Genesis 35 - Labrador Inuttitut Heritage Bible

Jako ingergavoᴋ Bêtelemut Hebronemullo.

¹ Gudiblo Jako oᴋautivâ: Parngnailerit Bêtelemullo ingergalerit, taikane nunaᴋarlutit, taikanelo tunerguserviliorlutit Gûdemut, illingnut saᴋᴋersimajomut taipsomane, angajungnit Esauemit ᴋemâgavit.

² Jakob tagva iglomioᴋatine illagijanelo tamaita oᴋautivait: Tujormiangovigijapta gûdingoaᴋotingit akunapsingnêtut pêrsigik, sujungaititsiluselo, assinginik anorârluse.

³ Parngnailerlutalo ingergalauᴋta Bêtelemut, taikane tunerguservilioromagama Gûdemut, tâpsoma tussarmanga kapiasungnima nelliuningane, illagingmangalo apᴋome ingergarvigijamne.

⁴ Tagva tujormiangovigijamik gûdingoaᴋotingit tamaita pigijatik tunivait Jakomut, siumiutatiglo arngoat. Jakoblo sauvait napârtoᴋsûb Siggememêtub atânut.

⁵ Tagva aulalerput. Kakkilârnerublo, Gûdemit pijub, iglugasait tamattoma erᴋânêtut tikkipait, udlaniktailitilugit Jakokunik.

⁶ Jakoblo Luse tikkipâ, Kânaanib nunangaᴋnêto, tagva Bêtele, inuᴋotine tamaita illagivlugit.

⁷ Tagvanelo tunerguserviliorpoᴋ, nuna atserarlugo El-Bêtelemik, Gûdib tagvane saᴋᴋervigilaungmago taipsomane, ᴋemâgame angajuminit.

⁸ Deboralo, Rebekkab pairijigilauᴋtanga, toᴋovoᴋ, iluvertauvorlo Bêtelib nallâne, napârtoᴋsûb atânut, atserarpâlo “Napârtomik ᴋeavingmik.”

⁹ Gudiblo Jako amma saᴋᴋervigigivâ, Mesopotâmiamit tikkingmat, saimauserpâlo.

¹⁰ Gûdiblo oᴋautivâ: Jakomik atteᴋarpotit; kingorngagulle Jakomik atteᴋarungnairlutit Israêlemik atteᴋartuksauvotit. Atserarpâlo Israêlemik.

¹¹ Gûdiblo oᴋautivâ: Uvanga Gûdeovunga ajugaᴋangitoᴋ. Kinguvâktâᴋattarit unuksivalliavlutit; inôᴋatigêt, illa inôᴋatigêksuit illingnit pijomârput, attanîllo makkitingnit pijomârput.

¹² Nunalo, tunijara Abrahamut Isaarmullo, tunivara illingnut, kinguvâksarnullo kingunikkut tunijomârpara nuna.

¹³ Gûdelo ᴋongmuarpoᴋ oᴋauseᴋarvigijaminit tâpsomunga.

¹⁴ Jakole inuksuliorpoᴋ tagvane, (Gûdib) oᴋauseᴋarvigijangane tâpsomunga, inuksumik ujaramik, imiksamiglo tunergutaujomik koverivâ, orᴋsumiglo koverivlugo.

¹⁵ Jakoblo Gûdib oᴋauseᴋarvigijanga tamanna Bêtelemik atserarpâ.

¹⁶ Betelemit tagva aularput. Tikkikassalungimatta sulle Efratemut, Rahele ernisulerpoᴋ, ernisuklunelo siorniudlarpoᴋ.

¹⁷ Ernisuklune taimak siorniudlarmat, ernisuksêjub oᴋautivâ: Sivôraniarnak, tamattomûna ernertârmigavit.

¹⁸ Anernangileramele toᴋolerlune, Benonimik atserarpâ, atâtangatale Benjamimik atserarpâ.

¹⁹ Rahelelo toᴋovoᴋ, iluvertauvorlo apᴋosinerme Efratemut, tagva Betlehemut ilingajome.

²⁰ Jakoblo nellunaikutaᴋ nappartipâ iluvingata ᴋânganut, tamadja Rahelib iluvingata nellunaikutanga sulle uvlome.

²¹ Israelelo tagvangat aularpoᴋ tangmârlunelo Ederib nuvugusingata ungatâne.

²² Pijoᴋarporlo, Israêle nuname taipsomane igloᴋartilugo, Rubenib Bilha, atâtame panervganga, itervigingmago tuttiklugolo. Israêliblo tussaumavâ.

²³ Jakoble erningit 12ovut. Leab erningit: Ruben, erniangoᴋârtoᴋ Jakomut, Simeonelo Levilo Judalo Isassarelo Sebulonelo.

²⁴ Rahelib ernîgik: Josefelo Benjamilo.

²⁵ Bilhab, Rahelib kivgangata, ernîgik: Danelo Naftalilo.

²⁶ Silpab, Leab kivgangata, ernîgik: Gadelo Asserelo. Tamadja Jakob erningit, erniangomajut tâpsomunga Mesopotâmiame.

²⁷ Jakoblo atâtane Isaaᴋ tikkipâ Mamrime, Kiriat-Arabame, tagva Hebroneme, Abrahablo Isaablo tujormiangovigijangangne.

²⁸ Isaarlo jâreᴋarpoᴋ 180nik.

²⁹ Isaarlo anernangerlune toᴋovoᴋ, sivorliminullo illaliutjauvoᴋ, îtôvlune nâmaksimariklunelo. Ernîkitalo Esauib Jakoblo illijartorpâk.