Genesis 39 - Labrador Inuttitut Heritage Bible

Josefib pititaulerninga parngnanairsimavingmut.

¹ Josefele attersautivât Egiptenemut; Potifariblo, Faraub pimaklertoᴋotingata, attanermiglo udjertortut angajoᴋângata, angutib Egiptenemiub, pissiarivâ Ismaêliterinit tagvunga attersautijinginit.

² Nâlekablo Josefe aiparivâ, angutaulerporlo piloriktoᴋ, angajoᴋâme Egiptenemiub iglunganêdlune.

³ Angajoᴋângatalo malugivâ, Nâlekab aiparingmago aggangitalo sulijangit taimak Nâlekab piloriktingmagit.

⁴ Josefelo saimaneᴋsivoᴋ sângane kivgartorlugolo; pimaklertungortipâlo igluminik, perᴋutinelo tamaita pitipait agganginut.

⁵ Pijoᴋarporlo, pimaklertungortingmago igluminik perᴋutiminiglo tamainik, taimangat Nâlekab Egiptenemiub iglunga piloriktipâ Josefe pivlugo. Nâlekablo piloriktitsininga atorpoᴋ perᴋutinginut tamainut iglomelo perorsêvingmelo.

⁶ Taimaimat perᴋutine tamaita pitipait Josefib agganginut, nangminerlo sunalônêt kamagijungnailerpâ, taimna pitilugo; nerᴋiksaᴋ kissiat nerrijaksane (kamagivâ). Josefelo taututsiarikpoᴋ kênatsiariklunelo.

⁷ Taimailingatilugo ovatsiarôlermat, angajoᴋângata nuliangata Josefe takonârpâ ikligunermut, oᴋarlunelo: Tuttilaunga!

⁸ Kunuvorle, oᴋautivlugolo angajoᴋâme nulianga: Takovotit, angajoᴋâma iglome sunalônêt kamagijungnairmago pitilunga, perᴋutinelo tamaita aggamnut pitingmagit.

⁹ Uvamnit anginersaujoᴋangilaᴋ iglome mattomane, ivlersilungilarlo sunamiglônêt uvamnut, illingnik kissingnik, nuliarigamitit. Kappianarmêk, ajortoᴋsoaᴋ tamanna piniarajarupko Gûdemut ajortulivlunga!

¹⁰ Nâlengilâlo Josefib, tuttingnago najornagolônêt, uvlut tamaita taimak innagalloarmago.

¹¹ Uvlullo illangane Josefe iglomut itermat sulijaksane piniaromavlugit, inuᴋangilaᴋ tagvane iglome iglub inungita illanganiglônêt.

¹² Tagva annorângagut tiguvâ oᴋarlune: Tuttilaunga-ai? Kissiane annorâne agganginut ᴋemaklugo sillamut ᴋemâvoᴋ.

¹³ Arnable, takogame annorâne ᴋemaklugo aggangminut sillamut ᴋemângmat,

¹⁴ Iglub inungit ᴋairᴋovait oᴋautivlugillo: Okoᴋsê, angut Ebrêereojoᴋ uvaptingnut itertinerpâ, uivêtoᴋutauniartiluta tâpsomunga. Uvamnut iterpoᴋ tâmna tuttigomavlunga, uvangale ᴋuᴋudlarpunga.

¹⁵ Niplialerdlunga ᴋuᴋudlarlungalu tussaraminga, annorâne sannimnut ᴋemaklugo sillamut ᴋemâvoᴋ.

¹⁶ Tagva annorânga sanniminut illivâ angajoᴋânga tikkitsiarivlugo.

¹⁷ Oᴋarvigivâlo oᴋautsinik makkoninga, oᴋarlune: Kivgaᴋ Ebrêereojoᴋ itertitat uvaptingnut, iterpoᴋ uvamnut uivêtoᴋutigijomavlunga.

¹⁸ Kissiane niplialerdlunga ᴋaggudlarama, annorâne sannimnut ᴋemaklugo sillamut ᴋemâvoᴋ.

¹⁹ Angajoᴋângatale nuliame oᴋausingit oᴋautigijangit tussaramigit, oᴋarmat: Taimak kivgavit iliorpânga, — tagva ningausinga katsungailerpoᴋ.

²⁰ Angajoᴋângatalo Josefe tiguvâ parngnanairsimavingmut pitilugo, attanerub parngnanairsortaurᴋojangita parngnanairsimavianut. Tagvanêlerporlo parngnanairsimavingme.

²¹ Nalekable aiparivâ pitsiarvigivlugo saimaneᴋsitilugolo parngnanairsimaviub angajoᴋângata sângane.

²² Parngnanairsimaviublo angajoᴋângata parngnanairsortaujut tamaita Josefemut pairijaurᴋovait, tamaitalo sulijaksangit tagvane tâpsoma suliarivait.

²³ Pijaksarme nallianiglônêt parngnanairsimaviub angajoᴋânga kamajungnairpoᴋ, Nâlekab aiparingmago, sulijangillo Nâlekab piloriktingmagit.