Genesis 40 - Labrador Inuttitut Heritage Bible

Josefib parngnanairsortauᴋatîngne sinnaktômanîgik nelonaijarpak.

¹ Pijokartut tamakkoa kingorngatigut, Egiptenemiut attaningata imiksaliortinga ᴋaᴋᴋôjaliortingalo idluitulivuk angajoᴋâmingnut Egiptenemiut attaninganut.

² Faraublo ningarilerpak kivgaᴋotîngne tâpkoa imiksaliortit angajoᴋângat ᴋaᴋᴋôjaliortillo angajoᴋângat.

³ Parngnanairsortaurᴋovaglo attanermik udjertortut angajoᴋângata iglunganut, parngnanairsimavingmut Josefib parngnanairsortauvianut.

⁴ Attanermiglo udjertortut angajoᴋângata Josefe kivgartorᴋovâ tâpkungninga. Parngnanairsimavingmêpuglo uvlut ᴋapsit.

⁵ Tamarmiglo sinnaktômavuk, Egiptenemiut attaningata imiksaliortinga ᴋaᴋᴋôjaliortingalo parngnanairsimavingme parngnanairsortaumajûk, tamarmik ingmikut sinnaktômavlutik unnuarme atauserme, attunit sinnaktômanermik ingmigut tukelingmik.

⁶ Josefiblo uvlâkut itervigigamigik, takovak, sunaubva, kiksartûk.

⁷ Aperivaglo Faraub kivgâgik parngnanairsortauᴋatigijângne angajoᴋâme iglungane, oᴋarlune: Sôᴋ tauturlukitîk uvlome?

⁸ Kiovâk: Sinnaktômavoguk, nellonaijaijoᴋartinago tukinganik. Josefible oᴋautivak: Nellonaijaigiaᴋ ilingalungilâᴋ Gûdemut? Unipkârvigitinga-ai?

⁹ Tagva imiksaliortit angajoᴋângata sinnaktômanerijane unipkautigivâ Josefemut, oᴋautivâlo: Sinnaktômavunga vaineᴋutemik sâmnêtomik.

¹⁰ Vaineᴋut akkeroᴋarpoᴋ pingasunik, tungujoᴋsivlunelo perorpoᴋ nuvugulâᴋarlarmelo, paungangillo innersimalerput.

¹¹ Faraublo ermgusiarsunga tigumiarpara, paungallo tiguvlugit iptêjarpakka Faraub ermgusiarsunganut, ermgusiarsuglo tunivara Faraub agganginut.

¹² Josefib oᴋautivâ: Tamadja tukinga: akkerᴋut pingasut tagva uvlut pingasut.

¹³ Uvlut pingasut nâkpatta, Faraub niaᴋuit makitilârpâ uttertilutit kivgartorvigijarnut, Faraublo ermgusiarsunganik tunitjilârivotit agganginut, iluserilauᴋtaktut taipsomane imiksaliorteolauravit.

¹⁴ Erᴋalaungmingale ᴋanoengitsiaruvit, nâpkigivlunga taivlungalo Faraomut, iglomit ômangat anititaurᴋovlunga,

¹⁵ Tigligaugama Ebrêerit nunanganit, taimaktauᴋ mâne idluitulilunginama sunamik pitjutaujomik parngnanairsortaugiamut.

¹⁶ Kaᴋᴋôjaliortit angajoᴋângata ânanâmik nellonaijaijoᴋ tussaramiuk, Josefemut oᴋarpoᴋ: Uvangatauᴋ sinnaktômavunga: sunaubva, amârgaujanik pingasunik ᴋaᴋᴋôjârsuktalingnik kakkaktunga.

¹⁷ Amârgaujamelo ᴋollerme ᴋaᴋᴋôjatsiaᴋarpoᴋ sunatuinarnik Faraub nerᴋiksanginik, tingmitjallo nerrivait amârgaujamit kakkaktamnit.

¹⁸ Josefib kiovâ oᴋarlune: Tamadja tukinga: Amârgaujat pingasut tagva uvlut pingasut:

¹⁹ Uvlut pingasut nâkpatta, Faraub niaᴋuit makitilârpâ illingnit pêrlugo, nivingatilutit ᴋejungmut; tingmitjallo uvinît nerrilârpât illingnit.

²⁰ Uvlullo pingajuane, Faraub inûlerviane, nerrimâraksarsoarmik âᴋiksoigame kivgaminut tamainut, imiksaliortit angajoᴋângata niaᴋunga makitipâ ᴋaᴋᴋôjaliortillo angajoᴋângata niaᴋunga kivgame akorngane.

²¹ Imiksaliortillo angajoᴋângat uttertipâ kivgartorvigijanganut, ermgusiarsungmik tunitjerᴋovlugo Faraub agganginut.

²² Kaᴋᴋôjaliortille angajoᴋângat nivingartaurᴋovâ ᴋejungmut, sorlo Josefib nallonaijaivigingmagik.

²³ Imiksaliortille angajoᴋângata Josefe erᴋarungnairlugo puigorpâ.