Genesis 34 - Labrador Inuttitut Heritage Bible

Dina idluituliviovoᴋ; ᴋattangutingita idluitulijoᴋ akkiniarpât.

¹ Dina, Leab panninga, erniarilauᴋtanga Jakomut, anivoᴋ nunab inungita panningit takojartorlugit.

² Tâmna Siggemib takogamiuk, Hemorib Heviterib nunab attanertangata erningata, tiguvâ tuttiklugolo nachonartipâ.

³ Tarningatalo ungagivâ Dina Jakob panninga, uigasuglo nagligivâ, tussarnertunik oᴋauseᴋarvigivlugo.

⁴ Siggemiblo atâtane Hemore oᴋarvigivâ oᴋarlune: uigasungmik tâpsominga nuliaksarsilaunga.

⁵ Jakolo tussaumalerpoᴋ pannime Dinab nachonartitauninganik; erningille naternamêngmatta nergjuteᴋotine, Jako niplialungilaᴋ taipkoa tikkitsiarivlugit.

⁶ Hemorele, Siggemib atâtanga aningmat Jakomut oᴋarvigijomavlugo,

⁷ Jakob erningit angerarput naternamit, tussatuaramitsuk. Angutillo sinaungagivlugo ningaumajâdlarput, kangunartoᴋsoarmik taimna piniarmat Israêleme, Jakob panninga tuttinamiuk; taimailiortoᴋartuksaungimat.

⁸ Hemorib tagva oᴋarvigivait oᴋarlune: Ernima Siggemib tarningata pannise ungagidlarpâ, nuliangotilauᴋsiuk tâpsomunga.

⁹ Ningaugijigêlauᴋta: pannise tunivlugit uvaptingnut, pannivullo tiguvlugit illipsingnut;

¹⁰ Nunaᴋatigêklutalo. Nuna atuinauvoᴋ illipsingnut, nunaginiarlugo ingergaviginiarlugolo igloliorvigisiuk.

¹¹ Siggemiblo Dinab atâtanga ᴋattangutingillo oᴋautivait: Saimaneᴋsilaulangatôᴋ sâpsingne, pijomajapsingnik tunitjijomavunga.

¹² Tunergutiksat piliutiksallo angidlarᴋotuinarsigik; ᴋanoᴋ oᴋautiniarapsinga tunitjivigijomavapse, kissiane uigasuk nuliangotisiuk uvamnut.

¹³ Jakoble erningita Siggeme atâtangalo Hemore kiovakit terliarlugik, najangat Dina nachonartingmago;

¹⁴ Oᴋautilugiglo: Taimak sapperpogut, najavut tunivlugo angumut kippisimangitomut; tamanna kangunarajarpoᴋ uvaptingnut.

¹⁵ Imâk kissiane pijomajaptingnik ᴋippilugomangilagut: Uvaptitut ilingalerupse, angutise tamaita kippijaurᴋogupsigik,

¹⁶ Tagva pannivut tunijomavavut illipsingnut, panniselo tiguvlugit uvaptingnut, nunaᴋaᴋatigivluselo inôᴋatigêngojomârpogut atausît.

¹⁷ Tamattomingale nâlagomangikuptigut, kippijaujomangikupselo, tagva pannivut naksarlugo aularomavogut.

¹⁸ Oᴋautsit tamakkoa Hemorib erningatalo Siggemib idluarivait.

¹⁹ Inôsuktorlo tâmna taimailiosâlerpoᴋ, Jakob panninga ungagigamiuk. Nertortauluarporlo tamainit atâtame inuᴋotinginit.

²⁰ Hemorelo erningalo Siggeme iglugasait itertarvianut tikkinamik, iglugasait inungit oᴋarvigivait oᴋarlutik:

²¹ Inuit taipkoa ulapirᴋsauteᴋarasuarput uvaptingnut; nuna nunagivlugo aulavigilitsuk! Takkoitse, nuna inekilualungilaᴋ taipkununga, panningit nuliarijomavavut, pannivullo taipkununga tunivlugit.

²² Imâgle kissiane angutit taipkoa angervigijomavâtigut, nunaᴋaᴋatigijomavluta inôᴋatigijomavlutalo, angutivut ilûnatik kippijaulerpatta, sorlo taipkoa kippimangmatta.

²³ Kattimajoᴋotingit perᴋutingillo nergjuteᴋotingillo tamaita pigileromângilavût, angervigituinaruptigik nunaᴋaᴋatigivlugillo?

²⁴ Tagva ilûnatik iglugasait itertarvingatigut aniâjut Hemore erningalo Siggeme nâlekpakit, angutillo tamaita kippijautipait, tamaita iglugasait itertarvingatigut aniâjut.

²⁵ Pijoᴋarporlo: Uvlut pingajuane ânialiumingmatta, Jakob ernîgik, Simeonelo Levilo, Dinab anîgik, tamarmik saviksoarmik tigusivuk, iglugasangnullo iterpuk nangiartuilutik, angutillo tamaita toᴋopait.

²⁶ Hemoretauᴋ erningalo Siggeme toᴋopakik saviksûb kênangagut, Dinalo tiguvâk Siggemib iglunganit aularlutiglo.

²⁷ Tagva Jakob erningita toᴋotaumajut tikkipait, iglugasaillo asserorpait, najatik nachonartingmatsuk.

²⁸ Saukallo tuktuvaillo siuterᴋortojullo tiguvait iglugasaksoarnêtut naternamêtullo.

²⁹ Perᴋutingillo tamaita ᴋitorngangillo tamaita nuliangillo aularutivait, sunatuinaillo iglunêtut asserorpait.

³⁰ Jakole Simeonemut Levimullo oᴋarpoᴋ: Piluᴋoserpaptinga, ominarsitinaptinga nunab inunginut Kânaanemiunullo Feresiterinullo. Uvangale inuᴋotikkalo unuktôngilagut. Taipkoale kattileromârput unatadlarvigivlunga nungutidlarlungalo uvangalo inuᴋotikkalo.

³¹ Kiovâk: Najavut anguniarpaktotut iliorvigijaksarigalloarpatsûk?