Genesis 4 - Labrador Inuttitut Heritage Bible

Kainelo Abelelo. Kainib kinguvângit. Sête.

¹ Adamiblo nuliane Eva uviniᴋatigingmago singailerpoᴋ, Kainelo erniarivâ, oᴋarlune: Pivunga angumik Nâlekab ikajorningagut.

² Erningmivlunelo erniarivâ nukâ Abele. Abelelo mianersijôlerpoᴋ saukkanik, Kainele perorsêvilerijôlerpoᴋ.

³ Pijoᴋarporlo kingorngagut, Kaine tunergutiksamik tunitjingmat Nâlekamut, nunab perortungita ilanginik.

⁴ Ammatauᴋ Abele tunitjivoᴋ saugaᴋotime piarangita angijoᴋpalluit ilanginik ᴋuinijunik. Nâlekablo Abele tunergutâlo ᴋuviagivak.

⁵ Kainele tunergutâlo ᴋuviagingilak. Tagva Kaine ningarosulerpoᴋ angijomik, kênangalo kattalungavoᴋ.

⁶ Nâlegaᴋ tagva Kainemut oᴋarpoᴋ: Sôᴋ ningarosukᴋêt? Sôᴋ kênat kattalungavâ?

⁷ Imaingilâᴋ: Idluartoᴋ kajungerigungne maksoavotit; idluartorle kajungeringikungne idluituligiaᴋ utaᴋᴋivoᴋ upkoarme kajungerlune illingnut? Igville tâpsomunga attaniotilerit.

⁸ Kainible nukane Abele oᴋaᴋatigivâ; pijoᴋarporlo naternamêngmannik, Kainib nukane Abele opakpâ toᴋolugolo.

⁹ Tagva Nâlekab Kaine oᴋarvigivâ: Nukat Abele naûk? Kaine oᴋarpoᴋ: Nallovara, nukara pairijaksarivigô?

¹⁰ Oᴋarporlo: Sumik piniarᴋêt? Nukavit aungata nippinga ᴋaggorpoᴋ uvamnut nunamit.

¹¹ Mâna ôminarsilerit nuname. Tâpsoma ᴋanine aitarpâ, nukavit aunga aggangnit pigivlugo.

¹² Perorsêvileriguvit, nunab pijungnartaminik tunitjivigijaksaringilâtit kingorngagut. Saksârtuksauvotit ᴋemâjuksauvlutillo nuname.

¹³ Kainelo oᴋarpoᴋ Nâlekamut: Idluitulinera angiluarpoᴋ issumagijaujungnairungnarane.

¹⁴ Takkuit, uvlome nunamit aulartiparma kênarnillo ijeriartortuksauvunga. Saksârtuksauvlunga ᴋemâjuksauvunga nuname. Imailingalârpunga: uvamnik naipitsijub toᴋolârpânga.

¹⁵ Nâlekable oᴋautivâ: Aukak, Kainemigle toᴋotsijoᴋ akkiniartaulârpoᴋ sepaitortauvlune Nâlekablo Kaine nallunaikuserpâ, toᴋotaurᴋonago kimut naipitinganut.

¹⁶ Tagva Kaine Nâlekab kênanganit aularpoᴋ, nuname Nodeme nunaᴋalerlune, Edenib kangiane.

¹⁷ Kainiblo nuliane uviniᴋatigingmago singailerpoᴋ, Hanokelo erniarivâ. Iglugasaliorporlo, ernime attingatut Hanokemik atserarlugit.

¹⁸ Hanokible ernitârivâ Irad, Iradib ernertârivâ Mahujael, Mahujaelib ernertârivâ Metusael, Metusaelib ernertârivâ Lamek.

¹⁹ Lamekele maggungnik nulianikpoᴋ, aipâ atteᴋarpoᴋ Adamik, aipâ Zillamik.

²⁰ Adablo erniarivâ Jâbale; tâmna sivorlerivât tuppernik igloᴋartut nergjutiniglo mianersijut.

²¹ Nukanga atteᴋarpoᴋ Jûbalemik; tâmna sivorlerivât ᴋelularalijartut nipjausijartullo ilûnatik.

²² Amma Zillatauᴋ ernivoᴋ Tubalkainemik; tâmna kannujanik kikianiglo sunatuinarnik sabviorpoᴋ. Tubalkainiblo najanga Naema.

²³ Lamekiblo nuliângne oᴋautivak: Adalo Zillalo, oᴋautsimnik tussaleritik; illiptik Lamekib nuliâgik, kamatsialeritik, sumik oᴋarama. Angumik toᴋotsivunga, ikkilermanga; inôsuktomik toᴋotsivunga, killermanga.

²⁴ Kainemik toᴋotsijoᴋ akkiniartaulârmat sepaitortauvlune tagva Lamekemik toᴋotsijoᴋ seventy sepaitortauvlune akkiniartaulârpoᴋ.

²⁵ Adamib nuliane amma uviniᴋatigingmago, ernermik ernivoᴋ Setemik atteᴋartilugo (oᴋarlune); Gûdib kinguvângmik assianik tunitjivigivânga, Abelib inangertiksanganik Kainib toᴋotangata.

²⁶ Setelotauᴋ ernertârpoᴋ atteᴋartilugolo Enosemik. Taipsomane Nâlekab attinga tuksiarvigilerpât.