Genesis 26 - Labrador Inuttitut Heritage Bible

Isaab ingergarninganik.

¹ Kangnartoksoarlo nalliutivoᴋ nuname, kângnartoᴋsoaᴋ taimnaungitoᴋ sivorleᴋ Abraha inôtilugo nalliusimajovineᴋ. Tagva Isaaᴋ ingergalerpoᴋ Abimêlegemut, Filisterit attaninganut, Geraremut.

² Nâlekablo saᴋᴋervigivâ oᴋautilâlo: Ingergarniarnak Egiptenemut, nunamêtualerille oᴋautigijamne illingnut.

³ Nuname mattomane tujormiangolerit, uvangalo illagijomavagit saimauserlutit, illingnut kinguvâksarnullo nunat tamakkoa tamaita tunijomagapkit, angerneralo angernerijara atâtangnut Abrahamut soᴋosijuititsomavara.

⁴ Kinguvâksatillo unuksivalliatitsomavakka ᴋilaub uvloriangititut, kinguvâksarnullo nunat tamakkoa tamaita tunijomavakka. Kinguvâksakullo inôᴋatigêksuit nunamêtut ilûnamatsiatik saimausertaujomârput,

⁵ Imâk pivlugo: Abrahab nippiga nâlangmago, maligaksaurᴋojakkalo malingmagit, perᴋojakkalo ilusiorᴋojakkalo piniaraksaurᴋojakkalo.

⁶ Isaaᴋ tagva Gerareme nunaᴋalerpoᴋ.

⁷ Inuillo tagvanêtut nulianga apperᴋutigijarangatsuk, oᴋarpakpoᴋ: Najagivara; nuliarivlugo oᴋariaᴋ kappiagigamiuk, (issumaᴋarlune:) Tamânemiut toᴋoniarpânga Rebekka pivlugo, kênatsiaridlarnermat.

⁸ Pijoᴋarporlo; tagvanêluᴋitâlermat, Abimêlege, Filisterit attaningat igalâkut itsuarpoᴋ takolerlugolo, sunaubva, Isaaᴋ nuliaminik Rebekkamik erᴋitsijoᴋ.

⁹ Tagva Abimêlegib Isaaᴋ ᴋaiᴋovâ oᴋautilâlo: Atso illâ, nuliarivat. Sôᴋ najagivlugo oᴋarᴋêt? Isaablo kiovâ: Issumagama: toᴋoniarpallukpânga tamna pitjutigivlugo.

¹⁰ Abimêlegiblo oᴋautivâ: Sôᴋ taimailiorpitigût? Serlak inuit illangata nuliat tuttilungilâ; passitiksaᴋartinajarpaptigut tagva.

¹¹ Abimêlegiblo inuᴋotine tamaita inerterpait oᴋautivlugit: Nelliat angumik ôminga nulianganiglônêt aktuijoᴋ toᴋotaksauvoᴋ.

¹² Isaarlo nuname mattomane karngasoivoᴋ, karngasortanelo hundertertorlugit kattersoivoᴋ jâreme ômane, Nâlekab saimausermago.

¹³ Angullo tâmna angijororpoᴋ, angijororpalliatuinarlunelo angijomariolerpoᴋ tâva.

¹⁴ Saukkallo tuktuvaillo kattimajoᴋsuit, kivgallo unuktut pigivait; tamanna pivlugo Filisterit annerutivât.

¹⁵ Imeᴋarvîllo tamaita, atâtangata kivgangita poagijartaviningit, atâtanga Abraha inôtilugo sulle, Filisterit simikpait kibviarlugillo ivjomut.

¹⁶ Abimêlegelo Isaamut oᴋarpoᴋ: Aularit, sôngoluadlaravit uvaptingnut!

¹⁷ Tagva Isaaᴋ tagvangat aularpoᴋ, tangmârlunelo Gerarib naᴋsangane, nunaᴋalerlunelo tagvane.

¹⁸ Imeᴋarvîllo poagijartaupsârᴋovait, poagijartaujovinît atâtanga Abraha inôtilugo, Filisterille kibviartangit Abrahab toᴋungata kingorngagut, atteᴋartipaillo sorlo atâtangata atserarlaungmagit.

¹⁹ Isaablo kivgangit naᴋsarme poagijaramik, puilavik issungitomik imilik nagvârpât.

²⁰ Mianersijulle Geraremiut akkerartorpait Isaab kivgangit, oᴋarlutiglo: Uvagut imeᴋ tâmna perᴋutigivavut. Tamanna pivlugo puilavik tâmna Esekemik taivâ, aivautigingmatsuk tâmna pitjutigivlugo.

²¹ Tagva imeᴋarviksaᴋ assia poagijarpât, tâmnatauᴋ akkerartûtigigivât; tamanna pivlugo Sitnamik atserarpâ.

²² Tagvangallo nûpoᴋ, imeᴋarviksaᴋ assia poagijarlugo, tâmna akkerartûtigingilât; tamanna pivlugo Rehôbotemik atserarpâ, oᴋarlunelo: Mâna Nâlekab inniksaliorpâtigut aglisitilutalo nuname mattomane.

²³ Tagvangallo aularpoᴋ Bersêbamut.

²⁴ Nâlekablo unnuarme taipsomane saᴋᴋervigivâ oᴋautilâlo: Uvanga tagva atâtavit Abrahab Gûdinga. Sivôraniarnak, illagigapkit saimauseromagapkillo, kinguvâksatillo unuksivalliatitsomagapkit kivgara Abraha pivlugo.

²⁵ Tagvanelo tunerguservingmik sanavoᴋ, Nâlekablo attinga tuksiarvigivâ, tangmârlunelo tagvane, Isaablo kivgangita imeᴋarviksaᴋ poagijarpât.

²⁶ Abimêlegiblo tikkipâ Geraremit, illanârijangatalo Agusab, sorsuktuksaᴋsoangitalo angajoᴋângata Pikolib.

²⁷ Isaable oᴋautivait: Sôᴋ tikkipisê uvamnut? omigivlunga aulartinapsinga illipsingnit.

²⁸ Tâpkoa oᴋarput: Missigimarikpogut Nâlekab illagingmatit. Tamanna pivlugo oᴋarpogut: Angerᴋatigêlauᴋtatôᴋ uvagullo igvillo, angerᴋatigilaptigillo,

²⁹ Idluitulerᴋonak uvaptingnut, sorlo uvagut aktulaunginaptigit, sorlolo piniarvigigaptigit ajungitotuinarmik, aularᴋolutillo ullapirᴋsauteᴋarluta. Igvillo Nâlekamut saimausertaumavotit.

³⁰ Tagva nerrimâraksanik âᴋiksoivoᴋ, nerrilerpullo imilarmiglo.

³¹ Uvlârarsukullo makileramik, angerᴋatigêkput; Isaablo aularᴋovait, ullapirᴋsauteᴋarlutiglo aularput tâpsomangat.

³² Uvlorme taipsomane Isaab kivgangita tikkipât, oᴋautivlugo imeᴋarvingmik poagijartamingnik, oᴋarlutik: imermik nagvârpogut.

³³ Tagva Sêbamik taivâ, tamanna pivlugo iglugasaksuit Bersêbamik taijauvut uvlomemut.

³⁴ Esauele jâreᴋarame 40nik, nuliarilerpak Judi, Berib Hêtiterib panninga, Basmâtelo, Elonib Hêtiterib panninga.

³⁵ Tâpkoa kiksautauvuk Isaamut Rebekkamullo.