Genesis 41 - Labrador Inuttitut Heritage Bible

Josefe aulatsijungolerpoᴋ Egipteneme.

¹ Jarik magguk nângmanik, Farao sinnaktômavoᴋ: kôksoarme nangerdlune.

² Sunaubvalo, kôksoarmit ᴋaᴋivut tuktuvait sepat takominartut ᴋuinijullo, nerrinasuktut iviksoarnik.

³ Sunaubvalo, kingorngatigut tuktuvait sepat assingit kôksoarmit ᴋaᴋivut takominaitut sallôjullo, kôksûb sinâne tuktuvait ipkoa sannianêlutik.

⁴ Tuktuvaillo tâpkoa takominaitut sallôjullo nerrivait tuktuvait taipkoa sepat takominartut ᴋuinijullo. Tagva Farao tupalerpoᴋ.

⁵ Sinisingmivlune aipanganik sinnaktômavoᴋ: Sunaubva, sullugainerit sepat nuilerput ivingmit atautsemit angijut silliktullo.

⁶ Sunaubvalo, kingorngatigut nuilerput sulugainerit sepat amitut, uarngnarmut ᴋunorlertut.

⁷ Sulugainerillo amitut tâpkoa êvait sulugainerit taipkoa silliktut angijullo. Tupalerlune Farao malugosulerpoᴋ sinnaktômanerminik.

⁸ Kaulermalle, tarnimigut issumajârpoᴋ, tiliklerporlo ᴋairᴋovlugit aglangnik illisimajut tamaita, sillatujullo tamaita Egiptenemêtut, sinnaktômanerijanelo unipkautigivait tâpkonunga. Kissiane nallonaijaijungnartoᴋalungilaᴋ tamakkoninga Faraomut.

⁹ Tagva imiksaliortit angajoᴋângata Farao oᴋarvigivâ oᴋarlune: Uvlome idluitulinimnik erᴋailerpunga.

¹⁰ Taipsomane, Faraub kivgângne ningaringmagik, uvangalo ᴋaᴋᴋôjaliortillo angajoᴋângat parngnanairsimavingmut pitilunuk, attanermik udjertortut angajoᴋângata iglunganut;

¹¹ Taipsomane sinnaktômavoguk unnuarme atautseme uvangalo taimnalo, attunit sinnaktômanermik ingmigut tukelingmik.

¹² Tagvanelo illagivavuk inôsuktoᴋ Ebrêereojoᴋ, attanermik udjertortut angajoᴋângata kivganga. Taimna unipkârvigigaptigo, sinnaktômaniptingnik nallonaijaivigivâtiguk, nallonaijaivigivlunuk attunit sinnaktômaniptingnik.

¹³ Sorlolo nallonaijaivigingmattiguk, taimak nalautsivoᴋtauᴋ: uvanga kivgartorvigijamnut uttertitauvunga, imnale nivingarpâ.

¹⁴ Farao tagva tiliklerpoᴋ Josefe ᴋairᴋovlugo, tuavidlarlutiglo anitipât parngnanairsimavingmit. Sallijaurᴋârdlune annorâtârame, iterpoᴋ Faraomut.

¹⁵ Faraublo Josefe oᴋarvigivâ: Sinnaktômavunga nallonaijaijoᴋartinago tukinganik: igville tussarpagit oᴋautigijauvlutit, sinnaktômanernik tussartuaruvit, sappinginangne nallonaijarlugo.

¹⁶ Josefiblo Farao kiovâ oᴋarlunelo: Uvanga pingitunga; Gûdib Farao ajungitunik nallautaiviginiarpâ.

¹⁷ Faraub tagva Josefe oᴋautivâ: Sinnaktômavunga kôksûb sinâne nangerdlunga:

¹⁸ Sunaubva, kôksoarmit ᴋaᴋivut tuktuvait sepat ᴋuinijut takominartullo, nerrinasuktut iviksoarnik:

¹⁹ Sunaubvalo, kingorngatigut ᴋaᴋivut tuktuvait sepat assingit piungitut, takominaitut, sallôjut. Taimak takominaitigijunik takolungitunga Egiptenib nunangane ilûnâne.

²⁰ Tuktuvaillo tâpkoa sallûdlartut takominaitullo nerrivait tuktuvait taipkoa sepat sivorlît ᴋoinijut.

²¹ Illumingnullo pitigalloarmagit, malungnalungilat illuanut pititaujut, sivornganetut takominaiput. Tagva tupalerpunga.

²² Amma sinnaktômavunga: Sunaubva, sulugainerit sepat nuilerput ivingmit atautsemit silliktut ajungitullo:

²³ Sunaubvalo, kingorngatigut nuilerput sulugainerit sepat piungitut, amitut, uarngnarmut ᴋunorlertut.

²⁴ Sulugainerillo tâpkoa amitut êvait sulugainerit ipkoa ajungitut. Tamakkoa oᴋautigigalloarpakka aglangnik illisimajunut, kissiane nallonaijaivigijungnangilânga.

²⁵ Josefib Farao kiovâ: Tamattomingatsainaᴋ Farao sinnaktômavoᴋ. Gûdib Farao nallojungnairtipâ piniaromârnerminik.

²⁶ Tuktuvait taipkoa sepat ajungitut tagva jârit sepat, sulugainerillo taipkoa sepat ajungitut tagva jârit. Sinnaktômaneᴋ tâmnatsainauvoᴋ.

²⁷ Tuktuvait taipkoa sepat sallôjut takominaitullo, kingorliovlutik ᴋaᴋijut, tagva jârit sepat; tamaktauᴋ sulugainerit sepat amitut uarngnarmullo ᴋunorlertut: sepanik kângnartunik jâreᴋaromârmat.

²⁸ Taimaipoᴋ, sorlo Faraomut oᴋarama: Gûdib Farao nallojungnairtipâ piniaromârnerminik.

²⁹ Takkuit, jârit sepat akluinartut nalliutijomârput Egiptenemut ilûnânut.

³⁰ Kingorngatigullo jârit sevenit kângnartut pijomârput; Egiptenib akluinartoᴋsôninga puigortautilugo; kângnartoᴋsûblo nunamiut nungutsomârpait.

³¹ Akluinartomiglo nuname ᴋaujijungnairomârput kângnartoᴋsoaᴋ pivlugo kingorngagut pijomârtoᴋ, oᴋumailuaromârmat.

³² Faraole maggoertorlune taimak sinnaktômangmat, tukeᴋarpoᴋ: Gûdeme tamanna kajusijutaumaringmat, Gûdelo tuavilune taimailiulârmat.

³³ Taimaimat Faraub angut silatutsiartoᴋ illisimajorlo ᴋennerliuk mâna, aulatsijungortiniarlugolo Egiptenemut.

³⁴ Taimailiorlunelo Farao illijingmile pimajiksaminik nunamut, tigulugolo ilûnarsoangita tallimangat Egipteneme, jârit akluinartut nalliutitilugit.

³⁵ Jârillo ajungitut nalliutitilugit, nerᴋiksanik sunatuinarnik kattersoilit taipkoa, ᴋaᴋᴋôjaksanik ᴋematuliviliutjivlutik Faraub kamagijaksanginik, nerᴋiksaujunik iglugasaksoarmiunut, torᴋorlugillo.

³⁶ Nerᴋiksalle tamakkoa nunamiut piksarijomârpait jârinut sepanut kângnartunut, Egiptenemut pijomârtunut, nunamiut kângmut perlerᴋonagit.

³⁷ Oᴋautsit tamakkoa Faraublo kivgangitalo ilûnatik idluarivait.

³⁸ Faraublo kivgane oᴋautivait: Nagvârniaralloarᴋitâ angumik ôma assianik, Gûdib anerninganik illumilingmik?

³⁹ Josefemullo Farao oᴋarpoᴋ: Gûdib tamakkoa tamaita illingnut nallonairmagit, taimaimat illiktut silatujomik illisimajoᴋangilaᴋ.

⁴⁰ Igvit iglumne aulatsijuksauvotit, inuᴋotimalo ilûnatik oᴋautsitit nâlagaksarivait, attanersûb iksivautanga kissiat pinersaujutigivara illingnit.

⁴¹ Amma Faraub Josefe oᴋautivâ: Takovat, aulatsijungortigapkit Egiptenemut ilûnânut.

⁴² Faraublo ᴋetterdlermine (naᴋitjut) aggangminit pêrpâ Josefib agganginut illivlugo, annorâtârtilugolo sâtomik, ᴋaᴋortamik, ᴋelaumgujangoarniglo goldeojunik ujamiktilugo.

⁴³ Kemukserᴋovâlo ᴋamutiᴋotîngme (aksalloalîk) aipâkikut, nipliavullo sivorngagut: Pâmakteritse! Taimak Egiptenemut ilûnânut aulatsijungortipâ.

⁴⁴ Farauble Josefe oᴋautivâ: Uvanga tagva Farao. Igville perᴋungitarnik aggangminiglônêt ittigaminiglônêt aulatsijoᴋartuksaungilaᴋ Egipteneme ilûnâne.

⁴⁵ Faraublo Josefe atserarpâ: Sapnat-panîamik, nuliaᴋartipâlo Asnatemik, ajoᴋertuijub Onemêtub Potiferab paninganik. Tagva Josefib Egiptene takojartorpâ.

⁴⁶ Josefe jâreᴋarpoᴋ 30nik, Faraub Egiptenib attanertangata sânganut nangeriartorame. Faraomille aularlune ingergalerpoᴋ Egiptenekut ilûnâgut.

⁴⁷ Nunalo amigangiluartunik paungaᴋarpoᴋ jârine taipkonane sepane akluinartune.

⁴⁸ Jârillo sepat taipkoa nalliutitilugit, nerᴋiksat sunatuinait Egiptenemêtut kattersorpait, iglugasaksoarnut pitilugit. Nerᴋiksat, iglugasaksuit nelliata erᴋâne perortut, illuanut pitipait.

⁴⁹ Taimak Josefe ᴋaᴋᴋôjaksanik unuktovaksoarnik ᴋematuliviliutjivoᴋ, imab siorangititut itilugit; kititsungnaisinnalerpait, kititaujungnangimatta.

⁵⁰ Jarit kângnartut nalliuterᴋârtinagit Josefe maggungnik ernertârpoᴋ, Asnatib, Potiferab ajoᴋertuijub Onemêtub paningata, erniaringmagik tâpsomunga.

⁵¹ Josefiblo angajukleᴋ Manassemik atserarpâ, (oᴋarlune:) Gûdib puigortingmanga siorniornimnik atâtamalo iglunganik ilûnânik.

⁵² Aipanga Efraimik atserarpâ, (oᴋarlune:) Gûdib aglisitingmanga nuname kappiasugvingme.

⁵³ Jarillo sepat taipkoa akluinartut, Egiptenemut nalliutijut, nângmatta,

⁵⁴ Jârit sevenit kângnartut nalliutilerput, sorlo Josefib oᴋautigingmagit. Kângnartoᴋsûblo nunat tamaita tikkipait, kissiane Egipteneme ilûnâne nerᴋiksaᴋarpoᴋ.

⁵⁵ Egiptenemiullo ilûnatik kâlermatta, inuit nipliadlarput Faraomut nerᴋiksaᴋaromamut. Farauble Egiptenemiut tamaita oᴋautivait: Josefemut aileritse; sumik perᴋungmase, piniaraksarivase.

⁵⁶ Kângnartoᴋsoarle pidlalermat nunanut tamainut, Josefib ilûnâne ᴋematulivît ᴋaᴋᴋôjaksatalît upkoerpait, pissiaksaᴋartilugo, kângnartoᴋsoaᴋ sugalulualermat Egipteneme.

⁵⁷ Nunanillo tamainit Egiptenemut tikkilerput, niuvervigijomavlugo Josefe, kângnartoᴋsoaᴋ sugaluluarmat nunane tamaine.