Genesis 27 - Labrador Inuttitut Heritage Bible

Saimanartoᴋ angajuklermut pijuksaᴋ Jakob pivâ.

¹ Pijokarporlo, Isaaᴋ inutoᴋaulerame, takpêdlunelo tautugungnailerame, Esaue ᴋairᴋovâ, ernine angajukleᴋ, oᴋautivlugolo: Ernîk! Kiovâle: Mânêpunga.

² Oᴋautivâlo: Takovarma îtôlertunga, toᴋoviksaralo nellovara.

³ Taimaimat sakkutit tigulaukit ᴋargjoᴋautillo pittiksillo, naternamullo aularlutit ômajoᴋsiorit piksamnik,

⁴ Nerᴋiksaliorlungalo mamaᴋtunik, ikligijamnik, ᴋaitsivigivlungalo nerrerᴋovlunga, tarnima saimauseraksaringmattit toᴋolerᴋârnanga.

⁵ Rebekkable tussâvâ Isaaᴋ ernerminut Esauemut oᴋartoᴋ. Esauelo naternamut aularpoᴋ ômajoᴋsioromamut ᴋaitsijomamullo.

⁶ Tagva Rebekka oᴋarpoᴋ Jakomut ernerminut, oᴋarlunelo: Takkuit, atâtat tussâvara angajungnut Esauemut oᴋartoᴋ:

⁷ Omajoᴋsiolerit piksamnik nerᴋiksaliorlungalo mamaᴋtunik nerrijaksamnik, saimauseromagapkit Nâlekab sângane toᴋolerᴋârnanga.

⁸ Nippiga mâna tussaruk, ernîk, ᴋanoᴋ perᴋogapkit!

⁹ Nergjuteᴋotinut ailerit, tuktungajoarângniglo maggungnik aiklerit, ajungitûngnik, atâtat taipkungninga nerᴋiksaliorniarapko mamaᴋtunik ikligijanginik.

¹⁰ Atâtat âtsiviginiarpat tagva nererᴋovlugo, saimauserniarmatit toᴋolerᴋârane.

¹¹ Jakoble anânane Rebekka oᴋautivâ: Takkuit, angajuga Esaue merᴋoᴋarpoᴋ, uvangale merᴋoᴋangilanga.

¹² Atâtama tapsiktorpallungniarpânga, uiveriklertotut tagva ilinganiarpunga tâpsomunga, idluiluᴋutiksamiglo pititsiniarpunga uvamnut, saimanartoᴋ pinago.

¹³ Tagva anânangata oᴋautivâ: Ernîk, illingnut idluiluᴋutiksaᴋ uvamnut ilinganiarpoᴋ; nippiga nâlatuinaruk; aikleriartorit taipkungninga uvamnut.

¹⁴ Tagva aikleriartorpoᴋ anânane âtsivigivlugo, anânangalo nerᴋiksaliorpoᴋ mamaᴋtunik atâtangata ikligijanginik.

¹⁵ Rebekkablo tiguvait Esauib, ernime angajukliub annorângit ânanât, pairijane iglome, tâpkoningalo Jako attitipâ ernine nukardleᴋ.

¹⁶ Tuktungajoaraglo amîgingnut aggangit immuserpait, ᴋongasingalo merᴋoᴋangitoᴋ.

¹⁷ Nerᴋiksallo mamaᴋtut, ᴋaᴋᴋôjallo sanajane, ernerme Jakob agganginut tunivait.

¹⁸ Atatanelo itervigivâ oᴋarlune: Atâtâk! Kiovâle: Mânêpunga; kinauvêt, ernîk?

¹⁹ Jakoblo atâtane oᴋautivâ: Esaueovunga ernerirᴋârtat; piniarpunga oᴋautsitit maliklugit; makilaurit, iksivavlutillo nerrilaurit pigijamnit, saimausertaurᴋovlunga tarningnut.

²⁰ Isaable ernine oᴋautivâ: Ernîk, ᴋanoᴋ illiorlutit piniutjisaraidlarnerᴋêt? Kiovâ: Nâlekab Gûdivit naipitsitingmanga.

²¹ Tagva Isaab Jako oᴋautivâ: Maungalerit, ernîk, tapsigomagapkit, tâmnaungmangârpit ernera Esaue, tâmnaungimangârpillônêt.

²² Jakolo atâtaminut Isaamut pivoᴋ; tapsigamiuglo oᴋarpoᴋ: Nippît tagva Jakob nippinga, aggaktille tagva Esauib aggangit.

²³ Illitaringilâlo, aggangit merᴋoᴋarmatta Esauib angajungata aggangititut, saimauserpâlo.

²⁴ Oᴋautivâlo: Nelâgut tâmnauvêt ernera Esaue? Kiovâ: Tâmnauvunga.

²⁵ Tagva oᴋautivâ: Kaikit, ernima pijanginit nerrilanga, tarnimnut saimausertaurᴋovlutit. Atsivigingmagolo, nerrivoᴋ; vainemiglo âtsivigingmago, imerpoᴋ.

²⁶ Atâtangatalo Isaab oᴋautivâ: Kailaurit, ernîk, kuniklungalo!

²⁷ Sâvigivâ tagva kuniklugolo. Annorângitalo tippingat naigamiuk, saimauserpâ oᴋarlunelo: Ahâk, ernima tippinga naternab tippingatun-ipoᴋ, Nâlekab ânanausijangata.

²⁸ Gûdib tunitjivigilitit ᴋilaub mitsuksoanganik, nunamiglo ajoᴋsarnangitomik, ᴋaᴋᴋôjaksaniglo vainemiglo amigangitunik!

²⁹ Inugasaksuit kivgartoraksarivâtit, inôᴋatigêksuillo pâmaktervigijaksarivâtit. Attaniolerit ᴋatangutingnut, anânavillo ᴋitorngangita pâmaktervigijaksarivâtit. Illingnik oᴋauteᴋaluktoᴋ oᴋauserlugviole, illingniglo saimarsaijoᴋ saimausertaule!

³⁰ Pijoᴋarporlo, Isaab oᴋautsine saimanartut Jakomut nângmagit, Jakolo serlamarik atâtaminit Isaamit aningmat, tagva angajua Esaue tikkipoᴋ ômajoᴋsiorvingmit.

³¹ Tâmnatauᴋ mamaᴋtunik nerᴋiksanik âᴋiksoivoᴋ, âtsilarmelo atâtaminut, oᴋautivâlo: Atâtaga makile, nerrivlunelo ernime pilauᴋtanganit, tarnivit saimauseraksaringmanga.

³² Atâtangatalo Isaab aperivâ; Kinauvêt? Oᴋarpoᴋ: Esaueovunga ernerirᴋârtat.

³³ Tagva Isaaᴋ angijoᴋsoarmik ᴋoaᴋsâdlarpoᴋ, oᴋarlunelo: Kinauvâ tagva ômajoᴋsiortoᴋ imna ᴋaitsijoᴋ uvamnut? Tamainillo nerrivunga tikkerᴋârtinak, saimauserparalo, saimausertauningalo soᴋoserniangilaᴋ illa.

³⁴ Esauible atâtame oᴋausingit tussaramigit, ᴋaggudlarpoᴋ angijomik ajornartomiglo; atâtaminullo oᴋarpoᴋ: Atâtâk, uvangatauᴋ saimausilaungminga!

³⁵ Oᴋarporle: Nukat uiveriklerlune iterame, saimanartoᴋ illingnut pijuksaᴋ tigugêrpâ.

³⁶ Oᴋarporlo: Tukkelingmik Jakomik atteᴋalungilâᴋ? maggoertorlune mâna uiveringmanga. Erniangoᴋârnera tigunamiuk, ahâglo, mâna saimanartoᴋ uvamnut pijuksaᴋ tigugivâ. Oᴋarporlo: Saimanartomik uvanga pijaksamnik torᴋortaumajoᴋangilatît?

³⁷ Isaab Esaue kiovâ oᴋautilâlo: Attaningortipara illingnut, ᴋatangutingillo tamaita kivgangortipakka tâpsomunga, ᴋaᴋᴋôjaksaniglo vainemiglo piksaᴋartipara; ᴋanoᴋ tagva igvit piniarvigijaksarivagît, ernîk?

³⁸ Esauelo atâtaminut oᴋarpoᴋ: Atâtâk, saimanartoᴋ tâmnainaᴋ pigiviûk? Uvangatauᴋ saimausilaungminga, atâtâk! Nipliadlalerporlo Esaue, ᴋeasivlunelo.

³⁹ Tagva atâtangata Isaab kiovâ oᴋarlunelo: Ahâk, apsimavlutit nunamit ajoᴋsarnangitomit ᴋilaublo mitsuksoanganit pângat pijomit nunaᴋaromârpotit.

⁴⁰ Saviksoarnit inôgutiksarsijomârpotit, nukallo kivgartoraksarivat. Pijoᴋaromârporle, nâlegungnairlugo nangmaut ᴋongasernit kippijomârangne.

⁴¹ Esauiblo Jako omigilerpâ saimanartoᴋ pivlugo, atâtangata illijanga taipsomunga; ômatimigullo oᴋarpoᴋ: Nelliutisarainiarpoᴋ oguarviksaᴋ atâtaga pivlugo, nukara Jako toᴋotsomavara tagva.

⁴² Rebekkale oᴋautjaulerame ernime angajukliub Esauib oᴋausinginik makkoninga, tillikliutjivoᴋ, ernine nukardleᴋ Jako ᴋairᴋovlugo, oᴋautilâlo: Ahâk, angajuvit Esauib akkiniarasuarpâtit, toᴋotsomavlutit.

⁴³ Taimaimat nippiga tussaruk mâna, ernîk! Opalungailerit ᴋemâvlutillo annimnut Labanemut Haranemut.

⁴⁴ Tagvanêlerillo, angajuvit ningarosungninga soraitsiarivlugo;

⁴⁵ Angajuvit ningaumajârninga illingnut soraitsiarivlugo, puigutsiarivlugolo ᴋanoᴋ piniarvigigangne; tagva tillikliutjijomârpunga, taikangat ᴋairᴋovlutit. Sôᴋ tamaptingnik attautsikut aᴋsârtaujuksauvêk?

⁴⁶ Isaamullo Rebekka oᴋarpoᴋ: Ariutsivunga Hêtib panningit inôᴋatigivlugit. Jako nulianikpat Hêtib panningita illanganik, ukkotitunaᴋ ovanemiut panningititut-itomik, inôseᴋ suksarinajarpigô?