Genesis 32 - Labrador Inuttitut Heritage Bible

Jako sivôravlune tuksiarpoᴋ Gûdemiglo pânikpoᴋ.

¹ Jakole apᴋutimigut ingergavoᴋ, Gûdiblo engelingita pârpât.

² Takoleramigillo, oᴋarpoᴋ: Tamadja Gûdib kattimgajoᴋsoaᴋotingit; nunalo tamanna taivâ Mahanaimik.

³ Jakole sivunermigut kivgartortuksanik tillikliutjivoᴋ Esauemut angajuminut, Seirib nunanganut, Edomib naternanganut.

⁴ Perᴋovaillo oᴋarlune: Imâk oᴋauseᴋaritse angajoᴋâmnut Esauemut: kivgat Jako imâk oᴋautjivoᴋ: Tujormiangovlunga Labaneme mulluvunga mâna tikkidlugo,

⁵ Perᴋuteᴋarpungalo tuktuvangnik, siuterᴋortojuniglo, saukaniglo, kivganiglo angutinik, kivganiglo arnanik, tillikliutjivungalo, angajoᴋâra ᴋaujititsomavlugo, ijîngnut saimaneᴋserᴋovlunga.

⁶ Tillijaujut Jakomut utterput oᴋarlutik: Angajungnut Esauemut tikkipogut; aulalerêrpoᴋ pâriartorlutit, angutit 400 illagivlugit.

⁷ Tagva Jako erᴋsidlalerpoᴋ kapiasuklune, avikpaillo inuit illagijane, saukallo tuktuvaillo kamêlillo kattimajut, maggoilivlugit,

⁸ Oᴋarlune: Esauib kattimajut aipaingit tikkilugit pidlaralloarpagit, aipaingit tagva ᴋemâjungnarniarput.

⁹ Jakolo oᴋarivoᴋ: Nâlegaᴋ, atâtama Abrahab Gûdinga, atâtamalo Isaab Gûdinga, oᴋartotit uvamnut: nunangnut utterit illangnullo, ajungitulivigijomavagit,

¹⁰ Nalopᴋotijutigivakka pitsiarnerit tamaita nertornarnerillo tamaita kivgarnut saᴋᴋertitatit. Jordane una ikârapko, ajaupiara pituarivara, mânale kattimajut magguit pivakka.

¹¹ Piulilaungatôᴋ angajuma agganginit, Esauib agganginit, sivôragigapko, tikkidlaroarmat pidlarlunga arnallo sorrutsillo.

¹² Oᴋaravit: Ajungitulivigijomavagit, kinguvâksatillo unuksivalliatitsomavakka siorᴋatitut imarbiksûb sikjangane, unumut kitiksaujungnairtilugit.

¹³ Unnuarmelo tamattomane tagvanêpoᴋ, piminillo najortaminit tiguvait, angajuminut Esauemut tujûtiksane:

¹⁴ Tuktungajut 200 angusaluillo 20, saukat 200 angusaluillo 20.

¹⁵ Kamêlillo sârliat 30 nochangillo, tuktuvaillo 40 angusaluillo 10, siuterᴋortojullo arnait 20 nochaillo 10

¹⁶ Tâpkoa kivgame agganginut pitipait, kattimajut ingmikôrlugit, oᴋautivaillo kivgane: Sivunipkut ingerganiarpose, kattimajut ingmigolingajut akkuneᴋartilugit.

¹⁷ Sivorlerlo perᴋovâ oᴋarlune: Angajuma Esauib pârpatit apertsorlutillo oᴋarpat: Kimut ilingavêt? namungarᴋêllo? ungortatillo tamakkoa kia perᴋutigivagît? —

¹⁸ Oᴋartuksauvotit tagva: Kivgavit Jakob perᴋutingit tamakkoa, tujûtigivait angajoᴋâmnut Esauemut, taggalo malikpâtigut.

¹⁹ Taimaktauᴋ aipanga perᴋovâ, pingajuaglo, ilûnaitalo kattimajunik ungortut, oᴋautilaitalo: Taimak Esaue oᴋautijaksarivase, naipilerupsiuk.

²⁰ Oᴋartailiniarasele: Tagga, kivgavit Jakob malikpâtigut. Issumaᴋarame: tujûtinut sivunimnêtunut saimartitsomavara, kingorngagullo takojomavara, imaᴋâ illaliorniarpânga.

²¹ Tujûtiksat tagva sivorlerput, nangminerle kattimajoᴋotine illagivait unnuarme tamattomane.

²² Unnuarmelo tamattomane makilerpoᴋ, nuliângnelo kivgâglo arnâk ᴋitornganelo 11 tiguvait, Jabokib ikârtorviagut ikârtiniarlugit.

²³ Tiguvlugit kôb akkianut ikârtinamigit, perᴋutinelo tamaita ikârtinamigit,

²⁴ Jako kissimetôlerpoᴋ. Tagvane angutib pâvâ ᴋaulersiarivlugo.

²⁵ Missigivlune sâlagivlugo ajoramiuk, sibviangagut aktorpâ, Jakoblo sibvianga uniortitauvoᴋ, pângmanik.

²⁶ Oᴋarporlo: Sapkunga, ᴋaulermat. Kiovâle: Sapkoniangilagit, kissiane saimauserumga.

²⁷ Oᴋautivâle: Kinauvêt? Kiovâ: Jakôvunga.

²⁸ Oᴋarporlo: Kingorngagut Jakomik atteᴋarungnairlutit, Israelemik atteᴋartuksauvotit, Gûdemullo inungnullo sorsugavit sâlaᴋarlutillo.

²⁹ Jakoblo aperivâ oᴋarlune: Attît tussarlago-ai? Oᴋautivâ: Sôᴋ attera aperᴋutigiviûk? Tagvanelo saimauserpâ.

³⁰ Jakoblo nuna tamanna atserarpâ Pnielemik, oᴋarlune: Gûde takogapko kênarsivlugo, tarnigalo piulijauvoᴋ.

³¹ Pnielemillo aularmat, seᴋinerub nuilervigivâ, tussiakporlo sibviamigut.

³² Tamanna pivlugo Israêlikut sibviab nukkinga nerᴋiksaringilât uvlomemut aglât, Jako aktormago sibviangata nukkingagut.