Genesis 43 - Labrador Inuttitut Heritage Bible

Jakob erningit aipanganik ingergavut Egiptenemut.

¹ Kangnartoksoarle oᴋumaidlarpoᴋ nuname.

² Kaᴋᴋôjaksaniglo, Egiptenemit tikkiutijamingnik nungutsingmatta, atâtangata oᴋautivait: Amma ingergaleritse, nerᴋiksagalânik pissiniutivluta.

³ Tagva Judab oᴋautivâ oᴋarlune: Angut taimna ilungertumarikpoᴋ uvaptingnut, oᴋarlune: Kênara takojaksaringilase, kissiane nukase illagigupsiuk.

⁴ Taimaimat, nukavut uvaptingnut illaurᴋogungne attersaromavogut taununga nerᴋiksanik pisiniutivlutit.

⁵ Illaurᴋongikungnele, attersaromangilagut taununga, angut taimna oᴋarmat uvaptingnut: Kênara takojaksaringilase, kissiane nukase illagigupsiuk.

⁶ Israêlele oᴋarpoᴋ: Sôᴋ taimak ajortomik pivisingâ, angut taimna ᴋaujitigapsiuk nukaᴋarnipsingnik sulle?

⁷ Kiovât: Angutib taipsoma aperᴋutigiluarpâtigut illavullo, oᴋarlune: Atâtase sulle inôvâ? Sulle nukaᴋarᴋisê? Kaujitipavut tagva, sorlo apertsormattigut. Kanorle ᴋaujijungnarᴋitâ oᴋarniarmat: Nukase tamaungartisiuk?

⁸ Judablo atâtane Israêle oᴋautivâ: Inôsuktoᴋ uvamnut illaurᴋoguk, tagva parngnaileromavogut ingergalutalo, inôrᴋovluta toᴋolerᴋonatalo uvagullo igvillo ᴋitorngavullo.

⁹ Uvanga akkisartoromavara, aggamnit pijomajaksarivat. Illingnut uttertingikupko ijîkpit sângangnut pitilugo, inôsera nâvlugo passijaksaujutigijomavara.

¹⁰ Taimak utterᴋeangatuinalungikupta, maggoertorluta utterêrajarpogut.

¹¹ Tagva atâtangata Israêlib oᴋautivait: Taimaitsariaᴋarpat, imailioritse: Nunab pingita annernarnerpât illanginik pôpsingnut illijivluse, angumut taipsomunga pilliutinik neksaritse: mingoarutegalâmik erngautaujagalâmiglo, tauvluᴋutinik, kutsomiglo, saunanik, saunâlungniglo.

¹² Kênaujaniglo aipainginik naksaritse, taipkoa pôpsingne ᴋallipautivlutik uttersimajut naksarmivlugit; tammartoᴋarnerpallaingmat.

¹³ Nukase illagisiuk, parngnailerluselo ingergalermititse angumut taipsomunga.

¹⁴ Gûdible ajugaᴋangitub nâpkigijautilise angutib taipsoma sângane, ᴋatangutise Benjaminelo illaurᴋojauniartilugik illipsingnut! Uvangale ᴋitorngairutiguma, ᴋitorngairutivunga.

¹⁵ Tagva angutit tâpkoa tiguvait pilliutiksatik, kênaujallo naksarpait maggoertorlutik, Benjaminelo illagivlugo parngnailerput, ingergavullo Egiptenemut, Josefelo tikkipât.

¹⁶ Josefible takogamigit Benjaminelo illagijangat, pimaklertoᴋotine oᴋautivâ: Angutit ukkoa itertikit iglomut, nergjutiniglo toᴋotsivlutit nerᴋiksaliorit, ᴋetteralersiumik nerriᴋatiginiarmanga.

¹⁷ Taimailiorporlo angut, Josefib oᴋausingit maliklugit, angutit itertilugit Josefib iglunganut.

¹⁸ Tâpkoale sivôralerput, Josefib iglunganut itertitauleramik, oᴋarpullo: Kênaujat taipkoa sivorngane pôptingnut uttersimajut pivlugit itertipâtigut tamaunga, opaluigomavluta pidlaromavlutalo, kivgaurᴋovluta tâpsomunga uvagullo siuterᴋortojoᴋotivullo.

¹⁹ Tagva Josefib pimaklertoᴋotinga sâvigivlugo oᴋauseᴋarvigivât iglub pângane,

²⁰ Oᴋarlutik: Angajoᴋâng-ai? Sivorngane tamaungarapta nerᴋiksanik pissiniarluta,

²¹ Siniktarvingmut tikkidluta pôvut ᴋellarudjâraptigik, sunaubva, illûnata attunit kênaujavut pôptingne ᴋallipautivut, kênaujavut ilangersimalungitut; tamakkoa naksarpavut.

²² Kênaujaniglo aipainginik naksarpogut, nerᴋiksanik pisiniaromavluta. Nallovogut kia kênaujavut pôptingnut illimangâgit.

²³ Kiovait: Ullapirᴋsauteᴋaritse sivôraniaraselo. Gûdipse atâtapselo Gûdingata pilliutinik tunitjivigivâse pôpsingnut; kênaujase pivakka. Tagva Simeon anitipâ tâpkonunga.

²⁴ Josefiblo iglunganut itertipait imermiglo ᴋaitsivoᴋ, ittikamingnik ubvarᴋovlugit, siuterᴋortojoᴋotingillo nerripkarpait.

²⁵ Tâpkoale pilliutiksat âᴋiksorpait Josefe tikkitsiarivlugo uvlub ᴋetterarningane, tussaramik tagvane nerrijuksaunermingnik.

²⁶ Josefe iglomut itermat, piliutit neksartatik tâpsomunga âpait iglomut pâmangavigivlugo.

²⁷ Tâpsomalo apertsorpait ᴋanoengitsiarmangâta, oᴋarlune: Atâtase îtoᴋ oᴋautigijase ᴋanoengitsiarᴋâ? Sulle inôvâ?

²⁸ Kiovât: Kivgat atâtavut ᴋanoengitsiarpoᴋ, sulle inôvoᴋ. Okkovlutiglo pâmangavigivât.

²⁹ Josefiblo takosarlune nukane Benjamin, anâname erninga, takovâ oᴋarlunelo: Tâmnauvâ nukase oᴋautigijase uvamnut? Oᴋarivorlo: Gûdib saimarlitit, ernîk!

³⁰ Josefelo anisârpoᴋ, illumigut nukane nagligidlaramiuk, ᴋeaviksarsiorlunelo sinigvingminut iterpoᴋ ᴋealarmelo tagvane.

³¹ Ermikamele anivoᴋ nunuvlunelo oᴋarpoᴋ: Nerᴋiksamik ᴋaitsileritse!

³² Kaitsivullo tâpsomunga ingmikut, taipkonungalo ingmikut, Egiptenemiunullotauᴋ ingmikut, Egiptenemiut Ebrêerit nerriᴋatigijaksaringimagit, Egiptenemiunut tamanna maᴋojungnarmat.

³³ Ingerᴋovaillo tâpsoma sânganut, angajukleᴋ angajuklioninga maliklugo, nukardlerlo nukardlioninga maliklugo. Tamanna pivlugo tataminiadlarput.

³⁴ Nerᴋiksaniglo âtsivut Josefib sânganit taipkonunga, Benjamin âtsivigivlugo illangita piksangit tellimairtorlugit; imerpullo imermik nâmaksivlutik illagivlugo.