Genesis 28 - Labrador Inuttitut Heritage Bible

Jako ᴋemâvoᴋ Haranemut.

¹ Isaab tagva Jako ᴋairᴋovâ saimauserlugolo; perᴋolugolo oᴋautivâ: Nulianingniarnak Kânaanib panningita illanganik!

² Parngnailerille ingergarniarlutit Mesopotâmiamut, anânavit atâtangata Betuelib iglunganut, taikangallo nulianilerit Labanib, anânavit anningata panningita illanganik.

³ Gûdible ajugaᴋangitub saimauserlitit, kinguvâktârtilutillo, unuksivalliatilutillo inôᴋatigêksoangortilutit;

⁴ Illingnullo tuniliuk saimanartoᴋ Abrahab pinga, illingnullo kinguvâksarnullo kingunikkut, kingormgujerᴋovlutit nunamik tujormiangorvigijarnik, Gûdib tunijanganik Abrahamut!

⁵ Taimak Isaab Jako aularᴋongmago, ingergavoᴋ Mesopotâmiamut Labanemut, Siriamiomut, Betuelib erninganut, Jakoblo Esauiblo anânangata Rebekkab anninganut.

⁶ Esauele tukisilerame, Isaab Jako saimauserlugo aularᴋongmago Mesopotâmiamut, taikangat nulianirᴋovlugo, saimauserlugolo inerterlugolo oᴋautingmago: Nulianingniarnak Kânaanib panningita illanganik,

⁷ Jakoblo atâtakûngne nâlangmagik aularlunelo Mesopotâmiamut;

⁸ Tukisileramelo Esaue, atâtame Isaab Kânaanib panningit idluaringimagit;

⁹ Tagva Ismaêlemut aivoᴋ, nulianiklunelo Mahâlatemik, Ismaêlib Abrahab erningata panninganik, Nabajotib najanganik, nuliarigêrtângminut illautilugo.

¹⁰ Jakole aularpoᴋ Bersêbamit, ingergavlunelo Haranemut.

¹¹ Nunallo illanganut tikkiname, unnuivoᴋ tagvane, seᴋineᴋ tachisimangmat. Ujaraillo tagvanêtut illanganik tigusivoᴋ akitiginiardlugo, tagvungalo innalerpoᴋ.

¹² Sinnaktômavorlo: sunaubva majûtit nuname nappajut, issuallo aktoajoᴋ ᴋilangmut. Sunaubvalo, Gûdib engelingita majoarvigivait aᴋᴋarvigilaitalo.

¹³ Sunaubvalo, Nâlegaᴋ ᴋollâne nangerpoᴋ oᴋarlunelo: Uvanga Nâlegauvunga, atâtavit Abrahab Gûdinga, Isaablo Gûdinga. Nuna innangavigijat tunijomavara illingnut kinguvâksarnullo.

¹⁴ Kinguvâksatillo nunab sanningititut unuktigijomârput, siamaromârpotillo paunga taunungalo avungalo aungallo, illikkullo kinguvâksakullo kinguvârêt nunamêtut ilûnamatsiatik saimausertaujomârput.

¹⁵ Ahâglo, illagivagit saputijomavagillo, naukullônêt ingergaralloarmangârpit; uttertitsomavagillo nunamut mattomunga, allarniatsanginapkit, piniarᴋârtinanga tamainik oᴋautigijamnik illingnut.

¹⁶ Jakolo siningminit tupalerame, oᴋarpoᴋ: Illâle! tamadja Nâlekab najugâ, uvangalo nellovara.

¹⁷ Kuksasuklunelo oᴋarpoᴋ: Kappianarmêk nuna tamanna! Tamannauvoᴋ illa Gûdib iglunga; tamannauvoᴋ ᴋilaub upkoanga!

¹⁸ Uvlârarsukullo Jako makiname, ujaraᴋ tiguvâ, akitigijane, nallunaikutangortilugolo nappartipâ, orᴋsumiglo koverivâ ᴋânga.

¹⁹ Nunalo tamanna Bêtelemik taivâ: sivorngagut iglugasait Lûsemik atteᴋaralloarmatta.

²⁰ Jakolo angerpoᴋ, angeruteᴋarlune imâk: Gûdib illagikpanga, saputivlungalo apᴋome mattomane ingergarvigijamne, nerᴋiksaniglo tunitjivigikpanga nerrijaksamnik, annorâniglo attijaksamnik,

²¹ Atâtamalo iglunganut utteruma ᴋanoenanga, tagva Nâlegaᴋ Gûdigijomavara.

²² Ujararlo una nappartitara, nallunaikutaksautilugo igluksaujomârpoᴋ Gûdemut, ilûnatiglo uvamnut tunijavit tellimaujoanimmarik tunitjivigijomârpagit.