Genesis 29 - Labrador Inuttitut Heritage Bible

Jakob Lealo Rahelelo nuliarilerpak.

¹ Tagva Jako aularpoᴋ kangilît nunanganut ingergavlune.

² Takojaksarsioramelo, takolerpâ imeᴋarvik natername, saukallo kattimajut pingasuit sanniane aᴋopijut, imeᴋarvingmit tâpsomangat saukat kattimajut imertitauvangmatta; ujararlo imeᴋarviub pânganêtoᴋ angijôvoᴋ.

³ Saukallo kattimajut ilûnatik tagvunga kattimgatitaulerangata, ujaraᴋ imeᴋarviub pânganit aksakâtilugo saukat imertipait, kingorngane ujaraᴋ imeᴋarviub pânganut ilingmivlugo inninganut.

⁴ Jakoblo aperivait: Katangutikka, nanemiongovisê? Kiovât: Haranemiongovogut.

⁵ Amma aperivait: Labane, Nahorib erninga, illitarivisiûk? Kiovât: Illitarivavut.

⁶ Aperigivoᴋ: Kanoengitsiaralloarᴋâ? Kiovât: Kanoengitsiarpoᴋ; taggale panninga Rahele saukanik tikkiutjijoᴋ.

⁷ Oᴋarivoᴋ: Takovose uvloklingimat sulle, nergjutillo kattimgatitaujariaᴋangimatta sulle; saukat imertirᴋârlugit nerrinasuktitsartorsigik.

⁸ Kiovât: Sapperpogut, nergjutit kattimajut ilûnamatsiatik kattimgatitaurᴋârtinagit. Taimaipatta, ujaraᴋ aksakâtilugo imeᴋarviub pânganit saukat imertipavut.

⁹ Sulle oᴋaᴋatigêktilugit, Rahelib atâtame saugaᴋutingit tikkiutivait, taipkoninga mianersijôgame.

¹⁰ Jakoble Rahele takoleramiuk, angame Labanib panninga, saukallo angame Labanib saugaᴋutingit, tagva ujaraᴋ aksakâtitsartorpâ imeᴋarviub pânganit, angamelo Labanib saugaᴋutingit imertipait.

¹¹ Jakoblo Rahele kunikpâ, niplerlunelo ᴋeavoᴋ.

¹² Rahelelo, Jakob nallojungnairtingmago, atâtangata ujorugingmago Rebekkablo erneringmago, aᴋpangerpoᴋ, atâtane ᴋaujititsartorlugo.

¹³ Labanible tussaramiuk ujoruminik Jakomik oᴋartoᴋ, aᴋpangerpoᴋ pagreartorlugo, erᴋilugolo kunikpâ, iglominullo itertipâ. Tagva Labanemut tamakkoninga tamainik unipkârpoᴋ.

¹⁴ Labanible oᴋautivâ; Ahale, sauningma uviningmalo illagivâtit. Taᴋᴋerlo nâvlugo tagvanêngmat,

¹⁵ Labanib Jako oᴋautivâ: Ujorugigalloarapkit, akkeᴋangitomik kivgartoraksarivingâ? Oᴋalaurit, sumik akkileraksarigapkit.

¹⁶ Labanele panneᴋarpoᴋ maggungnik, angajukleᴋ Leamik atteᴋarpoᴋ, nukardleᴋ Rahelemik attelik.

¹⁷ Leale ijitsiarilungilaᴋ, Rahelele taututsiarikpoᴋ kênatsiariklunelo.

¹⁸ Jakoble Rahele nagligigamiuk, oᴋarpoᴋ: Pannît nukardleᴋ Rahele pivlugo jârinik 7nik kivgartoromavagit.

¹⁹ Labanib kiovâ: Tunijaksarigalloarapko, igvit idluarnersarivagit angumit assingnit; uvamnêtuarit.

²⁰ Taimak Jako kivgartorpoᴋ jârinik 7nik Rahele pivlugo; uvlotuinaunasugivaille ikkitunik, nagligigamiuk.

²¹ Jakob tagva Labane oᴋautivâ: Nuliaksara tuniuk uvamnut; uvluksakka nângmatta, sennilerijomavara.

²² Labaniblo nunaᴋatine tamaita ᴋairᴋovait, nerrimâraksamik âᴋiksoivlune.

²³ Unnungmalle, pannine Lea tiguvâ tâpsomunga itertilugo; tâpsomalo tuttikpâ.

²⁴ Labaniblo kivgarne arnaᴋ Silpa tunivâ panniminut Leamut, kivgaurᴋovlugo tâpsomunga.

²⁵ Uvlângolermalle, sunaubva, Lea. Tagva Labanemut oᴋarpoᴋ: Sôᴋ taimailiorᴋingâ? Kivgartorlungilagît Rahele pivlugo? Sôᴋ uiveridlarᴋingâ?

²⁶ Labanib oᴋautivâ: Nunaptingne iluseᴋalungilagut nukardleᴋ tunerᴋârlugo angajuklermit.

²⁷ Vôge nâniaruk ômunga, tagva aipangatauᴋ tunijomavavut illingnut, jârinik 7nik sulle kivgartorniaruvit uvamnut taimna pivlugo.

²⁸ Taimailiorlune Jakob vôge nâvâ taipsomunga. Tagva Labanib pannine Rahele tunivâ, tâpsomunga nuliangorᴋovlugo.

²⁹ Kivgarnelo arnaᴋ Bilha tunivâ panniminut Rahelemut, kivgaurᴋovlugo tâpsomunga.

³⁰ Tagva Raheletauᴋ tuttigivâ; Rahelele nagliginersarivâ Leamit, kivgartorpâlo sulle jârit 7 nâvlugit.

³¹ Nalekable Lea ômigijaujoᴋ takogamiuk, timinga angmarpâ, Rahelele ᴋitorngisuipoᴋ.

³² Lealo singailerpoᴋ ernertârlunelo, atserarlugolo Rubenemik, oᴋarame: Nâlekab ajulernera takonârpâ; mâna uima nagliginiarpânga.

³³ Amma singailerpoᴋ ernertârlunelo, oᴋarlunelo: Nâlekab ômigijaujunga tussaraminga, ômingatauᴋ tunitjivigivânga; Simeonemiglo atserarpâ.

³⁴ Amma singailerivoᴋ ernertârlunelo, oᴋarlunelo: tamattomane uima ungagilerniarpânga, pingasunik ernernik ernigama tâpsomunga: tamanna pivlugo Levimik atserarpâ.

³⁵ Amma singailerivoᴋ ernertârlunelo, oᴋarlunelo: Tamattomane Nâlegaᴋ nakorijomavara. Tamanna pivlugo Judamik atserarpâ; ernijungnailerpoᴋ tâva.