Genesis 38 - Labrador Inuttitut Heritage Bible

Judalo Tamarelo.

¹ Nalliutome taipsomane Juda aularpoᴋ ᴋatangutiminit, angut Adullamioᴋ itervigivlugo Hiramik attelik.

² Tagvane Judab takovâ Kânaanemiut illangata Suamik attigub pannia, tiguvlugolo tuttikpâ.

³ Singailerporlo ernermiglo ernivoᴋ, tâmna Gêremik atserarpâ.

⁴ Amma singailerivoᴋ ernermiglo ernivoᴋ, tâmna Onanemik atserarpâ.

⁵ Ammalo ernermik ernivoᴋ, tâmna Sêlamik atserarpâ. Judale Kesibemêpoᴋ erniaringmago.

⁶ Judable ernine angajukleᴋ Gêre nuliaksamik tunitjivigivâ Tâmaremik attilingmik.

⁷ Kissiane Judab erninga angajukleᴋ ajortôvoᴋ Nâlekab sângane, taimaimat Nâlekab toᴋopâ.

⁸ Tagva Judab Onane oᴋautivâ: Angajuvit nulianga tuttiguk; ukkuararsugigangne nuliarijaksarivat, angajungnut kinguvâksarsiniarlutit.

⁹ Onanelo nallungilaᴋ, kinguvâksaᴋ nangminerijaksaringinamiuk, tuttiklugolo angajume nulianga nunamut kattaktitsivoᴋ, angajuminut kinguvâksarsijomanane.

¹⁰ Taimailiorninga ajortôngmat Nâlekab sângane, tâmnatauᴋ toᴋopâ.

¹¹ Judablo ukkuane Tâmare oᴋautivâ: Uigarniovlutit atâtavit iglunganêtuarit ernera Sêla inumariolerᴋârtinago! — issumaᴋarame: Tâmnatauᴋ toᴋolârpallaivoᴋ angajûngmitut. Tâmarelo aularpoᴋ atâtame iglunganêtuarlune.

¹² Uvlut unuktut nângmatta, Suab pannia Judab nulianga toᴋovoᴋ. Oggorijungnairamiuk, Juda majorarpoᴋ saugaᴋotiminik sallijunut Timnatemut, illanârijane Hira illagivlugo.

¹³ Tâmarelo unipkautivât oᴋautivlugo: Takkuit, sakkît Timnatemut majorarpoᴋ, saugaᴋotine sallijartorlugit.

¹⁴ Tagva annorât atorpaktane uigarnionermine pêrpait, kênailitamut ingminik mattuvlune uliklunelo, ingiporlo Enaib itertarvianut, apᴋosinermêtub Timnatemut ilingajome, Sêla inumariojarêrtoᴋ takogalloarlugo nuliangotitaulunginame tâpsomunga.

¹⁵ Judable takogamiuk, anguniarpaktônasugivâ, kênarne mattungmago.

¹⁶ Sâvigivâlo apᴋosinerme oᴋarlune: Tuttilaulagin-ai? nallovlune ukkuarinamiuk. Kiovâ: Sumik tunitjivigijomavingâ tuttingniarlunga?

¹⁷ Oᴋarporlo: Tuktungajoᴋ piaraᴋ illingnut tilikliutiniarpara nergjuteᴋotimnit. Kiovâle: Tilikliuterᴋârnago satoraksanik tunitjiviginiarᴋingâ?

¹⁸ Oᴋautivâ: Sumik satoraksamik tunitjiviojomavêt uvamnut? Kiovâ: Naᴋitjutingnik nuvijutingniglo ajaupiarniglo aggangnêtomik. Tagva tamakkoninga tunitjivigivlugo tuttikpâ; tâpsomunga singailerpoᴋ.

¹⁹ Kingorngane (Tâmare) nikovidlune aularpoᴋ tagvangat kênailitanelo pêrpâ, annorât atorpaktane uigarnionermine attingmivlugit.

²⁰ Judable tuktungajoᴋ piaraᴋ tilikliutivâ illanârijamigut Adullamiokut, satoraksat arnamit utterᴋolugit; kissiane nagvângilâ taimna.

²¹ Tagva inuit taikanêtut aperivait oᴋarlune: Naûk anguniarpaktoᴋ taimna Enaime apᴋosinerme iksivalauᴋtoᴋ? Kiovâlle: Anguniarpaktoᴋalaungilaᴋ tagvane.

²² Judamullo utterpoᴋ oᴋarlune: Nagvângilara; inuillo taikanêtut oᴋarput anguniarpaktoᴋalaungitomik.

²³ Juda oᴋarpoᴋ: Unêt tigutuinarligit, kangusuktitaurᴋonanuk. Tuktungajoᴋ piaraᴋ una tilikliutigalloarapko, nagvângilat.

²⁴ Taᴋᴋit pingasukassait nângmatta, Juda unipkautijauvoᴋ oᴋautjauvlune: Ukkuat Tâmare ajortulivoᴋ, sunaubvalo, singailerpoᴋ ajortulinermut. Juda oᴋarpoᴋ: Anitisiuk, ikitaksauvoᴋ.

²⁵ Anititaugame, sakkiminut tilikliutjivoᴋ oᴋarlune: Makkoa inuanut singaititauvunga. Illitarᴋsilerit, kia perᴋutigimangâgit, naᴋitjut una, nuvijutingalo, ajaupiarlo una.

²⁶ Judablo illitarivait oᴋarlunelo: Idluarnersauvoᴋ uvamnit, tunilaunginapko ernimnut Sêlamut. Kingornganele uviniᴋatigijungnairpâ.

²⁷ Ernisulermat, sunaubva, maggoliaksangnik illumioᴋarpok.

²⁸ Erningmalle, aipangata aggârsungit saᴋᴋerput. Tagva ernisuksêjoᴋ ivaluksamik aupaluktamik tigusivlune aggangillo nappersivlune oᴋarpoᴋ: Tâmna sivorliovlune anivoᴋ.

²⁹ Agganele uttertingmagit kingumut, sunaubva ᴋatangutinga anivoᴋ; oᴋarpoᴋ tagva: Sôᴋ pivlutit taimak angitigijomik aliksivêt? Tâmna Pêresemik atserarpât.

³⁰ Kingorngane ᴋatangutinga anivoᴋ, ivaluksamik aupaluktamik tallermiutalik. Tâmna Sêramik atserarpât.