Genesis 33 - Labrador Inuttitut Heritage Bible

Jakolo Esauelo naipiutivuk.

¹ Jakolo takojaksarsiorame, sunaubva, Esaue takolerpâ aggertoᴋ angutit 400 illagivlugit. Kitorngane tagva aviutipait, Leamullo Rahelemullo kivgângnullo arnângnut pitilugit.

² Kivgâglo arnâk ᴋitorngangillo sivorliotipait, Lealo ᴋitorngangillo tâpkoa kingornganêtipait, Rahelelo Josefelo kingorliotipak;

³ Nangminerle sivorlerpoᴋ nunamullo okkolerpoᴋ 7ertorlune, angajune tikkitsiarivlugo.

⁴ Esauele aᴋpangerpoᴋ pâriartorlugo, nagligivlugolo erᴋipâ kuniklâlo; tamarmiglo ᴋugviolerpuk.

⁵ Takosarlune arnat ᴋitorngangillo takogamigit, oᴋarpoᴋ: Kikkût ingergaᴋatitit ukkoa? Kiovâ: Kitorngakka tamadja, Gûdib tunijangit kivgarnut.

⁶ Arnâglo kivgâk ᴋitorngangitalo sângeriartorpât okkovlutik;

⁷ Amma Leab ᴋitorngangitalo sângeriartorpât okkovlutik; kingorngagut Josefib Raheliblo sângeriartorpâk okkovlutik.

⁸ Oᴋarporlo: Kattimajut ipkoa tamaita naipitakka suksarivigît? Kiovâ: saimaneᴋserᴋovlunga angajoᴋâma sângane.

⁹ Esauib oᴋautivâ: Perᴋuteᴋatsiarpunga, nukâk, perᴋutitit pigituinakkit.

¹⁰ Jakob kiovâ: Aukagle saimaneᴋsiguma sângne, piliutikka tigulaukit aggamnit, imâk pivlugo, kênat takogapko, Gûdib kênanga takolugo sorlo, illalioramgalo.

¹¹ Piliutikka, illingnut ᴋaitaujut tigulaukittôᴋ; Gûdib pilingmanga, tamainik peᴋatsiarpunga. Sâlagingmagolo, tiguvait.

¹² Oᴋarporlo: Aularluta ingergarnialerta, illagijomavagit.

¹³ Kiovâle: Angajoᴋâra nellungilaᴋ, sorrutsit annajanarmatta, saukaniglo sârlianik illaᴋarama tuktuvangniglo; uvlorme atausênarme piluarlutik ungortaugunik, nergjutit ilûnatik toᴋonajarput.

¹⁴ Angajoᴋâra ingergalauletôᴋ kivgame sivorngagut, uvanga sukkaitomik ingergarniarpunga iluserivaktaptut, nergjutit sorrutsillo pissugungnarningit maliklugit, tikkiniarlungalo Seiremut angajoᴋâmnut.

¹⁵ Esauib oᴋautivâ: Tagva inuᴋotima illangit illingnêrᴋojomavakka. Kiovâle: Sujût? Saimaneᴋsituinarlanga angajoᴋâma sângane.

¹⁶ Tagva Esaue uvlorme taipsomane utterpoᴋ apᴋutimigut Seiremut.

¹⁷ Jakolo Suggotemut aularpoᴋ igloliorlunelo ingminut, nergjuteᴋotiminullo iniksaliorlune. Tamanna pivlugo nuna tamanna Suggotemik taivâ.

¹⁸ Jakole ᴋanoengitsiarlune Mesopotâmiamit tikkigame, iglugasangnut Siggememut pivoᴋ, Kânaanib nunanganêtunut, iglugasaillo sângane tangmârpoᴋ.

¹⁹ Nunalo tâmna tuppervigijane pissiarivâ Hemorikunit, Siggemib atâtanganit, ᴋetsitanik (kênaujanik) 100nik akkilerlugo.

²⁰ Tunerguserviliorporlo tagvane, atserarlugo Gûdib, Israêlib Gûdingata (tunerguserviᴋotinganik).