Genesis 3 - Labrador Inuttitut Heritage Bible

Inûk kattakpuk ajortomut, pidlartauvuk, angerviovuk Gûdemut.

¹ Kuglugiarle pingitsertornersauvoᴋ ômajunit tamainit naternamêtunit, Gûdib Nâlekab sanajanginit, oᴋarporlo arnamut: Gûde oᴋamarigalloarᴋâ napârtut perorsêvingmêtut nallianit nerᴋiksarsiniangilatîk?

² Arnab tagva ᴋuglugiaᴋ oᴋautivâ: Napârtut perorsêvingmêtut paunganginik nerrivakpoguk,

³ Kissiane napârtub perorsêviub ᴋerᴋanêtub paungangit pivlugit Gûde oᴋarpoᴋ: Nerᴋiksarsivigijaksaringilatik aktornagolônêt, toᴋolerᴋonatik.

⁴ Tagva ᴋuglugiaᴋ arnamut oᴋarpoᴋ: Toᴋolerniangimarikpotik illa:

⁵ Gûde nalungilaᴋ, uvlut nalliane niriguptik ômangat, ijitik uititauniarmatta, Gûdetullo ilerniaraptik, ajungitomiglo ajortomiglo illisimavlutik.

⁶ Arnablo napârtoᴋ takonârpâ nerᴋiksarsivigijominartoᴋ takorannertorlo, napârtoᴋ pijominartoᴋ, illisimanarmat; tigusivorlo paungangita ilanganik nerrivlunelo, ilangallo uiminut tunivâ, tâmnalo nerrigivoᴋ.

⁷ Uititaulerput tagva tamarmik ijingit, mallugosulerpuglo ussingagamik; merᴋsorlutiglo faigeliksab millukattanginik sailitaliorpuk.

⁸ Gudiblo Nâlekab nippinga tussarpâk perorsêvingme arvertarmat uvloᴋ niglalertilugo. Tagva Adame nuliangalo Gûdib Nâlekab kênanganit ijeriartorpuk napârtut perorsêvingmêtut akorngannut.

⁹ Gûdiblo Nâlekab Adame ᴋairᴋovâ oᴋautivlugo: Nanêkêt?

¹⁰ Oᴋarporlo: Nippît tussarapko perorsêvingme sivôravunga, ussingagamalo ijeriartorpunga.

¹¹ Oᴋarporlo: Kia oᴋautivâtît ussingagavit? Napârtomit illingnut nerᴋiksarsiviorᴋongitamnit nerrivêt?

¹² Adamelo oᴋarpoᴋ: Arnab uvamnut aiparijaurᴋojavit tunidjivigingmanga napârtomit, nerrivunga.

¹³ Tagva Gûdib Nâlekab arnaᴋ oᴋautivâ: Sôᴋ taimailiorᴋêt? Arnarle oᴋarpoᴋ: Kuglugiab taimak uiveringmanga, nerrivunga.

¹⁴ Tagva Gûdib Nâlekab ᴋuglugiaᴋ oᴋautivâ: Taimailioravit, ôminarsilualerit nergjutinit tamainit ômajunillo naternamêtunit tamainit. Pâmgorit ivjotômavlutit uvluksatit tamaita nâvlugit.

¹⁵ Akkerartortigêktitsomavapse igvillo arnarlo, kinguvâksat kinguvângalo; tâpsoma niaᴋut tullidlaromârpâ igville kingmingagut kêjomârpat.

¹⁶ Arnamullo oᴋarpoᴋ: Anernartomik ikpigititsomârpagit singailerangavit, âniadlarlutillo ernisugomârpotit, uillo kajungerijomârpat, tâmnale nâlegaujomârpoᴋ illingnut.

¹⁷ Adamemullo oᴋarpoᴋ: Nuliavit nippinga nâlagangne, nirivlutillo napârtomit perᴋojijutigijamnit, oᴋarlunga: ômangat nerrijuksaungilatit; tagva nuna ôminarsile pivlutit, siorniorlutit inôgutiksarsiorvigijaksarivat uvluksatit nâvlugit.

¹⁸ Ukpiganik kakkilautilingnik perornerdluktuniglo kakkilautilingnik nuititsijomârpoᴋ illingnut, perortullo naternamêtut nerrijaksarivatit.

¹⁹ Kênait kitjijârtilugo nerᴋiksarnik nerrijomârpotit, nunamut utterviksat tikkidlugo, tagvangat tigujaumagavit; ivjôvotit ivjungortuksaungmivlutillo kingumut.

²⁰ Adamiblo nuliane Evamik atserarpâ, inôjut ilûnamatsiatik anânagingmatsuk.

²¹ Gûdiblo Nâlekab Adamelo nuliangalo annorâliorpak amivinernik atitilugiglo makkoninga.

²² Gûdelo Nâlegaᴋ oᴋarpoᴋ: Takovase, Adame uvaptitunilertoᴋ, ajungitomiglo ajortomiglo illisimajoᴋ. Mânale issaktailijaule, tigusivlune napârtomit ômanartomit nerrivlunelo inôlerlunelo soraijuitomik:

²³ Tagva Gûdib Nâlekab aulartipâ perorsêvingmit Edenemit, nuna senavigivlugo perᴋovlugo, tagvangat tigujaumangmat.

²⁴ Annitipâlo inuk, perorsêviublo Edenib kangianut Kêrubit pitipait saviksoalijartut ᴋeblâlâjunik, aulajalerangata, udjertortuksat apᴋomik napârtomut ômanartomut.