Genesis 37 - Labrador Inuttitut Heritage Bible

Josefe ᴋattangutiminut niorvgutigijauvoᴋ.

¹ Jakolo nunaᴋarpoᴋ atâtame tujormiangovigijangane, nuname Kânaaneme.

² Tamadjalo Jakomik unipkautsit: Josefe 17nik jâreᴋarame, saukanik mianersijôvoᴋ ᴋattangutine illagivlugit; inôsuktublo atâtame nuliâkita Bilhablo Silpablo ᴋitorngangit illagivait; oᴋautigiluktaulerangattalo Josefib oᴋautigisârpait atâtaminut.

³ Israêlible Josefe nagliginersarivâ ᴋitorngaminit tamainit, inutoᴋaunermine ernertârigamiuk, taᴋsapatâmiglo annorâᴋartipâ.

⁴ Katangutingitale malugigamitsuk atâtanganut nagliginersarijaujoᴋ katangutinginit tamainit, omigilerpât illanârnartomiglo oᴋarvigivlugo sapperpât.

⁵ Josefelo sinnaktômanermik sinnaktômangmat ᴋatangutiminut oᴋautigivlugo, anginersamik omigivât.

⁶ Imâk oᴋautingmagit: Sinnaktômanera tussalauᴋsiuk sinnaktômanerijara.

⁷ Perorsêvimgmêdluta ivingnik ᴋippitaksaujunik ᴋippitsivogut; sunaubvalo, ᴋippitakka ingmingnik makilerput nangerlutiglo; avatânêdlutiglo ᴋippitapse ᴋippitakka okkungavigivait.

⁸ Tagva ᴋatangutingata oᴋautivât: Igvit attanerijaksarigalloarpitigît nâlagaksarivlutillo? Sugaluluartomiglo omigilerpât sinnaktômaningit pivlugit oᴋausingillo pivlugit.

⁹ Aipanganik sinnaktômavoᴋ kingorngane, ᴋatangutiminullo unipkautigivâ, oᴋarlune: Okoᴋsê, aipanganik sinnaktômavunga: seᴋinerublo taᴋᴋerublo uvloritjallo 11 okkungavigivânga.

¹⁰ Unipkautigingmagolo atâtaminut ᴋatangutiminullo, atâtangata suakpâ oᴋautivlugo: Sinnaktômaneᴋ sinnaktômanerijat sujôᴋ? Uvanga ᴋatangutivillo pâmaktervigijartoraksarigalloarpitigît?

¹¹ Katangutingitalo sinaungagivât, atâtangatale oᴋautsit tamakkoa torᴋorpait.

¹² Katangutingillo aularput, atâtamik saugaᴋutingit mianerivlugit Siggememe.

¹³ Israêlib tagva Josefe oᴋautivâ: Katangutivit saukat mianeringilaît Siggememe? Kait, tillijomagapkit taipkonunga. Oᴋautivâle: Tamânêpunga.

¹⁴ Oᴋautivâlo: Aularit takojartorlutit, ᴋatangutitit ᴋanoengitsiarmangâta, saukallo ᴋanoengitsiarmangâta, oᴋariartorvigilungalo ilinganinginik. Tagva tillivâ Hebronib naksanganit. Siggememut tikkingmat,

¹⁵ Natername tamartoᴋ angutib naipipâ. Tâpsoma aperivâ oᴋarlune: Suna ᴋenerpiûk?

¹⁶ Kiovâ: Katangutikka ᴋenerpakka; oᴋautilaungminga nanêdlutik mianersimangâta.

¹⁷ Angutiblo oᴋautivâ: Tamângat aularsimavut, oᴋartut tussarapkit: Dotanemut ingerganialerta. Josefib tagva ᴋatangutine malikpait naipiniarlugit Dotaneme.

¹⁸ Tâpkoale ungasiktomit takogamitsuk, tikkilerᴋârtinago issumaksarsioᴋatigêlerput toᴋotsomavlugo,

¹⁹ Oᴋarᴋatigêklutik: Takkuitse, sinnaktômasôᴋ tamaungalerpoᴋ.

²⁰ Attê, toᴋolaulavut, itersaliat illanganut egidlugo oᴋautigivlugolo ômajoâlungmut nerrijaumajoᴋ. Sinnaktômaningita sunauningit takuksauniarput tagva.

²¹ Rubenib tamanna tussaramiuk, piulivâ agganginit oᴋarlune: Inuartaililavut!

²² Oᴋarivorlo Rubene: Aungmik kovisiniarase, itersaliamulle mattomunga inuᴋangitomêtomut egisiuk, aggapsingnulle pijauniarane! — agganginit piulinasuarlugo atâtanganullo uttertinasuarlugo.

²³ Josefib tagva ᴋatangutine tikkingmagit, annoraijarpât, annorânga taᴋsapatâᴋ atortanga pêrlugo.

²⁴ Tiguvâllo egidlugolo itersaliamut: itersaliarle sunaᴋangilaᴋ, illua imeᴋangilaᴋ.

²⁵ Ingilerpullo nerriniarlutik. Takosaramik, takovait inugasait Ismaêliterit Gileademit tikkitut kamêleᴋotingillo tauvluᴋutinik mingoarutiniglo kutsuniglo nangmartut; ingergavut Egiptenemut akjartorlugit.

²⁶ Tagva Judab ᴋatangutine oᴋautivait: Suksarigalloarpitigô, nukavut toᴋoleruptigo aungalo angiarilugo?

²⁷ Attê, niorvgutigilaulavut Ismaêliterinut ukkonunga, aggaptingnut pijautailitilugo, nukarigaptigo uvineᴋatigivlugolo. Katangutingitalo nâlakpât.

²⁸ Niuverniartille tâpkoa Midianiterit sennerᴋongmatta Josefe amuvât itersaliamit ᴋaᴋitilugo niorvgutigilâllo Ismaêliterinut kênaujanik 20nik akkeᴋartilugo. Tâpkoale Josefe Egiptenemut naksarpât.

²⁹ Rubenele itersaliamut tikkiname, sunaubva, Josefeᴋangilaᴋ itersaliame, tagva annorâne alikpait.

³⁰ Katangutinelo tikkinivait oᴋarlune: Inôsuktoᴋ taikanêtsungnairmat, uvanga namungarniarᴋêk?

³¹ Tagva Josefib annorânga tiguvât, tuktungajorlo toᴋolugo aunganut annorânga missukpât.

³² Tillikliutivâllo annorâᴋ taᴋsapatâᴋ âtautilugo atâtamingnut oᴋautjaurᴋolâllo: Tâmna nagvârpavut; nautsertoruk, ernivit annorâringmangâgo annorâringimangâgolônêt.

³³ Illitarivâlo oᴋarlune: Tagga! ernima annorânga; ômajoâlub nerrimavâ; atso illâ! Josefe aliktorsimavoᴋ.

³⁴ Jakoblo annorâne alikpait pôksajaniglo tapserusêvlune sibviamigut ernine oggurivâ uvlunik unuktunik.

³⁵ Erningitalo panningitalo ilûnatik manigoriartoralloarpât, kissiane manigortaujomangilaᴋ, oᴋarlune: Ogguarlunga ernimnik kannungarniarpunga toᴋungajut ininganut! Atâtangatalo ᴋeavâ.

³⁶ Midianiterille Egipteneme niorvgutigivât Potifaremut, Faraub pimaklertoᴋotinganut, attanermik udjertortut angajoᴋânganut.