Genesis 30 - Labrador Inuttitut Heritage Bible

Jakob ᴋitorngangit akluiningalo.

¹ Rahelele missigilerame ernilunginerminik Jakomut, angajune sinaungagivâ, Jakomullo oᴋarpoᴋ: Kitorngaᴋartinga. Pingikuvit toᴋolertuksauvunga.

² Tagva Jakob ningausinga katsungailerpoᴋ Rahelemut, oᴋarporlo: Gûdib simmertigivângâ timingnik singaitailititsijub?

³ Oᴋautivâle: Kivgara Bilha tagga, tâmna tuttiguk, sâmne ernikpat uvangatauᴋ tâpsomûna ᴋitorngaᴋartitaurᴋovlunga.

⁴ Tunitjivigivâlo kivgaminik Bilhamik, nuliangorᴋovlugo tâpsomunga. Jakoblo tuttikpâ.

⁵ Bilhalo singailerpoᴋ ernertârlunelo Jakomut.

⁶ Tagva Rahele oᴋarpoᴋ: Gûdib idluarsarpânga, nippigalo tussarpâ, ernermiglo tunitjivigivânga. Tamanna pivlugo Danemik atserarpâ.

⁷ Bilhalo, Rahelib kivganga, amma singailerivoᴋ, aipanganiglo ernertârlune Jakomut.

⁸ Tagva Rahele oᴋarpoᴋ: Angajuga sorsugutigivara sorsungnermik Gûdemut sâlaᴋarlungalo; atserarpâlo Naftalimik.

⁹ Leale missigilerame ernijungnainerminik, kivgane Silpa tiguvâ tunilâlo Jakomut, nuliangorᴋovlugo tâpsomunga.

¹⁰ Silpalo, Leab kivganga, ernertârpoᴋ Jakomut.

¹¹ Tagva Lea oᴋarpoᴋ: Pilloringmêk! Atserarpâlo Gademik.

¹² Silpalo, Leab kivganga, aipanganik ernertârpoᴋ Jakomut.

¹³ Tagva Lea oᴋarpoᴋ: Pilloringnarmêk! (inuit) panningita pilloringneraromârmanga; atserarpâlo Asseremik.

¹⁴ Kaᴋᴋojaksat kattersortauviata nalliuningane Ruben pissukkame, aᴋpiujat nagvârpait natername, angerautivlugillo anânaminut Leamut. Rahelelo oᴋarpoᴋ Leamut: Ernerpit aᴋpiujaᴋotingita illanginik peᴋarlangatôᴋ.

¹⁵ Kiovâle: Suglugiviûk, uiga tigugangne, amma ernima aᴋpiujaᴋotinginik tigusijomagavît? Rahelelo oᴋarpoᴋ: Unêt, unnuaᴋ igvit tuttiklitit, ernivit aᴋpiujaᴋotingita akkiksanganik.

¹⁶ Unnungmelo Jako naternamit angeralermat, Leab pagreartorpâ, oᴋarlunelo: Uvanga tuttingniarparma, pimarigapkit, ernima aᴋpiujaᴋotinginik akkilêvlunga. Tuttikpâ tagva unnuarme mattomane.

¹⁷ Gûdiblo Lea tussarpâ, singailerporlo, tallimanganik ernertârlune Jakomut,

¹⁸ Oᴋarlunelo: Gûdib akkilerpânga, kivgara uimnut tunigapko, atserarpâlo Isassaremik.

¹⁹ Lea amma singailerivoᴋ, pingasôjuaniglo ernertârpoᴋ Jakomut.

²⁰ Oᴋarporlo: Pilliumik ajungitomik Gûdib pillitsivigivânga, uima mâna najorniarpânga, ernernik pingasôjortunik ernimagama tâpsomunga, atserarpâlo Sêbulonemik.

²¹ Mattoma kingorngagut panniktârpoᴋ, tâmna Dinamik atserarpâ.

²² Gûdiblo Rahele erᴋarpâ tussarlugolo, timingalo angmarpâ.

²³ Tagva singailerpoᴋ ernertârlunelo, oᴋarlunelo: Nachonarnera Gûdib pêjarpâ.

²⁴ Atserarpâlo Josefemik, oᴋarlunelo: Nâlekab tunitjivigilingatôᴋ sulle ernermik aipanganik.

²⁵ Pijoᴋarporlo, Rahelib Josefe erniaringmago, tagva Jakob Labane oᴋautivâ: Aularᴋolaungatôᴋ, nunamnut innigijaksamnut ingergarᴋovlunga.

²⁶ Nuliakka ᴋitorngakkalo pilakka, illingnut kivgartûtigijakka, aularlangalo; kivgartornera ᴋaujimagangne, ᴋanoᴋ kivgartorvigigapkit.

²⁷ Labanib oᴋautivâ: Ijîkpit sângangne saimaneᴋsilangatôᴋ. Tukkisivunga, Nâlekab saimausermanga igvit pivlutit.

²⁸ Amma oᴋarpoᴋ: Kaujitilaunga akkiliusiaksarnik, tunijomavara tagva.

²⁹ Oᴋautivâle: Kaujimavotit ᴋanoᴋ kivgartorapkit, nergjuteᴋotitillo ᴋanoᴋ ilingangmangâta uvamnêdlutik.

³⁰ Ikitunik perᴋuteᴋalauᴋpotit tikkigama, siamarlutigle unuksivalliadlarput, Nâlekablo saimauserpâtit aulanipkut tamât. Kissiane ᴋanga iglo nangminiksara issumagijaksarivigô?

³¹ Oᴋautivâ: Sumigle tunitjijuksauvêk illingnut? Jakoble oᴋautivâ: Sumiglônêt tunitjijuksaungilatit uvamnut; oᴋauseriniartakka maliklugit piniarvigigumga, saugaᴋotitit mianerivlugit pairijomavakka amma.

³² Uvlome nergjuteᴋotivit kattimajut ilûnatik akorngatigut pissugomavunga, ingmigolingatiniarlugit millaktat okkileriallo tamaita, ᴋernertat tamaita saukanêtut, okkileriallo millaktat tuktungajunêtut. Tâpkoa akkiliusiarilakka.

³³ Idluarneralo kingorngagut kiolârpoᴋ pivlunga, ᴋailâruvit akkilertauniksara pivlugo illingnut. Millaktangongitut okkilerialungitullo tuktungajut akorngane, ᴋernertaungitullo saukat akorngane tigligângonerartaujuksauvut uvamnut.

³⁴ Labanib oᴋautivâ: Sôkiak, taimailerle, sorlo oᴋaravit.

³⁵ Uvlormelo taipsomane ingmigolivait tuktungajut angusaluit ᴋoppugârtut okkileriallo, tuktungajullo arnait millaktat okkileriallo tamaita, ᴋaᴋortamik akkudlilît tamaita, ᴋernertallo tamaita saukat akornganêtut, pairijaurᴋolaitalo ernerminut.

³⁶ Uvluniglo pingasunik ingergatilugit ungasiktipait Jakomit. Jakoblo pairivait Labanib nergjuteᴋotingit simnikôjut.

³⁷ Tagva Jakob tiguvait ᴋejuit ômat, ukpigait, ᴋairoliujallo, ukpigaillo paungaᴋarpaktut akkerungit, ameraijarlugillo ᴋaᴋortanik ᴋoppugâᴋartipait, ᴋaᴋortaᴋ ᴋejungmêtoᴋ takuksautilugo.

³⁸ Kejuit tâpkoa ameraijartane illivait nergjutit nallânut kôgvingnut, imervingnut, nergjutit imeriartormatta tagvunga, singaititaulerpullo imeriartorlutik.

³⁹ Nergjutillo ᴋejuit nallâtigut singaititaulerangamik, piaraᴋalerput ᴋoppugâᴋtunik millaktaniglo okkilerianiglo.

⁴⁰ Jakoblo saugârsuit avitipait, nergjutillo sangmitipait ᴋoppugâᴋtunut ᴋernertanullo Labanib nergjuteᴋotingita akornganêtunut, taimaglo ingminut kattimajunik piksarsivoᴋ; tâpkoa Labanib kattimajoᴋotinginut pitailitipait.

⁴¹ Pijoᴋarporlo, nergjutit sôngonersat nuliarêgarangatta, Jakob ᴋejuit imervinginut illivait, nergjutit kattimajut nallânut, singaititaulerᴋovlugit ᴋejuit nallâne.

⁴² Sangênersanulle illilungilait. Taimaimat sangênersat Labanib pigilerpait, sôngonersalle Jakob pigilerpait.

⁴³ Taimak angut tâmna perᴋuteᴋalerpoᴋ angijoᴋsoarmik, nergjutit kattimajuit pigilerlugit, kivgallo arnait, kivgallo angutit, kamêlillo, siuterᴋortojullo.