Genesis 42 - Labrador Inuttitut Heritage Bible

Jakob erningit ingergatainarput Egiptenemut.

¹ Jakoble, takogame Egipteneme ᴋaᴋᴋôjaksanik pissijaksaᴋarmat, ernine oᴋautivait: Sôᴋ takonautituinarᴋisê?

² Oᴋarporlo: Ahâk, tussarpunga, Egipteneme ᴋaᴋᴋôjaksanik pissijaksaᴋarmat; taununga attersaleritse ᴋaᴋᴋôjaksanik pissiniutivluta taunangat, inôjungnarᴋovluta toᴋolerᴋonatalo.

³ Tagva Josefib ᴋatangutingit tallimaujortut attersarput, ᴋaᴋᴋôjaksanik pissijartoromavlutik Egipteneme.

⁴ Benjaminele, Josefib nukanga, Jakob illaurᴋolungilâ ᴋatangutinginut, oᴋarame: ᴋanoetomut tikkitaujungnarajarmat.

⁵ Taimak Israêlib erningit tikkiutivut ᴋaᴋᴋôjaksarsiniartut illagivlugit, Kânaanib nunangane kângnartoᴋarmattauᴋ.

⁶ Josefible, attaniotijub nuname, tâpsoma ᴋaᴋᴋôjaksat tuniorᴋapait nunab inunginut tamainut. Katangutingitalo Josefe tikkinamitsuk, pâmangavigivât.

⁷ Josefiblo ᴋatangutine takonâramigit illitarilerpait, takorngartausertorporle, kuksanartomiglo oᴋarvigilugit oᴋarpoᴋ: Nakit pivisê? Kiovât: Kânaanib nunanganit nerᴋiksarsiniarluta.

⁸ Josefiblo ᴋatangutine illitarigalloarmagit, tâpkoa illitaringilât.

⁹ Josefele sinnaktômanermik erᴋaivoᴋ, ᴋanoᴋ sinnaktômagame pivlugit, oᴋarporlo: Nautsertoriarteovose, nunab sappulutaᴋangininga nane takojartorlugo.

¹⁰ Kiovâllo: Aukagle, attaneᴋ. Kivgatit tikkiput nerᴋiksarsijomavlutik.

¹¹ Tamapta angutib atautsib ernerivâtigut, pingitsertulungilagut, kivgatit nautsertoriarteolungilat.

¹² Oᴋautivaille: Aukak, nunable sappulutaᴋangininga nane takojartorpase.

¹³ Kiovât: Uvagut kivgatit angutib atautsib, nuname Kânaanemêtub, ernerivâtigut — nukarêt 12 — nukardlerpâᴋ sulle atâtaptingnêpoᴋ, atauseᴋ saᴋᴋijarungnairpoᴋ.

¹⁴ Josefiblo oᴋautivait: Taimaipoᴋ, sorlo oᴋarvigigapse: nautsertoriarteovose.

¹⁵ Mattominga ôktortauniarpose: Sorlo Farao inôngmat illa, tagvangat aulartuksaungilase, ᴋatangutise nukardlerpâᴋ tikkingipat ovunga.

¹⁶ Illase atauseᴋ tillisiuk, nukapsingnik aiklerᴋovlugo, illipsele parngnanairsimavingmêniarpose. Taimak oᴋausise ôktoromavakka, mikseᴋârtunik oᴋauseᴋarmangâpse. Taimaingipat, — sorlo Farao inôngmat illa! — nautsertoriarteovose.

¹⁷ Pitipaillo ilûnaita parngnanairsimavingmut atautsemut uvlunik pingasunik.

¹⁸ Uvlullo pingajuane Josefib oᴋautivait: Imailioritse, tagva inôjuksauvose, Gûde opigigapko.

¹⁹ Pingitsertulungikupse, illase atauseᴋ ᴋelaksorsimale parngnanairsimavipsingne, illipsele aularitse, ᴋaᴋᴋôjaksat inuᴋotipse perlerêkutiksangit angerautivlugit.

²⁰ Nukaselo tikkiutisiuk uvamnut, tagva oᴋausise okpernarniarput toᴋolertuksaungilaselo. Taimailiorput tagva.

²¹ Oᴋauseᴋautivullo: Sôkiak pidlartauvogut nukavut pivlugo, tarningata kappiasungninga takogaptigo, ᴋenuvigingmattigut, uvagullo tussaromalungitavut; tamanna pivlugo kappianartomut tamattomunga tikkitauvogut.

²² Rubeniblo kiovait oᴋarlune: Oᴋarvigilaungilapsê, oᴋarlunga: Idluituliniarase nukapiamut? kissiane nâlagomangilase. Sunaubva, aunga akkilertaulerpoᴋ.

²³ Nallovulle, Josefib tukisingmagit, oᴋarteᴋarlune oᴋarvigingmagit.

²⁴ Tunupaillo ᴋeavlune; amma sâvigivait oᴋarvigivlugit; Simeonelo tiguvâ akornganit ᴋelaksorlugolo takoane.

²⁵ Josefelo perᴋojivoᴋ, pôngit ᴋaᴋᴋôjaksanik tattataurᴋovlugit, kênaujaᴋotingillo illijaumerᴋovlugit ilûnatik attunit pônginut, taᴋoaksamiglo tunitjiviorᴋovlugit. Taimailiorvigivaillo.

²⁶ Tagva ᴋaᴋᴋôjaksarsiatik illivait siuterᴋortojoᴋotimingnut aularlutiglo tagvangat.

²⁷ Siniktarvingmele illangata pône ᴋelarutjâramiuk, siuterᴋortojoᴋutine nerripkaromavlugo, kênaujaᴋutine takovait, sunaubva, pôngme ᴋalliutijut.

²⁸ Katangutiminullo oᴋarpoᴋ: Kênaujaᴋotikka amma pigigivakka, tagga pômnênerput. Tagva ᴋoaᴋsârput sajuklutiglo, oᴋauseᴋautivullo: Sôᴋ Gûdib taimailiorvigivâtigût?

²⁹ Atâtamingnut Jakomut angeraramik nunamut Kânaanemut, iliortaunermingnik tamainik unipkârvigivât, oᴋarlutik:

³⁰ Angutib taipsoma, nunab nâlegangata, kuksanartunik oᴋauseᴋarvigivâtigut, nunamik nautsertoriarteonerarluta.

³¹ Kiovavulle: Pingitsertulungilagut, nunamik nautsertoriarteotsangilagut.

³² Atâtapta ernerivâtigut — nukarêt 12 — kissiane atauseᴋ saᴋᴋijârungnairpoᴋ, nukardlerpârlo atâtaptingnêpoᴋ sulle nuname Kânaaneme.

³³ Tagva angutib taipsoma, nunab nâlegangata, oᴋautivâtigut: Mattominga ôktûteᴋarniarpunga, pingitsertulungimangâpse: Katangutise atauseᴋ uvamnêniarpoᴋ, illipsele, inuᴋotipse perlerêkutiksangit naksarlugit, aularniarpose.

³⁴ Katangutiselo nukardlerpâᴋ tikkiutisiuk uvamnut, tagva tukisiniarpunga nautsertoriarteolunginapse pingitsertulunginapselo; ᴋatangutiselo uttertitsomagivara illipsingnut, niuverungnarniarposelo nuname.

³⁵ Pôtiglo navingmagit, sunaubva, ilûnatik attunit kênaujaᴋotingit ᴋipisimajut pônginêput. Takogamigle kênaujaᴋotimingnik ᴋipisimajunik, ᴋoaᴋsârput, tâpkoa atâtangallo.

³⁶ Tagva atâtangata Jakob oᴋautivait: Kitorngairutilerpapsinga; Josefe saᴋᴋijârungnairpoᴋ, Simeone saᴋᴋijârungnairpoᴋ, Benjamin naksaromavase. Makkonunga tamainut tikkitauvunga.

³⁷ Rubenible atâtane kiovâ oᴋarlunelo: Uttertingikupko illingnut, ernîkka toᴋotaksarivakik. Aggamnut pitituinaruk, illingnut uttertitsomavara.

³⁸ Oᴋarporle: Ernera illagivluse attersaᴋataujuksaungilaᴋ, angajua toᴋungmat, tâmnalo kissime amiakôngmat. Ingergatiluse apᴋome ᴋanoetomut tikkitaupat, ᴋêrtojunga kanungartinajarpapsinga toᴋungajut ininganut kiksarnermut.