Genesis 31 - Labrador Inuttitut Heritage Bible

Jako Labanemit ᴋemâvoᴋ.

¹ Labaniblo erningita oᴋausingit tussaumavait, oᴋarmatta: Jakob tiguvait atâtapta pingit tamaita; atâtaptalo pinginit makkoninga perᴋutevaksoaᴋalerpoᴋ.

² Jakoblo Labanib kênanga takovâ, sunaubvalo, sivornganetut ilingajungnairtoᴋ ingminut.

³ Nâlekablo Jako oᴋautivâ: Utterit atâtavit nunanganut illangnullo; illagijomavagit.

⁴ Tagva Jako tillikliutjivoᴋ Rahelelo Lealo ᴋairᴋovlugik naternamut nergjuteᴋotiminut.

⁵ Oᴋautivaglo: Atâtaptik kênanga takovara, sivornganetut ilingajungnairtoᴋ uvamnut; atâtamale Gûdingata illagivânga.

⁶ Nangmineᴋ ᴋaujimavotik, pitsartunimnut tamainut atâtatik kivgartorapko.

⁷ Atâtaptigle uiverivânga, akkilertaugiaralo tellimaujortorlune ablatsautipâ; kissiane Gûdib asseroitailitipâ uvamnik.

⁸ Oᴋalerangat: Millaktat akkiliusiariniarpattit, — nergjutit ilûnatik millaktanik tagva piaraᴋalerput; oᴋalerangalle: ᴋoppugârtut akkiliusiariniarpattit, — nergjutit ilûnatik ᴋoppugârtunik tagva piaraᴋalerput.

⁹ Taimak Gûdib atâtaptik nergjuteᴋotingit tiguvait, uvamnullo tunivlugit.

¹⁰ Nergjutillo nuliarvingat nelliutingmat, takosarpunga takovlungalo sinnaktômatilunga: sunaubva, angusaluit nergjutinut nuliartut tagva ᴋoppugârtut millaktallo okkileriallo.

¹¹ Gûdiblo engelingata oᴋautivânga sinnaktômatilunga: Jako! kiovaralo: Mânêpunga.

¹² Oᴋautivângalo: Takosarit takovlutillo: angusaluit ilûnatik nergjutinut nuliartut tagva ᴋoppugârtut millaktallo okkileriallo, tamaita takogapkit, ᴋanoᴋ Labanib iliorvigingmattit.

¹³ Uvanga tagva Gûde Bêteleme (takojat), tagvane nellunaikutaᴋ mingoarpat, tagvanelo angeruteᴋarlutit angervigivarma. Parngnailerit mâna, aularlutillo nunamit ômangat, nunamut inûlervigijarnut utterit.

¹⁴ Raheliblo Leablo tagva kiovâk oᴋarlutik: Kingormgutijaksanik piksaᴋaralloarᴋinûk atâtamnuk iglungane?

¹⁵ Takkorngartâktut iliorvigingilâtigûk? aulaigamitiguk; akkivuglo nungupait.

¹⁶ Perᴋutit tamaita, Gûdib tigujangit atâtaptingnit, uvaguk pivavuk ᴋitorngaptalo. Mânalo tamaine iliortuinarit, sorlo Gûdib oᴋarvigingmattit.

¹⁷ Tagva Jako parngnailerpoᴋ, ᴋitornganelo nulianelo kamêlinut ingitipait.

¹⁸ Aularutivaillo nergjuteᴋotine tamaita, perᴋutinelo tamaita pissiarijane, nergjutit nangminerijane Mesopotâmiame pijane, Isaamut atâtaminut nunamut Kânaanemut aijomavlune.

¹⁹ Labanele aularsimavoᴋ, saugaᴋotine sallijartorlugit; Raheliblo tiglikpait atâtame gûdingoaᴋotingit.

²⁰ Jakoblo terliarpâ Labane Siriamioᴋ, oᴋautinginamiuk ᴋemâgame.

²¹ Taimak ᴋemâvoᴋ perᴋutingillo tamaita, aularlunelo kôksoaᴋ ikârpâ ᴋaᴋᴋamut Gileademut torârlune.

²² Uvlullo pingajuane Labane oᴋautjaulerpoᴋ, Jako ᴋemângmat.

²³ Tagva ᴋattangutine illagivlugit udlapâ; uvlullo sevenit ingergarvigerᴋârlugit, anguvâ ᴋaᴋᴋame Gileademe.

²⁴ Gûdible Labane Siriamioᴋ tikkipâ sinnaktômatilugo unnuarme, oᴋautivlugo: Udjertulerit, Jako oᴋarviginiarungne, ajungitomit sangurᴋonak ajortomut.

²⁵ Labaniblo Jako anguvâ. Jakole tangmârtilugo ᴋaᴋᴋame, Labane ᴋattangutingillo tangmârivut ᴋaᴋᴋame Gileademe.

²⁶ Tagva Labanib Jako oᴋautivâ: Sûvlutit terliarpingâ, pannîkkalo aularutivlugik sorlo saviksoarmut aᴋsârnigaujûk?

²⁷ Sôᴋ angigutjivlutit ᴋemâvêt terliarlunga oᴋarviginangalo? Kannilârajarpagit ᴋuviasuklunga imgerlungalo, ᴋilautillo ᴋellularaillo atorlugit.

²⁸ Ernikkalo pannikkalo kuniklugit perᴋongilarmalônêt. Tamattomane sillaitotut iliorpotit.

²⁹ Aggakka sappilungigalloarput pidlarluse, kissiane atâtapse Gûdingata ikpeksaᴋ unnuaᴋ oᴋautivânga oᴋarlune: Udjertulerit, Jako oᴋarviginiarungne, ajungitomit sangurᴋonak ajortomut.

³⁰ Kissianele mâna aularomadlaralloaravit, paingudlaravit atâtavit iglunganut; sôᴋ gûdingoaᴋotikka tiglikpigît?

³¹ Jakoble Labane kiovâ oᴋarlune: Sivôragama; panningnik aᴋsârnidlaroaravit.

³² Gûdingoaᴋotingnigle nagvârviginiartat inôjuksaungilaᴋ. Kattangutipta takkoane pitit uvamnênertut ᴋennerasuarkit tiguvlugillo. Jakole nallovoᴋ, Rahelib tiglingmagit.

³³ Tagva Labane iterpoᴋ Jakob tuppinganut, Leablo tuppinganut, kivgâglo arnâk tuppingangnut, nagvâranele. Leablo tuppinganit anivlune iterpoᴋ Rahelib tuppinganut.

³⁴ Rahelible gûdingoat tigulugit kamêliblo iksivautaᴋtanganut illivlugit iksivavigingmagit, Labanib tuppeᴋ ilûnât tapsikârpâ tapsêsinanelo.

³⁵ Tâmnalo oᴋarpoᴋ atâtaminut: Angajoᴋâma ningarviginiaraninga, nikovitsanginama sângne, arnat ilusingat atorapko. Kennerasuaralloaramelo, gûdingoat nagvângilait.

³⁶ Tagva Jako ningalerpoᴋ, Labanelo suangavâ, kiovlugolo Jakob Labane oᴋautivâ: Sumik tammarᴋingâ, sumik idluitulivingâ, udladlaramga?

³⁷ Pikka tamaita tapsikârangne, suna iglovit pinga nagvârᴋiûk? Illileruk maunga ᴋattangutima ᴋattangutivillo takkoanut, erᴋartuijôrᴋovlugit akonaptingne.

³⁸ Jârit 20 ukkoa illingnênama, saugaᴋotitit tuktungajoᴋotitillo erninerlutsangilat, nergjuteᴋotivillo kattimajut angusalungit nerrilungilakka.

³⁹ (Omajoâlungnut) alliktorsimajut âlungilakka illingnut, uvanga tauᴋseriaᴋarpakka; aggamnit saᴋᴋerᴋovatit uvlôtilugo tigliktaujut, unnuangotilugolônêt tigliktaujut.

⁴⁰ Imaipunga: Uvlôtilugo kiangmut sujukpunga, unnuangotilugolo ᴋeujarnermut, siniktailiᴋattarlungalo.

⁴¹ Taimak jârit 20 ukkoa iglungnêpunga; jârit 14 kivgartorvigivagit pannîkik pivlugik, jârillo pingasojortut nergjuteᴋotitit pivlugit, akkilertaugiaralo tellimaujortoertorlutit ablatsautipat.

⁴² Atâtama Gûdingata illagingipanga, Abrahab Gûdingata, Isaablo sivôragijangata, tagva sunaᴋartinanga aularᴋonajarparma. Gûdible ajulernera aggamalo sullijangit takonâramigit, inerterpâtit ikpeksaᴋ unnuaᴋ.

⁴³ Labaniblo Jako kiovâ oᴋarlune: Uvanga ukkoa pannigivâkka, uvanga ukkoa ernerivakka, uvanga kattimajut ukkoa nergjuteᴋotigivakka, takojatit tamaita pigivakka. Pannîkkale ukkoa ᴋanoᴋ piniarvigijungnarpâkkâ uvlome, erningillônêt erniarijangit?

⁴⁴ Attê, angerᴋatigêlauluk uvangalo igvillo kigligiutsijutiksamik uvamnullo illingnullo.

⁴⁵ Tagva Jakob ujaraᴋ tiguvâ nappartilugolo nellunaikutaurᴋovlugo.

⁴⁶ Kattangutinelo Jakob oᴋautivait: Ujarᴋanik kattersoijartoritse. Tagva ujarᴋanik tigusivut ᴋallerêktilugit, ᴋallerêktitallo ᴋângane nerrivut.

⁴⁷ Labaniblo taivait Jegar-Sahadutamik, Jakoble taivait Gâletemik.

⁴⁸ Labanelo oᴋarpoᴋ: Kallerêktitat ukkoa kigligiutsijutiksauvut uvlome uvamnullo illingnullo. Tamanna pivlugo Gâletemik atserarpât,

⁴⁹ Ammalo Mizpamik, oᴋarmat: Nâlegaᴋ udjertorteole uvamnullo illingnullo, ᴋaningiutilârumnuk.

⁵⁰ Pannîkka kapiasuktinajarûngne, ubvalo pannîngma assîgingnik nulianigajaruvit sulle — inungmik uvaptîngnêtoᴋalungilaᴋ, ahâgle, Nâlegaᴋ kigligiutsijeovoᴋ uvamnullo illingnullo.

⁵¹ Amma Labanib Jako oᴋautivâ: Tagga ᴋallerêktitat ukkoa, taggalo nallunaikutaliaᴋ nappartitara uvamnullo illingnullo;

⁵² Kallêrektitat ukkoa kigligiutsijutiksauvut, nallunaikutaliarlo tamanna kigligiutsijutiksauvoᴋ, uvangalônêt ᴋallerêktitat ukkoa ᴋângeromanginapkit illingnôrlunga, igvillônêt ᴋallerêktitat ukkoa nallunaikutaliarlo tamanna ᴋângeromanginangne uvamnôrlutit idluitomik.

⁵³ Abrahab Gûdinga, Nahoriblo Gûdinga, atâtangatalo Gûdinga erᴋartuijôjuksauvoᴋ uvaptîngnut. Jakolo angervikpoᴋ atâtame Isaab sivôragijanga taivlugo.

⁵⁴ Jakolo tunergutiksamik tunitjivoᴋ ᴋaᴋᴋame, ᴋattangutinelo ᴋairᴋovait nerrijartorᴋovlugit. Nerrijarêramiglo siniktarput ᴋaᴋᴋame.

⁵⁵ Labanelo uvlârarsukut makiname, erninelo pannîngnelo kunnikpait saimauserlugillo, tagva Labane aularpoᴋ, nunaminut utterlune.