᴋarlune: Atâtaᴋarᴋisê ᴋatanguteᴋarluselônêt?

²⁰ Kiovogut tagva attaniptingnut: Itomik atâtaᴋarpogut, inôsuktoᴋarivoᴋtauᴋ inutoᴋauningane inôlertomik; tâpsoma angajua toᴋovoᴋ, kissime amiakôvoᴋ anânaminit, atâtangatalo nagligidlarpâ.

²¹ Tagva kivgatit oᴋautivatit; Tamaungartisiuk uvamnut, takojomagapko.

²² Uvagulle oᴋarpogut attanimnut: Inôsuktub atâtane ᴋemaklugo sapperpâ; ᴋemakpago, atâtanga toᴋolerajarpoᴋ.

²³ Tagva oᴋarpotit kivgarnut: Nukase tamaungarᴋatigingikupsiuk, kênara takojaksaringilase.

²⁴ Tagva paungarpogut kivgarnut atâtamnut, ᴋaujitilugo attanima oᴋausinginik.

²⁵ Atâtaptalo oᴋautivâtigut; Aularmititse, nerᴋiksagalâmik pisiniutivluta.

²⁶ Kiovogulle; Attersarluta ajorpogut. Nukavut illagiguptigo kissiane attersaromavogut, angutib taipsoma kênanga takojaksaringinaptigo nukavut illaginago.

²⁷ Tagva kivgavit atâtama oᴋautivâtigut: Nelungilase nuliara maggungnik erningmat uvamnut:

²⁸ Aipâ uvamnit aularsimavoᴋ, oᴋarpungalo: Aliktorsimajoᴋ, nalonalungilaᴋ; takojungnaipara mâna tikkidlugo.

²⁹ Unatauᴋ uvamnit aularutikupsiuk ᴋanoetomullo tikkitaupat, uvanga ᴋêrtojunga kanungartinajarpapsinga toᴋungajut inninganut kiksarnermut.

³⁰ Kivgarnut atâtamnut mâna angeraruma inôsuktoᴋ illaginago, (tarningata ôma tarninga ungagidlarmago).

³¹ Imainiarpoᴋ: Takogune, inôsuktoᴋ saᴋᴋijârungnairmat, toᴋolerajarpoᴋ, uvagullo kivgavit atâtavut kivgait ᴋêrtojoᴋ kanungartinajarpavut toᴋungajut inninganut kiksarnermut.

³² Kivgait oᴋarpoᴋ atâtamnut inôsuktoᴋ akkisartoromavlugo, oᴋarlunga: Illingnut uttertingikupko, inôsera nâvlugo passijaksaujutigijomavara.

³³ Tamanna pivlugo kivgat attanimnut kivgauvlune tamânêle inôsuktoᴋ simerdlugo, inôsuktorle paungarle ᴋatangutine illagivlugit.

³⁴ Sugama atâtamnut paungartuksauvêk inôsuktoᴋ illaginago? Kapianartoᴋ atâtama tikkitautigijanga takojariaᴋarajarpara.